ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކުރަންވާނީ އައު ދައުރަކަށް ކަމަށާއި، ކުއްލިއަކަށް މުސާރަ ކުޑަކޮށްފިނަމަ މަޖިލިސް އިންތިޚާބަށް ނެގި ދަރަނި އަދާކުރާނެ ގޮތެއް ނޯންނާނެ ކަމަށް ޕީއެންސީ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު މިރޭ ވިދާޅުވެއްޖެއެވެ.
ފަލާހު އެފަދައިން ވިދާޅުވީ، ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކުރުމަށް ގޮވާލައި، ޕެޓިޝަނެއްގައި ސޮއިކުރަން ފަށާފައިވާ ދަނޑިވަޅެއްގައެވެ.
އެކަމާ ގުޅިގެން 'އެކްސް'ގައި ކުރެއްވި ޕޯސްޓެއްގައި ފަލާހު ވިދާޅުވީ އެއީ ގޯސް ޚިޔާލެއް ނޫން ކަމަށެވެ. ނަމަވެސް އެމްޑީޕީގެ ސުޕަ މެޖޯރިޓީ އޮތް، މިދިޔަ 19 ވަނަ މަޖިލީހުގެ މެންބަރުން ދިޔައީ މެންބަރެއްގެ މުސާރަ 100،000އަށް ހަދަން ކަމާ ގުޅުންހުރި ކޮމިޓީއިން ފާސްކޮށްފައިކަން އޭނާ ފާހަގަކުރެއްވިއެވެ. ނަމަވެސް އެކަން އެގޮތަށް ނުކުރަން އިރުޝާދު ދެއްވީ މިހާރުގެ ރައީސް ޑރ. މުހައްމަދު މުއިއްޒު ކަމަށް ފަލާހު ވިދާޅުވިއެވެ.
ފަލާހު ވަނީ މަޖިލިސް މެންބަރުންގެ މުސާރަ ކުއްލިއަކަށް ކުޑަކުރުމާ ގުޅޭގޮތުން އޭނާގެ ވިސްނުން ހާމަކުރައްވައިފައެވެ.
އެގޮތުން މަޖިލިސް މެންބަރުންގެ މުސާރައަށް ބަދަލު ގެނައުން ރަނގަޅީ މަޖިލީހުގެ ދައުރެއް ނިމި އައު ދައުރެއްގެ އިންތިޚާބާ ޖެހުމުން ކަމަށް ފަލާހު ވިދާޅުވިއެވެ. އެއީ، އެތައް މިލިއަން ރުފިޔާއެއް ޚަރަދުކުރުމަށް ފަހު މަޖިލީހަށް ވަންނަ ތަނުން މުސާރަ ކުޑަކޮށްފިނަމަ އިިންތިޚާބަށް ނެގި ދަރަނި އަދާކުރާނެ ގޮތެއް ނޯންނާނެތީ ކަމަށް ފަލާހު ވިދާޅުވިއެވެ.
"ވީމަ އަލަށް 21ވަނަ މަޖިލީހަށް، މެމްބަރަކަށް 5000 ރުފިޔާ ކަނޑައެޅީމަ އެ މުސާރަ އޯކޭވެގެން ކުރިމަތިލާ މެމްބަރުންނަކަށް ޝަކުވާކުރެވޭކަށް ނޯންނާނެ،" ފަލާހު ވިދާޅުވިއެވެ.

ރައީސް ޑރ. މުހައްމަދު މުއިއްޒާއި ޕީއެންސީގެ ޕީޖީ ލީޑަރު އިބްރާހިމް ފަލާހް -- ފޮޓޯ/ ރައީސް އޮފީސް
ހަމައެއާއެކު ކުރީގެ ރައީސުންގެ އިނާޔަތާ މެދު ވެސް ވިސްނާލުން މުހިންމު ކަމަށާއި، ފަނޑިޔާރުންގެ ނަން ވެސް ޕެޓިޝަނުގައި ހިމެނުން ރަނގަޅުވީސް ކަމަށް ފަލާހު ވިދާޅުވިއެވެ.
"...އަދުގެ އިއްޒައިތްތެރި ރައީސް، ރައީސް މުއިއްޒު މުސާރައިގެ ދެބައިކުޅަ އެއްބައި ނަންގަވާ ކޮންމެ ކަމެއްގައި ވެސް ނަމޫނާ ދައްކަވާތީ ރައީސަށް ޚާއްސަ ޝުކުރެއް ދަންނަވަން،" ފަލާހު ވިދާޅުވިއެވެ.
ފާހަގަކޮށްލެވޭ ގޮތުގައި ޚަރަދުކުޑަކުރުމަށް އަޅުއްވާ ފިޔަވަޅުތަކުގެ ތެރޭގައި ހިމެނޭ ސިޔާސީ މަގާމުތަކުގައި ތިއްބެވި ބޭފުޅުންގެ މުސާރައިން 10 އިންސައްތަ ކުޑަ ކުރެއްވުމަށް ރައީސް މުއިއްޒު މީގެ ކުރިން ނިންމެވުމާ ގުޅިގެން އެ ނިންމެވުމަށް އެއްބާރުލުން ދެއްވުމުގެ ގޮތުން، ފަލާހު މެންބަރުކަމުގެ މުސާރައިގެ 10 އިންސައްތަ އެއް އަހަރު ދުވަހަށް ނުނަގަން ވެސް ނިންމިއެވެ.
ރައްޔިތުންގެ މަޖިލީހުގެ މެންބަރުންނަށް މުސާރައާ އެލަވަންސްގެ ގޮތުގައި މަހަކަށް 82،500 ރުފިޔާ ލިބެއެވެ. އެއީ، މެންބަރުން އަމިއްލައަށް ގާނޫނެއްގެ ޒަރިއްޔާއިން ކަނޑައަޅާ މުސާރައެކެވެ.
މިދިޔަ 19 ވަނަ މަޖިލީހުގައި މެންބަރުންނާއި ދައުލަތުގެ ވެރިންގެ މުސާރަ ބޮޑުކުރަން ވެސް މަޝްވަރާކުރިއެވެ. އެކަމަކު، ފާޑުކިޔުން ބޮޑުވުމުން އެ މަސައްކަތް ހުއްޓާލީއެވެ. އޭގެ އިތުރުން ވެސް މެންބަރުންނާއި މެންބަރުންގެ އާއިލާތަކަށް އާސިއާންގެ ގައުމުތަކުން ހިލޭ ބޭސް ކުރެވެއެވެ.
މީގެ ކުރިން ތަފާތު އެކި ފަހަރު މަތިން މެންބަރުންގެ މުސާރަ ކުޑަކުރަން ތަޅުމުގައި ވެސް ބަހުސްކުރިއެވެ. އެކަމަކު، އެ ކަމަށް މެންބަރުންގެ ފަރާތުން ތާއީދެއް ނުލިބެއެވެ.
މާލީ ދަތިތަކުގެ ސަބަބުން މެންބަރުންގެ މުސާރައިން 10 އިންސައްތަ އުނިކުރަން ރައީސް ނިންމެވި ގޮތަށް އެ ކަންތައް ވެސް ކުރެވެން ނެތް ކަމަށް މި ހިނގާ 20 ވަނަ މަޖިލީހުން ވެސް ވަނީ ނިންމާފައެވެ. މާލިއްޔަތު ކޮމިޓީން އެ ގޮތަށް ނިންމީ ގާނޫނު މިހާރު އޮތް ގޮތުން އެކަން ކުރެވެން ނެތް ކަމަށް ބުނެއެވެ.
މެންބަރުންގެ މުސާރަ ކުޑަކުރުމާ ގުޅޭގޮތުން އޮންލައިންކޮށް، ސޮއިކުރެވޭ ގޮތަށް މިހާރު ހުށަހަޅާފައިވާ ޕެޓިޝަންގައި ވަނީ، މަޖިލީސް މެންބަރުންނަށް ދޭ މުސާރަ ކުޑަކޮށް، އެ މެންބަރުންނާއި އާއިލާތަކަށް ދޭ ހެލްތު އިންޝުއަރެންސް ކަނޑާލުމަށާއި ކުރީގެ މެންބަރުންނަށް ދޭ އެލަވަންސްތައް ކަނޑާލުމަށް ގޮވާލާފައެވެ. އަދި، ރައްޔިތުންނެކޭ އެއްގޮތަށް މެންބަރުންނަށް އާސަންދަގެ ޚިދުމަތް ދޭން ވެސް ގޮވާލައިފައިވެއެވެ.
އެ މެންބަރުންނަށް ލިބޭ މުސާރައިގެ އިތުރަށް އިނާޔަތްތަކާ ޗުއްޓީއާ ބަލާއިރު، އެކަށީގެންވާ ވަރަށް މަސައްކަތް ނުކުރާ ކަމަށް ޕެޓިޝަނުގައިވެއެވެ.