ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއު ބިންވެރިޔާ ސްކީމްގެ ދަށުން، ލިސްޓުގައި ނެތް ބަޔަކަށް ގޯތި ދިން ކަމަށް ބުނާ މައްސަލައެއް ފެންމަތިވެފައިވަނިކޮށް، ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދާއި ބޯޑުގެ އެއް މެންބަރަކު ފިޔަވައި އެންމެން ސަސްޕެންޑުކޮށްފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން ނެރުނު ބަޔާނެއްގައި ވަނީ އެޗްޑީސީގެ ބޯޑު މެންބަރުން މިއަދުން ފެށިގެން ސަސްޕެންޑުކުރަނީ، އެ ކުންފުންޏާ ގުޅޭ ގޮތުން ފުލުހުން ކުރިއަށްގެންދާ ތަހުގީގަށް ޖާގަދީ، ފުރިހަމަ އެހީތެރިކަން ދިނުމުގެ ގޮތުން ކަމަށެވެ.
އެޗްޑީސީގެ ބޯޑުން ސަސްޕެންޑުކުރީ ޗެއާމަން އަހުމަދު ނާސިފް ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުންނެވެ.
"އަދި ކުންފުނީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު ވެސް މި ބޯޑުން ވަކި ގޮތެއް އޮފީހަށް ނުނުކުމެވޭ ގޮތަށް ވަނީ ސަސްޕެންޑުކޮށްފައެވެ." އެ ބަޔާނުގައިވެއެވެ.
އެޗްޑީސީގެ ބޯޑުގައި ފަޒުލްއާއި ނާސިފްގެ އިތުރުން ހިމެނެނީ:
- އަޒްހަރު އަބްދުﷲ ސައީދު - ޑިރެކްޓަރު
- އިބްރާހީމް ޔޫސުފްފުޅު - ޑިރެކްޓަރު
- މުޙައްމަދު ވިޝާމް - ޑިރެކްޓަރު
- އުލާ މުޙައްމަދު ރަޝީދު - ޑިރެކްޓަރު
- އާރިފް އަބްދުލް ސަމަދު - ޑިރެކްޓަރު
- މުޙައްމަދު ނާޖިލް - ޑިރެކްޓަރު
- މުޙައްމަދު ވަހީދު - ޑިރެކްޓަރު
- ފާތިމަތު މިޒްނާ އަލީ - ޑިރެކްޓަރު
- ޔޫސުފް ވަހީދު - ޑިރެކްޓަރު
ބިންވެރިޔާ ސްކީމަށް ޝަރުތު ހަމަނުވި ނަމަވެސް ގޯތި ލިބިފައިވާ މީހުންގެ ތެރޭގައި، ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު ހިމެނޭ ކަމަށް ބުނާ ލިޔެކިޔުންތަކެއް ވަނީ އާންމުވެފައެވެ.
އެޗްޑީސީ އޮފީސް: ބިންވެރިޔާ ސްކީމާ ގުޅޭ ގޮތުން ކުރެވޭ ތުހުމަތުތަކާ ގުޅިގެން އިއްޔެ ފުލުހުން އެޗްޑީސީގެ އޮފީހަށް ވަދެ، ބަލައިފާސްކޮށްފައިވޭ --- ފޮޓޯ: އެޗްޑީސީ
ފުލުހުން އިއްޔެ ބުނެފައިވަނީ، ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް އެޗްޑީސީން ގޯތިތަކެއް ދީފައިވާ ކަމަށް ބެލެވޭ މައްސަލައެއް ފެންމަތިވުމާ ގުޅިގެން އެ މައްސަލައިގައި ޖިނާއީ ތަހުގީގެއް ހިންގަމުންދާ ކަމަށެވެ.
މިދިޔަ އަހަރުގެ އޮގަސްޓު މަހު ނެރެފައިވާ ބިންވެރިޔާ ސްކީމްގެ ފައިނަލް ލިސްޓުގައި ފަޒީލްގެ ނަން އޮތެވެ. ނަމަވެސް އޭނާއަށް އޮތީ ޝަރުތު ހަމަނުވާ ކަމަށެވެ. އޭގެ ސަބަބެއްގެ ގޮތުގައި ބަޔާންކޮށްފައިވަނީ ސަރުކާރުން ހިންގައިފައިވާ އަސާސީ ބޯހިޔާވަހިކަމުގެ ސްކީމަކުން އޭނާއަށް ކުރިން ގޯއްޗެއް ލިބިފައި އޮތުމެވެ.
ފަޒީލްއަށް ލިބިފައިވާ ގޯއްޗާ ގުޅޭ ލިޔެކިޔުންތަކެއް އިތުބާރު ހުރި މަސްދަރަކުން "ސަން"އަށް ވެސް ލިބިފައިވެއެވެ. އޭގެ ތެރޭގައި، ފަޒީލަށް ދީފައިވާ ގޯތި އެހެން މީހަކަށް ވެސް ލިބިފައިވާ ކަމަށް އެޗްޑީސީއަށް ފާހަގަވުމުން، އެ ކުންފުނިން މިދިޔަ ޖުލައި މަހު ހައުސިން މިނިސްޓްރީ މެދުވެރިކޮށް މައުލޫމާތު ސާފުކުރަން ފޮނުވައިފައިވާ ސިޓީއެއް ހިމެނެއެވެ.
އެ ސިޓީގެ ޖަވާބުގައި ހައުސިން މިނިސްޓްރީން ފޮނުވައިފައިވާ ސިޓީއެއްގައި ވަނީ ފަޒީލަށް ދޫކުރި ކަމަށް ބަޔާންކޮށްފައިވާ ގޯއްޗަކީ މިނިސްޓްރީން އެހާތަނަށް އެއްވެސް ފަރާތަކާ ހަވާލުކޮށްފައިނުވާ ގޯއްޗެއް ކަމަށް ބުނެފައެވެ.
އެ މައްސަލައާ ގުޅޭ ގޮތުން ރޭ ބޭއްވި ނޫސްވެރިންގެ ބައްދަލުވުމެއްގައި ފަޒުލް ވިދާޅުވީ އެކަމުގައި އޭނާގެ މަސްލަހަތެއް ނެތް ކަމަށާއި، އެފަދަ މައްސަލައެއް ފެންމަތިވީ އޭނާގެ ބޭބެއާ ގުޅޭ ގޮތުން ކަމަށް ވުމަކީ އިއްތިފާގެއް ކަމަށެވެ.
މީގެ އިތުރުން އޭނާ ވަނީ ގޯތި ދޫކުރުމާއި ރެޖިސްޓްރީ ހެދުމަކީ ވެސް އެޗްޑީސީން ކުރާ ކަމެއް ނޫން ކަމަށް ވިދާޅުވެފައެވެ. އަދި ގޯއްޗާ ގުޅޭ ކަންކަމުގައި އެ ކުންފުނި ޝާމިލްވަނީ، ގޯތީގެ ވަށާފާރު ރާނަން އެ ކުންފުންޏަށް އެޕްލިކޭޝަން ފޮނުވާ ހިސާބުން ކަމަށް ފަޒުލް ވިދާޅުވިއެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ނިންމައިފައިވެއެވެ. އެ ގޯތިތައް ދޫކޮށްފައިވަނީ ހުޅުމާލެއާއި ގުޅީފަޅާއި ގިރާވަރުފަޅުންނެވެ.
އޭގެ ތެރެއިން ހުޅުމާލޭ ދެވަނަ ފިޔަވަހިން ދިނުމަށް ހަމަޖެހިފައިވާ ގޯތިތައް އެތަންތަނުގެ ވެރިންނާ ހަވާލުކޮށް ނިމިފައިވާ ކަމަށް މިދިޔަ އޮކްޓޯބަރު މަހު ހައުސިން މިނިސްޓްރީން ވަނީ ބުނެފައެވެ