ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއު ބިންވެރިޔާ ސްކީމްގެ ދަށުން، ގޯތި ލިބޭ މީހުންނަން ގޯތި ދިނުމުގައި އެޗްޑީސީގެ އެއްވެސް ބައިވެރިވުމެއް ނޯންނާނެ ކަމަށް ވިދާޅުވެ، އެ ކުންފުންޏަށް ކުރާ ތުހުމަތުތައް މެނޭޖިން ޑިރެކްޓަރު އިބްރާހިމް ފަޒުލް ރަޝީދު ދޮގުކުރައްވައިފިއެވެ.
ފަޒުލް އެހެން ވިދާޅުވީ، އޭނާގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު ހިމެނޭ ގޮތަކަށް، ލިސްޓުގައި ނެތް ބަޔަކަށް ގޯތި ދިން ތުހުމަތުތަކެއް ފެންމަތިވުމާ ގުޅިގެން ބޭއްވި ނޫސްވެރިންގެ ބައްދަލުވުމެއްގައެވެ.
ފަޒުލް ވިދާޅުވީ ބިންވެރިޔާ ސްކީމްގެ ދަށުން ރަޖިސްޓްރީ ދޫކުރުމާއި އެއްބަސްވުން ހެދުމާއި ބިން ހަވާލުކުރުމަކީ އެޗްޑީސީން ކުރާ ކަމެއް ނޫން ކަމަށެވެ. އޭނާ ވިދާޅުވީ އެ މަސައްކަތުގައި އެޗްޑީސީ ޝާމިލް ވަނީ ގޯތީގައި ވަށާފާރު ރޭނުމަށް އެ ކުންފުނީގެ ޕޯޓަލް މެދުވެރިކޮށް، ގެދޮރުވެރިން ހުއްދައަަށް އެދޭ ހިސާބު ކަމަށެވެ.
"އެހެންވީމަ އަޅުގަނޑުމެންނަށް ބައުންޑްރީ ވޯލް ޕާމިޓަކަށް މި އެޕްލައި ކުރަނީ އެ ރަސްޖިޓްރީއެއް އޮންނަ ފަރާތެއް ކަމަށް އަޅުގަނޑުމެން މި ގަބޫލުކުރަނީ، އެހެންވީމަ އެ ހިސާބުން ފަށައިގެން ބައުންޑްރީ ޕާމިޓް އަޅުގަނޑުމެން ދޫކޮށްލަނީ، ދޫކޮށްލާ ހާލަތުގައި އަޅުގަނޑުމެން ވެރިފިކޭޝަން ޕްރޮސެސްއެއް އިނިޝިއޭޓް ކުރާނީ،" ފަޒުލް ވިދާޅުވިއެވެ.
"އެހެންވީމަ ބިންވެރިޔާ ޕްލޮޓްތަކަކީ އަޅުގަނޑުމެން އެއްވެސް ހާލަތެއްގައި އެއްވެސް އިރެއްގައި ޝާމިލްވެގެން ރައްޔިތުންނާ ހަވާލުކުރި ޕްލޮޓްތަކެއް ނޫން."
އޭނާ ވިދާޅުވީ އެޗްޑީސީއަށް އަންނަ އެޕްލިކޭޝަންތަކާ ބެހޭ ގޮތުން ހައުސިން މިނިސްޓްރީގައި މައުލޫމާތު ޔަގީންކުރުމަށް ކުރާ މަސައްކަތުގައި ބައެއް މައްސަލަތައް ފާހަގަވެފައިވާ ކަމަށެވެ.
ގޯތި ދޫކުރުމުގައި އޮޅުވާލައިފައިވާ ކަމަށް ކުރާ ތުހުމަތުތަކާ ގުޅިގެން އެޗްޑީސީ ކައިރީގައި ބޭއްވި އެއްވުމުގެ ތެރެއިން -- ސަން ފޮޓޯ/ ނާއިޝް ނާހިދު
ސޯޝަލް މީޑިއާގައި މިއަދު ފެތުރިފައިވާ ލިޔެކިޔުންތަކަކީ އެ މައްސަލަތައް ފާހަގަވެގެން އެޗްޑީސީން ފޮނުވުމުން ހައުސިން މިިނިސްޓްރީން އެކަން ޔަގީންކޮށްދިން ލިޔުންތައް ކަމަށް ފަޒުލް ވިދާޅުވިއެވެ.
"އަޅުގަނޑުމެން އެއްވެސް ހާލަތެއްގައި މިނިސްޓްރީ އޮފް ހައުސިންއިން ނާންގާ ފަރާތަކަށް އަޅުގަނޑުމެން މިތަނުން ބިމެއް ހަވާލުކޮށްފަކާއެއް ނުވާނެ. އެހެންވީމަ އެކަމުގެ ފުރިހަމަ ޔަގީންކަން އަޅުގަނޑުމެން އަރުވަން،" އޭނާ ވިދާޅުވިއެވެ.
ފަޒުލް ވިދާޅުވީ ހުޅުމާލޭ ދެވަނަ ފިޔަވަހިން މިހާތަނަށް ހައުސިން މިނިސްޓްރީއާ 709 ގޯއްޗެއް ހަވާލުކޮށްފައިވާ ކަމަށެވެ. އަދި ބިންވެރިޔާ ސްކީމްގެ ދަށުން ދެން ގޯތި ދޫކުރާ ތިން ވަނަ ފިޔަވަހީގެ ބިން ހިއްކުން މިހާރު ހުއްޓިފައި އޮތް ނަމަވެސް އެ މަސައްކަތް އަވަހަށް ފެށި، އެތަނުން ވެސް ގޯތި ދޫކުރެވޭނެ ކަމަށް އުއްމީދު ކުރައްވާ ކަމަށް އޭނާ ވިދާޅުވިއެވެ.
ތިން ވަނަ ފިޔަވަހިން ދޫކުރަން ޖެހޭ ގޯތީގެ އަދަދު 799އަށް އަރާކަން ފަޒުލް ފާހަގަކުރެއްވިއެވެ.
"އަޅުގަނޑެ ދޭން ބޭނުންވާ ޔަގީންކަމަކީ އަޅުގަނޑުމެން މި އެޗްޑީސީގެ ފަރާތުން ހުޅުމާލެ ފޭސް ދޭއްވެސް އަދި ތިނެކަށް ވެސް ދޭން ޖެހޭ ބިންތައް އަޅުގަނޑުމެން އެ ފަރާތްތަކަށް ހަވާލު ކުރާނެ ކަމުގެ ޔަގީންކަން،" އޭނާ ވިދާޅުވިއެވެ.
އެ މައްސަލައިގެ ޖިނާއީ ތަހުގީގެއް މިހާރު ފަށައިފާއިރު، އޭނާ ވަނީ ތަހުގީގަށް އެއްބާރުލުން ދޭނެ ކަމަށް ވިދާޅުވެފައެވެ.
"ސަން"އަށް ލިބިފައިވާ ލިޔެކިޔުމަށް ބަލާއިރު މިދިޔަ ޖުލައި 24ގައި އެޗްޑީސީގެ ޑެޕިއުޓީ ޑިރެކްޓަރަކު ހައުސިން މިނިސްޓްރީއަށް ފޮނުވައިފައިވާ ސިޓީއެއްގައި ވަނީ ހުޅުމާލެ ލޮޓް ނަމްބަރު 20768 ލިބިފައިވާ ކަމަށް ދެ ފަރާތަކުން ބުނެ ވަށާފާރު ރޭނުމަށް އެދިފައިވާ ކަމަށެވެ. އެހެންވެ، އެ ގޯތި ލިބިފައި ވަނީ ކޮން ފަރާތަކަކަށް އަންގައި ދިނުމަށް އެ ސިޓީގައި އެދިފައިވެއެވެ.
އެ ސިޓީގެ ޖަވާބަކަށް ހައުސިން މިނިސްޓްރީން އެޗްޑީސީއަށް ފޮނުވައިފައިވާ ސިޓީގައި ވަނީ ފަޒީލަށް ދޫކުރި ކަމަށް ބަޔާންކޮށްފައިވާ ގޯއްޗަކީ މިނިސްޓްރީން އެހާތަނަށް އެއްވެސް ފަރާތަކާ ހަވާލުކޮށްފައިނުވާ ގޯއްޗެއް ކަމަށް ބުނެފައެވެ.
އެ މައްސަލަ ސޯޝަލް މީޑިއާގައި ފެންމަތިވުމާ ގުޅިގެން ގިނަ ބަޔަކު އަންނަނީ މައްސަލަ ބެލުމަށް ގޮވާލަމުންނެވެ. އަދި މިރޭ އެޗްޑީސީ އިމާރާތް ކައިރިއަށް އެއްވެ، ބައެއް މީހުން ނުރުހުން ފާޅުކޮށްފައި ވެސްވެއެވެ.
މީގެ އިތުރުން އިދިކޮޅު އެމްޑީޕީން ވަނީ އުސޫލުން ބޭރުން 50 ގޯތި ދީފައިވާކަމަށާއި، އެއީ ސަރުކާރަށް ވެސް އެނގިގެން ކޮށްފައިވާ ކަމެއްކަމަށް ތުހުމަތުކޮށް އެ މައްސަލަ ރައްޔިތުންގެ މަޖިލީހަށް ހުށަހަޅާފައެވެ.