ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއު ބިންވެރިޔާ ސްކީމްގެ ދަށުން، ގޯތި ލިބޭ މީހުންގެ ލިސްޓުގައި ހިމެނިފައި ނެތް ބަޔަކަށް ގޯތި ދިން މައްސަލައެއް ފެންމަތިވެއްޖެއެވެ.
"ސަން"އަށް ލިބިފައިވާ ލިޔެކިޔުންތަކުން ދައްކާ ގޮތުގައި ބިންވެރިޔާ ސްކީމަށް ޝަރުތު ހަމަނުވި ނަމަވެސް ގޯތި ލިބިފައިވާ މީހުންގެ ތެރޭގައި، ހުޅުމާލެ ބަލަހައްޓާ ކުންފުނި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު ހިމެނެއެވެ.
ލިޔެކިޔުންތަކުގެ ތެރެއިން، މިދިޔަ ޖުލައި 24ގައި އެޗްޑީސީގެ ޑެޕިއުޓީ ޑިރެކްޓަރަކު ހައުސިން މިނިސްޓްރީއަށް ފޮނުވައިފައިވާ ސިޓީއެއްގައި ވަނީ ހުޅުމާލެ ލޮޓް ނަމްބަރު 20768 ލިބިފައިވާ ކަމަށް ދެ ފަރާތަކުން ބުނެ ވަށާފާރު ރޭނުމަށް އެދިފައިވާ ކަމަށެވެ. އެހެންވެ، އެ ގޯތި ލިބިފައި ވަނީ ކޮން ފަރާތަކަކަށް އަންގައި ދިނުމަށް އެ ސިޓީގައި އެދިފައިވެއެވެ.
އެ ސިޓީގައި ފާހަގަކޮށްފައިވާ އެއް ނަމަކީ ފަޒީލެވެ.
އެ ސިޓީއާއި، އެފަދަ މައްސަލައަކާ ގުޅުން ހުރި އިތުރު ސިޓީއަކަށް ހައުސިން މިނިސްޓްރީން ދިން ޖަވާބުގައި ބުނެފައި ވަނީ، އެޗްޑީސީގެ ސިޓީގައި ފާހަގަކޮށްފައިވާ މީހުންނަކީ އެ ސްކީމުން ގޯއްޗަށް އެދި އެޕްލިކޭޝަން ހުށަހަޅައިފައިވާ މީހުން ނޫންކަން ޑޭޓާބޭސްއިން ދައްކާ ކަމަށެވެ. އަދި 20768 ގޯއްޗަކީ އެ މިނިސްޓްރީން އެހާތަނަށް އެއްވެސް ފަރާތަކާ ހަވާލުކޮށްފައިނުވާ ދެ ގޯތި ކަމަށް ވެސް ސިޓީގައިވެއެވެ.
އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު: ބިންވެރިޔާއަށް ޝަރުތު ހަމަނުވާ ނަމަވެސް އޭނާއަށް ވަނީ ގޯއްޗެއް ދީފައި -- ފޮޓޯ/ އެމްޑަބްލިޔުއެސްސީ
ކުރީ ސަރުކާރުގައި، މިދިޔަ އަހަރުގެ އޮގަސްޓު މަހު ނެރެފައިވާ ބިންވެރިޔާ ސްކީމްގެ ފައިނަލް ލިސްޓުގައި ފަޒީލްގެ ނަން އޮތެވެ. ނަމަވެސް އޭނާއަށް އޮތީ ޝަރުތު ހަމަނުވާ ކަމަށެވެ. އޭގެ ސަބަބެއްގެ ގޮތުގައި ބަޔާންކޮށްފައިވަނީ ސަރުކާރުން ހިންގައިފައިވާ އަސާސީ ބޯހިޔާވަހިކަމުގެ ސްކީމަކުން އޭނާއަށް ކުރިން ގޯއްޗެއް ލިބިފައި އޮތުމެވެ.
އެހެން ނަމަވެސް، ފަޒީލަށް ގޯތި ދޫކުރުމަށް އެއްބަސްވުމެއް ހަދައިފައިވާކަން ލިޔެކިޔުމުން ދައްކައެވެ. އެ އެއްބަސްވުމުގައި އޮތް ގޮތުން، މިނިސްޓްރީގެ ފަރާތުން ސޮއިކުރައްވާފައި ވަނީ ޑިރެކްޓާ ޖެނެރަލް އަހުމަދު ވިޝާން ނަސީމެވެ. އެ އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ ސެޕްޓެމްބަރު 11ގައެވެ.
މި މައްސަލައާ ގުޅޭ ގޮތުން ފަޒުލްގެ ބަހެއް ހޯދަން މަސައްކަތް ކުރި ނަމަވެސް މިހާތަނަށް ލިބިފައިނުވެއެވެ.
އެ މައްސަލަ ސޯޝަލް މީޑިއާގައި ފެންމަތިވުމާ ގުޅިގެން ގިނަ ބަޔަކު އަންނަނީ މައްސަލަ ބެލުމަށް ގޮވާލަމުންނެވެ. އޭގެ ތެރޭގައި މި ސަރުކާރުގައި ހިމެނޭ ހިތަދޫ މެދު ދާއިރާގެ ޕީއެންސީއަށް ނިސްބަތްވެވަޑައިގަންނަވާ މެންބަރު އަހުމަދު އަޒާން ވެސް ހިމެނެއެވެ. އޭނާ އެކްސްގައި ކުރެއްވި ޕޯސްޓެއްގައި ވަނީ އެއީ ވަރަށް ސީރިއަސް ތުހުމަތުތަކެއް ކަމަށް ވިދާޅުވެ، މައްސަލަ ބެލުމަށް ގޮވާލައްވައިފައެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ނިންމައިފައިވެއެވެ. އެ ގޯތިތައް ދޫކޮށްފައިވަނީ ހުޅުމާލެއާއި ގުޅީފަޅާއި ގިރާވަރުފަޅުންނެވެ.
އޭގެ ތެރެއިން ހުޅުމާލޭ ހުޅުމާލޭ ދެވަނަ ފިޔަވަހިން ދިނުމަށް ހަމަޖެހިފައިވާ ގޯތިތައް އެތަންތަނުގެ ވެރިންނާ ހަވާލުކޮށް ނިމިފައިވާ ކަމަށް މިދިޔަ އޮކްޓޯބަރު މަހު ހައުސިން މިނިސްޓްރީން ވަނީ ބުނެފައެވެ.