އިދިިިކޮޅު އެމްޑީޕީން މި ފަހުން ކާނިވަލުގައި ބޭއްވި ޖަލްސާގައި ކީ ލަވަޔަކާއެކު މަޝްހޫރުވި ރ. ދުވާފަރު ކައުންސިލް މެމްބަރު މަރިޔަމް ޔަޝްފާ ފުލުހަށް ހާޒިރުވާން އަންގައިފިއެވެ.
އާންމުންނަށް ޔަޝްފާ މަޝްހޫރުވީ އެމްޑީޕީން މިދިޔަ ހަފުތާގައި ބޭއްވި، "ގާނޫނު އަސާސީގެ ދިފާއުގައި ރައްޔިތުން" ޖަލްސާގައި ކީ ލަވަޔަކާއެކުގަައެވެ.
ފުލުހަށް ހާޒިރުވާން އެންގުމުން އެކަމާ ގުޅިގެން "ސަން"އާ ވާހަކަދައްކަވަމުން ޔަޝްފާ ވިދާޅުވީ އެންމެ ފުރަތަމަ އޭނާއަށް ގުޅީ ރ. ދުވާފަރު ޕޮލިސް ސްޓޭޝަނުގައި މަސައްކަތްކުރާ ސާޖަންޓެއް ކަމަށެވެ. ގުޅުމަށްފަހު ތުހުމަތު ކުރެވޭ ކަމަކާ ގުޅިގެން ސުވާލުުކުރުމަށް ފުލުހަށް ހާޒިރުވާން ޖެހޭކަމަށް އެންގިކަމަށް އޭނާ ވިދާޅުވިއެވެ.
ނަމަވެސް އެއިރު ވެސް އޭނާގެ މައްޗަށް ކުރާ ތުހުމަތަކީ ކޮބައިކަން ހާމަނުކުރާ ކަމަށް ޔަޝްފާ ވިދާޅުވިއެވެ.
"ދެން އަޅުގަނޑު ބުނެފިން، އަޅުގަނޑަށް ތުހުމަތުކުރާނެ މީހަކު ނުހުންނާނޭ ސަރުކާރު ނޫނިއްޔާ. އެންމެ ފުރަތަމަ ގުޅައިލާފައި ބުނީ މިއަދު ހެނދުނު 10 ޖަހާއިރޭ. ދެން އަޅުގަނޑު ޗިޓު ވާހަކަ ބުނީމާ، ބުނީ ޗިޓު ދީފައި 24 ގަޑިއިރު ތެރެޔޭ މީހާ ހާޒިރުކުރެވެނީ. އެހެންވީމާ. މިއަދުގެ ވަގުތެއްގައި ޗިޓު ހަވާލުކުރާނަމޯ. މާދަމާގެ 10ގެ ޖަހާއިރޭ އޮތީ،" އޭނާ ވިދާޅުވިއެވެ.
އޭނާ ވިދާޅުވީ ފަހުން ގުޅީ މާލެއިން، ފުލުހުންގެ އިދާރާގެ ރަސްމީ ނަންބަރަކުން ކަމަށެވެ. އަދި ހާޒިރުކުރަނީ އެމްޑީޕީގެ ދަނޑިކޮށި ޖަގަހައިގައި ދެއްކި ވާހަކައަކާ ގުޅިގެން ސުވާލުކުރުމަށް ކަމަށް ބުނި ކަމަށް ވެސް ޔަޝްފާ ވިދާޅުވިއެވެ.
ޔަޝްފާ ވިދާޅުވީ އެ ޖަލްސާގައި ވެސް ގާނޫނުތަކާ ޚިލާފު އެއްވެސް ވާހަކައެއް ދައްކައިފައި ނުވާނެކަމަށާއި، އެ ޖަލްސާގައި ދެއްކި ވާހަކައަކީ ދުވާފަރުގައި މަޝްރޫއުތައް ނުހިނގާ ވާހަކައާއި، އެ ކަމުގެ ކަންބޮޑުވުންތަކުގެ ވާހަަކަ ކަމަށް އޭނާ ވިދާޅުވިއެވެ.
އެ ޖަލްސާގައި ވެސް އޭނާ ވަނީ ބަންޖަކާއި، ރައިވަރެއް ހުށަހަޅައިފައެވެ.
މި ކަމާ ގުޅިގެން ފުލުހުންނާ ތަކުރާރުކޮށް ސުވާލުކުރުމުން ވެސް ރަސްމީ ބަހެއް ލިބޭ ގޮތެއް ނުވިއެވެ.
މި ފަހުން ވެސް އެމްޑީޕީގެ ސޯޝަލް މީޑިއާ އެކްޓިވިސްޓު ހުސައިން ޝާފިއު ވަނީ އޭނާ ކުރި ޓްވީޓަކާ ގުޅިގެން ފުލުހަށް ހާޒިރުކޮށްފައެވެ. މީގެ އިތުރުން އެމްޑީޕީގެ ޗެއާޕާސަން ފައްޔާޒު އިސްމާއިލު ވެސް ފުލުހަށް ހާޒިރުކޮށްފައިވެއެވެ.