ފަތުރުވެރިންނަށް ޚިދުމަތްދޭ ތަންތަނުން ދިވެހި ބޭންކެއްގައި ޑޮލަރު މާރުކުރަން އަންގައި ރައްޔިތުންގެ މަޖިލީހުން ފާސްކޮށްފައިވާ ބޭރު ފައިސާއާ ބެހޭ ބިލު ރައީސް ޑރ. މުޙައްމަދު މުއިއްޒު ތަސްދީގު ކުރައްވައިފިއެވެ.
ރައީސް އޮފީހުން ބުނީ، އެ ބިލު ރައީސް ތަސްދީގު ކުރެއްވުމާއެކު އެ ގާނޫނު މިއަދު ދިވެހި ސަރުކާރުގެ ގެޒެޓުގައި ޝާއިއުކޮށްފައިވާ ކަމަށެވެ.
އެ ގާނޫނަށް އަމަލުކުރަން ފަށާނީ އަންނަ އަހަރުން ފެށިގެންނެވެ.
ފަތުރުވެރިންނަށް ޚިދުމަތްދޭ ތަންތަނުން ކޮންމެ ފަތުރުވެރިއަކަށް ޑޮލަރު މާރުކުރަން އަންގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ފުރަތަމަ އެކުލަވައިލީ ގަވައިދެކެވެ. މިދިޔަ އޮކްޓޯބަރު މަހުގެ އެކެއްގައި އެ ގަވައިދު ތަންފީޒުކުރަން ފަށައިފައިވާއިރު، އެ ގަވައިދާ ގުޅޭ ގޮތުން ފަތުރުވެރިކަމުގެ ދާއިރާގައި ހަރަކާތްތެރިވާ ގިނަ ބަޔަކު ކަންބޮޑުވުން ފާޅުކުރަމުންދެއެވެ.
އެއަށްފަހު އެމްއެމްއޭއިން އެ ގަވައިދަށް ބައެއް ބަދަލުތައް ގެނައުމަށް ފަހު ޑްރާފްޓް ބިލެއް އެކުލަވައިލިއެވެ. އެ ބިލަށް ދާއިރާގެ ސްޓޭކްހޯލްޑަރުންނާއި އާންމުންގެ ޚިޔާލު ވެސް ހޯދި ކަމަށް އެމްއެމްއޭއިން ބުންޏެވެ.
ނަމަވެސް، ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން ވަނީ ގަވައިދާ އެއްގޮތަށް، ބިލު އެކުލަވާލަފައިވާ ގޮތާ މެދު ވެސް ކަންބޮޑުވުން ފާޅުކޮށްފައެވެ.
އެމްއެމްއޭއިން ތަންފީޒުކުރާ ގަވައިދުގައި އޮންނަނީ، ކޮންމެ ރިސޯޓަކުން ވެސް ފަތުރުވެރިއަކަށް 500 ޑޮލަރު މާރުކުރަން ޖެހޭނެ ކަމަށެވެ. އަދި މީހުން ދިރިއުޅޭ ރަށްރަށުގައި ހިންގާ ހޮޓާތަކާއި ގެސްޓްހައުސްތަކާއި ޓޫރިސްޓު އުޅަނދުތަކުން 25 ޑޮލަރު މާރުކުރަން ޖެހޭނެ ކަމަށެވެ.
އެމްއެމްއޭގެ ގަވަރުނަރު އަހުމަދު މުނައްވަރު: ބޭރު ފައިސާއާ ބެހޭ ގާނޫނު ތަންފީޒުކުރުމުގެ މައި އިދާރާއަކީ، އެމްއެމްއޭ -- ފޮޓޯ/ އެމްއެމްއޭ
ބޭރު ފައިސާގެ ބިލު އެކުލަވައިލިއިރު ވަނީ ޑޮލަރު މާރުކުރުމުން އިސްތިސްނާވާ ފަރާތްތަކާއި ހާލަތްތަކެއް ހިމަނައިފައެވެ. އޭގެ ތެރޭގައި:
1/ ގިނަވެގެން 24 ގަޑިއިރު ހޭދަކޮށްފައި ނުވާ ޓޫރިސްޓުން
2/ އުމުރުން ދެ އަހަރު ފުރިހަމަނުވާ ކުޑަކުދިން
3/ އެ ޓޫރިޒަމް އެސްޓަބްލިޝްމެންޓްގައި ހިލޭ ނުވަތަ ކޮމްޕްލިމެންޓްރީކޮށް ތިބޭ ފަރާތްތައް
ރައްޔިތުންގެ މަޖިލީހަށް ބިލު ހުށަހެޅިއިރު ވަނީ، ބޮލަކަށް 500 ޑޮލަރުގެ ބަދަލުގައި އާމްދަނީގެ ޕަސެންޓެއް މާރުކުރަން އިޚުތިޔާރު ދީފައެވެ. މީގެ އިތުރުން އިސްތިސްނާގައި ހިމެނޭ އުމުރުފުރާ 10 އަހަރަށް އިތުރުކުރިއެވެ.
އެއަށްފަހު މާލިއްޔަތު ކޮމިޓީން ބިލް ދިރާސަކުރުމަށް ފަހު ގެނައި އިސްލާހުތަކުގެ ތެރޭގައި، ރިސޯޓަކަށް މާލީ ދަތިކަމެއް ވާނަމަ، އާމްދަނީގެ 20 ޕަސެންޓަށްވުރެ މަދުން ދައްކަން އެދުމުގެ އިޚުތިޔާރު ދީފައެވެ. އަދި އިސްތިސްނާވާ އުމުރުފުރާ 12 އަހަރަށް އިތުރުކުރިއެވެ.
އެ އިސްލާހުތަކާއެކު މިދިޔަ ބުރާސްފަތި ދުވަހު މަޖިލީހުން ވަނީ ބިލް ފާސްކޮށްފައެވެ.
އެ ގާނޫނު ހިންގައި ތަންފީޒުކުރުމުގެ މައި އިދާރާއަކީ އެމްއެމްއޭ ކަމަށްވާއިރު، އެ ގާނޫނުގެ ދަށުން ހަދަންޖެހޭ ގަވާއިދުތައް، ގާނޫނަށް އަމަލުކުރަން ފަށާތާ ދެ މަސްދުވަހުގެ ތެރޭގައި ހެދުމަށް ގާނޫނުގައިވެއެވެ.
އެ ގާނޫނާ ގުޅޭ ގޮތުން ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން ފާޅުކުރާ ކަންބޮޑުވުމަކީ، ޑޮލަރުން ކުރަން ޖެހޭ ޚަރަދުތަކަށް ބަލާއިރު، ގާނޫނުގައި ބުނާ އަދަދަށް ފައިސާ މާރުކުރެވޭ ވަރަށް ޑޮލަރު ނުލިބޭ ކަމެވެ.