ރިސޯޓުތަކަށް ލުއި ލިބޭހެން ބައެއް ބަދަލުތަކާއެކު، ބޭރު ފައިސާއާ ބެހޭ ބިލު ދިރާސާކޮށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފިއެވެ.
ސިއްރުން ކުރިއަށްގެންދިޔަ މި ކޮމިޓީގައި ބޭރު ފައިސާއާ ބެހޭ ބިލު ފާސްކުރީ ބައެއް ބަދަލުތައް ގެނައުމަށްފަހުގައެވެ. ބިލަށް ކޮމިޓީއިން ގެނައި ބައެއް ބަދަލުތަކުގެ ތެރޭގައި ހިމެނެނީ:
- ޑޮލަރު މާރުކުރުމުން އިސްތިސްނާވާ އުމުރު 10 އަހަރުން 12 އަހަރަށް ވަނީ މަތިކުރުން
-
ރިސޯޓަކަށް މާލީ ދަތިކަމެއް ވާނަމަ، ރިސޯޓަށް ލިބޭ ބޭރު ފައިސާގެ އާމްދަނީގެ 20 ޕަސެންޓަށްވުރެ މަދުން ދައްކަން އެދުމުގެ އިޚުތިޔާރު ދިނުން. ނަމަވެސް އެ ލުއި ދެވޭނީ އެ ކަން އެމްއެމްއޭއަށް ސާބިތުކޮށްދިނުމުން، އެމްއެމްއޭއިން ކޭސް ރިވިއުކުރުމަށްފަހުގައި ކަމަށް ހެދުން
ސަރުކާރުގެ ފަރާތުން ޕީއެންސީ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު ބޭރު ފައިސާއާ ބެހޭ ބިލު ހުށަހެޅުއްވީ މިދިޔަ ހޯމަ ދުވަހުއެވެ.
އެ ބިލުގެ ބަހުސް މަރުހަލާ ކުރިއަށް ދިޔައީ އިއްޔެ އޮތް ޖަލްސާގައި އެކަންޏެވެ. މަދު މެންބަރުންކޮޅެއް ބަހުސްކުރެއްވުމަށް ފަހު އިއްޔެ ވަނީ މަޖިލީހުން ބަލައިގެންފައެވެ. ބިލު މަޖިލީހުން ބަލައިގަނެ، މާލިއްޔަތު ކޮމިޓީއަށް ފޮނުވީ 51 މެންބަރުންގެ ވޯޓާއެކުއެވެ. ބިލު ބަލައިގަތުމާ ދެކޮޅަށް ވޯޓުދެއްވީ އެންމެ ހަތަރު މެންބަރުންނެވެ.
އެއާއެކު ބިލު ދިރާސާކުރުމަށް މިއަދު ބޭއްވި މާލިއްޔަތު ކޮމިޓީއަށް ވަނީ މޯލްޑިވްސް އެސޯސިއޭޝަން ފޯ ޓޫރިޒަމް އިންޑްސްޓްރީ (މަޓީ) ހާޒިރުކޮށްފައެވެ.
ބޭރު ފައިސާއާ ބެހޭ ބިލު ހުށަހަޅާފައި ވަނީ ފަތުރުވެރިންނަށް ޚިދުމަތްދޭ ތަންތަނަށް އަންނަ ކޮންމެ ފަތުރުވެރިއެއްގެ ބޮލަށް 500 ޑޮލަރު ރާއްޖޭގެ ބޭންކަކުން މާރުކުރުން ނުވަތަ ލިބޭ އާމްދަނީގެ 20 ޕަސެންޓް މާރު ކުރަން ޖެހޭ ގޮތަށް, އިޚުތިޔާރު ދީފައެވެ.
ރިސޯޓްތަކަށް އަންނަ ފަތުރުވެރިއެއްގެ ބޮލަށް 500 ޑޮލަރު މާރުކުރަން އެމްއެމްއޭގެ ގަވާއިދުގައި މަޖުބޫރު ކުރުމުން ޓޫރިޒަމް އިންޑަސްޓްރީގެ އިސް ބޭފުޅުން ވަނީ އެ ގަވާއިދަށް އަމަލު ކުރެވެން ނެތް ކަމަށް ބުނެފައެވެ. އެއީ އެ ގަވާއިދު އޭރު އޮތްގޮތުން ނުލިބޭ އާމްދަނީއެއް ބޭންކަށް މާރު ކުރަން ޖެހޭ ކަމަށް ވިދާޅުވެއެވެ.
ނަމަވެސް ގަވައިދާ އެއްގޮތަށް މިހާރު ހުރިހާ ރިސޯޓަކުން ވެސް ވަނީ އެމްއެމްއޭއަށް ރަޖިސްޓަރު ވެފައެވެ.