މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ބޭރު ފައިސާއާ ބެހޭ ގަވައިދުގައި ހުރި ކަންތައްތަކަށް ބަދަލުތަކެއް ގެނެސް، އެކަމާ ގުޅޭ ބިލެއް އެކުލަަވައިލައިފިއެވެ.
އެމްއެމްއޭއިން ބުނީ ރައްޔިތުންގެ މަޖިލީހަށް ހުށަހަޅަން އެކުލަވާލި ބިލުގައި، އޮކްޓޯބަރު އެކެއްގައި އަމަލުކުރަން ފެށި ގަވައިދުގެ ބައެއް ކަންތައްތައް ކުރިއަށް ވުރެ ހަރުދަނާކޮށްފައިވާނެ ކަމަށެވެ.
އެ ބިލާ ގުޅޭ ގޮތުން ހިޔާލު ހޯދުމަށް މި ދާއިރާއާ ގުޅުން ހުރި ފަރާތްތަކަށް މިހާރު ހިއްސާކޮށްފައިވާނެ ކަމަށް އެމްއެމްއޭއިން ފާހަގަކުރިއެވެ.
އެ ބިލުގައި ވަނީ ބޭރު ފައިސާ މާރުކުރުމުން އިސްތިސްނާވާ ފަރާތްތަކާއި ހާލަތްތަކެއް ހިމަނައިފައެވެ. އޭގެ ތެރޭގައި:
1/ ގިނަވެގެން 24 ގަޑިއިރު ހޭދަކޮށްފައި ނުވާ ޓޫރިސްޓުން
2/ އުމުރުން ދެ އަހަރު ފުރިހަމަނުވާ ކުޑަކުދިން
3/ އެ ޓޫރިޒަމް އެސްޓަބްލިޝްމެންޓްގައި ހިލޭ ނުވަތަ ކޮމްޕްލިމެންޓްރީކޮށް ތިބޭ ފަރާތްތައް
އެ ބިލުގައި ވަނީ، އޮކްޓޯބަރު އެކެއްގައި ގެޒެޓުކުރި ގަވައިދާ އެއްގޮތަށް ކޮންމެ ރިސޯޓަކުން ވެސް ފަތުރުވެރިއަކަށް 500 ޑޮލަރު މާރުކުރަން ޖެހޭނެ ކަމަށެވެ. އަދި މީހުން ދިރިއުޅޭ ރަށްރަށުގައި ހިންގާ ހޮޓާތަކާއި ގެސްޓްހައުސްތަކާއި ޓޫރިސްޓު އުޅަނދުތަކުން 25 ޑޮލަރު މާރުކުރަން ޖެހޭނެ ކަމަށެވެ.
އެމްއެމްއޭއިން ވަނީ އެ ބިލަކީ ވިޔަފާރިތަކާއި ރައްޔިތުންގެ ލާބައާއި މަންފާއާ ގުޅިފައިވާ ބިލަކަށް ވާތީ ވިޔަފާރިތަކުންނާއި އާންމު ރައްޔިތުންގެ ޚިޔާލު ހޯދަން ބޭނުންވާ ކަމަށް ބުނެފައެވެ. އެހެންވެ، އަންނަ މަހުން ފެށިގެން [email protected] އަށް ޚިޔާލު ހުށަހެޅޭނެކަން އެ ބޭންކުން ވަނީ ފާހަގަކޮށްފައެވެ.
އެމްއެމްއޭއިން ބޭރު ފައިސާއާ ގުޅޭ ގަވައިދުގައި ހިމެނޭ ބައެއް ކަންތައްތަކަށް ބަދަލު ގެނެސް، ބިލެއް އެކުލަވައިލީ އެ ގަވައިދާ ގުޅޭ ގޮތުން ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން ކަންބޮޑުވުން ފާޅުކުރަމުން އަންނަ ދަނޑިވަޅެއްގައެވެ.
ފަތުރުވެރިކަމުގެ ބާނީން ހިމެނޭ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ން މީގެ ކުރިން ވަނީ، އެ ގަވައިދު އެކުލަވައިލީ އެ އެސޯސިއޭޝަންގެ ހުށަހެޅުންތަކަށް އިޖާބަ ނުދީ ކަމަށް ބުނެފައެވެ. އަދި އެ ބަދަލު ގެނައީ ކުއްލިއަކަށް ކަމުން، އޭގެ ސަބަބުން ފަތުރުވެރިކަމުގެ ދާއިރާއަށް ގެއްލުންވާނެ ކަމުގެ ކަންބޮޑުވުން ބައެއް ޖަމިއްޔާތަކުން ފާޅުކޮށްފައިވެއެވެ.
އެހެންނަމަވެސް، ސަރުކާރަށް އަހަރެއް ފުރުމާ ގުޅުވައި މީގެ ހަފުތާއެއްހާ ދުވަސް ކުރިން ބޭއްވި ޖަލްސާގައި ރައީސް ޑރ. މުޙައްމަދު މުއިއްޒު ވަނީ ބޭރު ފައިސާއާ ބެހޭ ގަވާއިދު ބަދަލު ނުކުރާނެ ކަމަށާއި އެ ގަވާއިދު އޮންނާނީ އެގޮތަށް ކަމަށް ވިދާޅުވެފައެވެ.