މި ސަރުކާރުން އަޅައިފައިވާ މާލީ އިސްލާހީ ފިޔަވަޅުތައް ފާހަގަކޮށް، ބައިނަލްއަގުވާމީ ކްރެޓިޑް ރޭޓިން އޭޖެންސީ މޫޑީސްއިން ރާއްޖެއަށް ދީފައިވާ ކްރެޑިޓް ރޭޓިން ސީއޭއޭ2ގައި ދަމަހައްޓައިފިއެވެ.
މިދިޔަ ސެޕްޓެމްބަރު މަހު މޫޑީސްއިން ވަނީ ރާއްޖޭގެ ރޭޓިން ސީއޭއޭ1އިން ސީއޭއޭ2އަށް ދަށްކޮށްފައެވެ.
މިއަދު އެ އޭޖެންސީން ނެރުނު ބަޔާނެއްގައި ކްރެޑިޓް ރޭޓިން ދެމެހެއްޓުމުގައި ބަލައިފައިވާ މައިގަނޑު ކަންކަމުގެ ތެރޭގައި ފާހަގަކޮށްފައިވަނީ ރާއްޖޭގެ މާލީ ހާލަތު ރަނގަޅު ކުރުމަށް އަޅައިފައިވާ ފިޔަވަޅުތަކެވެ. އޭގެ ތެރޭގައި، ރިޒޯޓުތަކަށް އަންނަ ކޮންމެ ފަތުރުވެރިއަކަށް 500 ޑޮލަރު މާރުކުރުމަށް އަންގައި މަރުކަޒީ ބޭންކް، އެމްއެމްއޭއިން އަލަށް ތައާރަފުކުރި ބޭރު ފައިސާއާބެހޭ ގަވާއިދާއި ޑިޕާޗާ ޓެކުހާއި އެއާޕޯޓު ޑިވަލޮޕްމަންޓަލް ފީ ބޮޑުކުރުން މޫޑީސްއިން ފާހަގަކުރިއެވެ.
އެ ފިޔަވަޅުތަކާއެކު، ބޭރު ފައިސާގެ ރިޒާވް އިތުރުވުމުގެ ފުރުސަތު ބޮޑުކަމަށް މޫޑީސްއިން އަންދާޒާކޮށްފައިވެއެވެ.
މީގެ އިތުރުން ފާއިތުވި މުއްދަތުގައި، ރާއްޖެއަށް ބޭރު ފައިސާގެ ފައިނޭންސިން ހޯދުމުގައި ކާމިޔާބީތަކެއް ހާސިލުވެފައިވާ ކަމަށް ވެސް މޫޑީސްއިން ބުނެފައިވެއެވެ. އެގޮތުން، މިދިޔަ ސެޕްޓެމްބަރު މަހު ރާއްޖެއާއި އިންޑިއާއާއެކު 400 މިލިއަން އެމެރިކާ ޑޮލަރާއި 30 ބިލިއަން އިންޑިއަން ރުޕީސްގެ ކަރަންސީ ސްވޮޕް އެއްބަސްވުމެއް ގާއިމުކޮށްފައިވުމަކީ ރާއްޖޭގެ މާލީ ހާލަތު ރަނގަޅުކުރުމަށް ކޮށްފައިވާ މުހިންމު ކަމެއްކަމަށް މޫޑީސްއިން ބުނެފައިވެއެވެ.
އެހެންނަމަވެސް ރާއްޖެއިން ދައްކަން ޖެހޭ ބޮޑު ދަރަންޏާ ގުޅޭ ގޮތުން މި ފަހަރުވެސް އެ އޭޖެންސީން ކަންބޮޑުވުން ފާޅުކުރިއެވެ. އެގޮތުން 18 މަސް ތެރޭގައި ބޭރުގެ ދަރަނި އަދާކުރުމަށް ބޮޑު ހޭދައެއް ކުރަންޖެހޭނެކަމަށް ބެލެވޭއިރު، ބޭރު ފައިސާ ލިބުމަށް ހުރި ދަތިތައް އަދިވެސް ދެމިގެންދާނެކަމަށް މޫޑީސްއިން ބުނެފައިވެއެވެ.
އެ އޭޖެންސީން ވަނީ، މިހާރު އެކަށައަޅާފައިވާ ކްރެޑިޓް ރޭޓިން ކުރިއަށްއޮތް ދުވަސްތަކުގައި އެ މިންގަނޑުގައި ދެމެހެއްޓުން ނުވަތަ މަތިވުން ބިނާވާނީ ސަރުކާރަށް ބޭރު ފައިސާއިން ފައިނޭންސިން ހޯދޭ މިންވަރަށާއި، އަންނަ އަހަރަށް ރައްޔިތުންގެ މަޖިލީހުން ފާސްކޮށްފައިވާ ބަޖެޓުގައި ސަރުކާރުން ކަނޑައަޅާފައިވާ ފިސްކަލް ރިފޯމްތައް ކާމިޔާބުކަމާއެކު ތަންފީޒުކުރުމުގެ މައްޗަށެވެ.
މޫޑީސްއިން މިއަދު ރޭޓިން ބަދަލުކުރިއިރު، ފިނޭންސް މިނިސްޓަރު މޫސާ ޒަމީރު މިއަދު ވަނީ އިންޓަނޭޝަނަލް މަނިޓަރީ ފަންޑު (އައިއެމްއެފް)އާއި އެހެނިހެން ރޭޓިން އެޖެންސީތަކުން ވެސް މިހާރު ރާއްޖެ ބަނގުރޫޓު ވުމުގެ ވާހަކަ ނުދައްކާ ކަމަށް ވިދާޅުވެފައެވެ.
މަޖިލީހަށް ވަޑައިގެން މެންބަރުންގެ ސުވާލުތަކަށް ޖަވާބު ދެއްވަމުން އޭނާ ވިދާޅުވީ ރައީސް ޑރ. މުޙައްމަދު މުއިއްޒުގެ ސިޔާސަތުތަކުގެ ދަށުން އާމްދަނީ ހޯދޭނެ ގޮތްތައް އިތުރުކޮށް، ޚަރަދުތައް ބަލަހައްޓައި، ދައްކަންޖެހޭ ބައެއް ދަރަނިތަކުގެ މުއްދަތު އިތުރުކޮށް، ރަހުމަތްތެރި ގައުމުތަކާއެކު މަސައްކަތްކޮށްގެން ރާއްޖޭގެ ހާލަތު މިހާރު ރަނގަޅު ކުރެވިފައިވާ ކަމަށެވެ.
ރާއްޖެއިން އިންޑިއާއާ އެކު ހެދި ކަރަންސީ ސްވޮޕް އެއްބަސްވުމާ އެކު ލިބުނު 400 މިލިއަން ޑޮލަރާ އެކު ރަސްމީ ރިޒާވް 614 މިލިއަން ޑޮލަރަށް ވަނީ އަރާފައެވެ. އެކަމަކު، ބޭނުންކުރެވޭ ރިޒާވް ހުރީ 31.5 މިލިއަން ޑޮލަރުގައެވެ.
މޫޑީސްއިން ސެޕްޓެމްބަރު މަހު ރޭޓިން ދަށްކުރީ ވެސް، ކުރިއަށް އޮތް ދެ އަހަރު ދައްކަން ޖެހޭ ދަރަނި އިތުރުވުމުންނެވެ. އެގޮތުން އަންނަ އަހަރު ދައްކަންޖެހޭ 600 މިލިއަން ޑޮލަރާއި 2026 ވަނަ އަހަރު ދައްކަންޖެހޭ އެއް ބިލިއަން ޑޮލަރު މޫޑީސްއިން ފާހަގަކޮށްފައިވެއެވެ.
އޭގެ ކުރިން މިދިޔަ އޮގަސްޓް މަހު 29 ގައި ފިޗުން ވެސް ވަނީ ރާއްޖޭގެ ރޭޓިން 'ސީސީ'އަށް ދަށްކޮށްފައެވެ.
މި ސަރުކާރުން ދަރަނި ދެއްކޭނެ ކަމުގެ ޔަގީންކަން ދެމުން އަންނައިރު، މާލީ ހާލަތު ރަނގަޅު ކުރުމަށް ޓަކައި މިހާރު ވެސް ބައެއް ފިޔަވަޅުތައް އަޅައި، އަންނަ އަހަރަށް ލަފާ ކުރާ ބަޖެޓުގައި ވަނީ އިތުރު ފިޔަވަޅުތައް ހިމަނައިފައެވެ.
މަޖިލީހުން މިދިޔަ ބުދަ ދުވަހު ފާސްކުރި ބަޖެޓުގައި ވަނީ 11.5 ބިލިއަން ރުފިޔާގެ ފިސްކަލް އިސްލާހީ ފިޔަވަޅު ހިމަނާފައިވެއެވެ.