އިންޓަނޭޝަނަލް މަނިޓަރީ ފަންޑު (އައިއެމްއެފް)އާއި އެހެނިހެން ރޭޓިން އެޖެންސީތަކުން ވެސް މިހާރު ރާއްޖެ ބަނގުރޫޓު ވުމުގެ ވާހަކަ ނުދައްކާ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ވަޑައިގެން މިނިސްޓަރު ޒަމީރު ވަނީ މެންބަރުން ކުރެއްވި ސުވާލުތަކަށް ޖަވާބުދާރީވެވަޑައިގެންފައެވެ.
އެގޮތުން ފޭދޫ ދެކުނު ދާއިރާގެ މެންބަރު އިބްރާހީމް ދީދީ ވަނީ ކިހާވަރެއްގެ ދަރަންޏެއް މި ސަރުކާރުން ދައްކަންޖެހޭތޯ ސުވާލު ކުރައްވައިފައެވެ. އެ ސުވާލަށް ޖަވާބުދެއްވަމުން ޒަމީރު ވިދާޅުވީ 124 ބިލިއަން ރުފިޔާގެ ދަރަނި ސަރުކާރާ ހަވާލުވިއިރު ދައްކަން ޖެހިފައި އޮތް ކަމަށެވެ. އޭގެ ތެރެއިން ދެބައިކުޅައެއްބައި އެއީ ނިމިދިޔަ އެމްޑީޕީ ސަރުކާރުގެ ފަސް އަހަރުގެ ދަރަނި ކަމަށް ޒަމީރު ވިދާޅުވިއެވެ.
ޒަމީރު ވިދާޅުވީ ދައްކަންޖެހޭ ތާރީޚުތަކަށް ދަރަނި ދައްކައި، ރައްޔިތުންނަށް ޚިދުމަތްދޭން މަސައްކަތްކޮށްފި ނަމަ އައިއެމްއެފްގެ ރިޕޯޓުގައި ބުނެފައި އޮތް ގޮތަށް ރާއްޖެ ބަނގުރޫޓުވެދާނެ ކަމަށެވެ.
"އެކަމަކު މިހާރު ރައީސް އެ ސިނާރިއޯއިން ރާއްޖެ ނެރެ، ރެވެނިއު ސްޓްރީމްތައް ރަނގަޅުކޮށް އޭގެ ޚަރަދުތައް ބަލަހައްޓާ، ދައްކަންޖެހޭ ބައެއް ދަރަނިތަކުގެ މުއްދަތު އިތުރުކޮށް، ރަހުމަތްތެރި ގައުމުތަކާއެކު މަސައްކަތްކޮށްގެން އެހުރިހާ ކަމެއް މިހާރު ހުރީ ހަމަޖެހިފަ،" ޒަމީރު ވިދާޅުވިއެވެ.
އަދި އައިއެމްއެފްއާ އެހެނިހެން ރޭޓިން އެޖެންސީތަކުން ވެސް ރާއްޖެ ބަނގުރޫޓުވާނެއޭ ކިޔައި ދެއްކި ވާހަކަތައް ދެއްކުން މިހާރު ހުއްޓިއްޖެ ކަމަށް ޒަމީރު ވިދާޅުވިއެވެ.
"އެހެންވީމަ ތި ވިދާޅުވި ސިނާރިއޯއިން އަޅުގަނޑުމެން މިތިބީ ގާތްގަނޑަކަށް ސަލާމަތްވެފައޭ އަޅުގަނޑު ދަންނަވާނީ. މިހާރު ހިޔެއް ނުވޭ އެއްވެސް ބަޔަކު ވާހަކަދައްކާހެނެެއް، ރޭޓިން އެޖެންސީތަކުން ވެސް ވާހަކަދެއްކިއިރު މިފަހުން ބުނެފަ ހުންނާނީ ޚަރަދުކުޑަކުރާށޭ ޚަރަދުކުޑަކުރާށޭ. އެހެންނަމަވެސް ރާއްޖެ ބަނގުރޫޓުވުމަށް ދިޔުމާ ދޭތެރޭ ވާހަކަދެއްކުން މިހާރު ހުއްޓިއްޖެ،" ޒަމީރު އިތުރަށް ވިދާޅުވިއެވެ.
އެއީ ރައީސް ޑރ. މުހައްމަދު މުއިއްޒުގެ ހަރުދަނާ ސިޔާސަތުތަކުގެ ސަބަބުން ކަމަށް ޒަމީރު ވިދާޅުވިއެވެ.
ރާއްޖޭގެ މާލީ ހާލަތު ގޯހުން ގޯހަށް ގޮސް، ސަރުކާރުން އަންނަނީ އާމްދަނީ އިތުރުކުރަން ފިޔަވަޅުތަކެއް އަޅަމުންނެވެ.
ރާއްޖޭގެ މާލީ ހާލަތު ގޯސްވެ، ބައިނަލްއަގުވާމީ އެންމެ ބޮޑު ދެ ރޭޓިން އެޖެންސީން ވަނީ ރާއްޖޭގެ ކްރެޑިޓް ރޭޓިން މި އަހަރު ދަށްކޮށްފައެވެ. އެ ގޮތުން، މޫޑީސްއިން ވަނީ ރާއްޖޭގެ ރޭޓިން 'ސީއޭއޭ2'އަށް ދަށްކޮށްފައެވެ. އޭގެ ކުރިން އޮގަސްޓު މަހުގެ 29 ގައި ފިޗުން ވެސް ވަނީ ރާއްޖޭގެ ރޭޓިން 'ސީސީ'އަށް ދަށްކޮށްފައެވެ.
ފާހަގަކޮށްލެވޭ ގޮތުގައި އަވައްޓެރި އިންޑިއާއާ އެކު ހެދި ކަރަންސީ ސްވޮޕް އެއްބަސްވުމާ އެކު ލިބުނު 400 މިލިއަން ޑޮލަރާ އެކު ރަސްމީ ރިޒާވް 614 މިލިއަން ޑޮލަރަށް ވަނީ އަރާފައެވެ. އެކަމަކު، ބޭނުންކުރެވޭ ރިޒާވް ހުރީ 31.5 މިލިއަން ޑޮލަރުގައެވެ.
ދަރަނި ނުދެއްކިދާނެކަމުގެ ބިރު ހީވެ، ބޭރުގެ މާލީ އިދާރާތަކުން ވަނީ އަވަސް އިސްލާހީ ފިޔަވަޅުތަކެއް އަޅަން ގޮވާލައިފައެވެ.