މީހަކަށް އަނިޔާއެއް ދޭނެކަމަށް ދޭހަވާގޮތަށް ވާހަކަ ދެއްކުމަކީ ޚިޔާލުފާޅުކުރުން ނޫން ކަމަށާއި، އެފަދަ މައްސަލަތައް ބަލާނެކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ.
ބިރުވެރިކަން އުފެދޭ ގޮތަށް އެކްސްގައި ޕޯސްޓު ކުރާ ކަމުގެ ތުހުމަތުގައި އެމްޑީޕީގެ އެކްޓިވިސްޓަކު ފުލުސް އޮފީހަށް ހާޒިރުވުމަށް ވަނީ އަންގާފައެވެ. https://sun.mv/199685
ފުލުހުން ޗިޓު ފޮނުވައިފައިވަނީ އެމްޑީޕީގެ ސޯޝަލް މީޑިއާ އެކްޓިވިސްޓު ހުސެއިން ޝާފިއު (ތުއްތު)އަށެވެ. މިކަމާ ނުރުހުން ފާޅުކޮށް އެމްޑީޕީގެ ޗެއާޕާސަން ފައްޔާޒް އިސްމާއީލް ވަނީ ޕޯސްޓެއް ކޮށްފައެވެ.
ފައްޔާޒަށް ރައްދުދެއްވައި އިހުސާން ކުރެއްވި ޕޯސްޓެއްގައި ވަނީ، "މަށަށް ކަލޭ މަގެއްމަތިން ނުފެއްނާތި!" މިފަދައިން ތުއްތުގެ ޕޯސްޓުގައި ވާކަމަށެވެ. މީހަކު މަގެއްމަތިން ފެނިއްޖެނަމަ އެމީހަކަށް ޖިސްމާނީގޮތުން ގެއްލުމެއް ދީފާނެކަމަށް ދޭހަވާގޮތަށް މި ޖުމްލައިގައި އޮތުމުން މިކަމުގެ ތަފުސީލު ހޯދާ މިކަން ސާފުކުރުމަކީ ކަމާބެހޭ އިދާރާތަކުން ކޮންމެހެން ކުރަންޖެހޭކަމެއް ކަމަށް އިހުސާނު ވަނީ ވިދާޅުވެފައެވެ.
"މާދަމާ މީހަކު މިފަދަ އިބާރާތެއް މަނިކުފާނަށް ނިސްބަތްކޮށް ނުވަތަ ދޭހަވާގޮތަށް ބުނެފިނަމަ އެއީ ޙިޔާލުފާޅުކުރީކަމަށް ބަލާ އަޅާނުލާ ތިބެންވީތޯ؟ އަދި އެހެން ތިއްބާ މަނިކުފާނު މަގެއްމަތިން ފެނި ޖިސްމާނީ އަނިޔާއެއް ދީފިނަމަ އެއީ ފާޅުކުރި ހިޔާލު އިތުރަށް ސާފުކޮށްދިނީކަމަށް ބަލާ އަޅާނުލާ ތިބެންވީތޯ؟ މިއީތޯ މަނިކުފާނުގެ ޒަޢާމަތެއްގައި މިގައުމުގައި ކަންކަން އޮންނާނެގޮތަކީ؟" އިހުސާނުގެ ޕޯސްޓުގައި ސުވާލު އުފައްދައިފައި ވެއެވެ.
މިސަރުކާރުން އެއްވެސް މީހަކު އިސްތިސްނާ ނުކޮށް އެމީހެއްގެ ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް އަޅާނެކަމުގެ ޔަގީންކަން އިހުސާނު ވަނީ ދެއްވާފައެވެ. ހަމައެއާއެކު ރާއްޖޭގެ ގާނޫނުތަކާއި ގަވާއިދުތަކުގެ އިމުގެތެރޭގައި ހިޔާލުފާޅުކުރެވޭނެ އެންމެ ފުޅާމިނަށް އެކަން ކުރެވޭނެ މަގު އަބަދުވެސް ހުޅުވިފައި އޮންނާނެ ކަމަށް ވެސް ލިޔުއްވާފައި ވެއެވެ.
"ކޮންމެ ކަމަކީ ސިޔާސީ ކުޅިވަރަކަށް ހެދުމަކީ ވަރަށް ޢައިރު ޒިންމާދާރު ކަމެއް،" އިހުސާނުގެ ޕޯސްޓުގައި ވެއެވެ.
ފައްޔާޒު މިއަދު އެކްސްގައި ކުރި ޕޯސްޓުގައި ވަނީ، ރައްޔިތުންގެ އަޑު ކަނޑުވާލައި، ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ ކަމަށެވެ.
"ހިޔާލާއި ފިކުރުގައި ތަޅެއް ނޭޅުވޭނެ. މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ،" އެ ޕޯސްޓުގައި ވެއެވެ.
ތުއްތުއަށް ފޮނުވި ޗިޓުގައި ބުނެފައި ވަނީ މިމަހުގެ އަށް ވަނަ ދުވަހުގެ 01:14 ގައި އޭނާގެ ހޭންޑަލްއިން ހަޑިހުތުރުބަސް ބޭނުންކޮށް ބިރުވެރިކަން އުފެދޭގޮތަށް އެކްސްގައި ޕޯސްޓްކޮށްފައި ވާކަމަށެވެ. ނަމަވެސް އޭނާ ކޮށްފައިވާ ޕޯސްޓުގެ ތަފްސީލު ފުލުހުން ހާމަކޮށްފައެއް ނުވެއެވެ.
އެ މައްސަލައިގައި އޭނާގެ ބަޔާންނެގުމަށް މާދާމާގެ 13:30 ގައި ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންއަށް ހާޒިރުވުމަށް އޭނާއަށް ފޮނުވާފައިވާ ޗިޓުގައި ވަނީ ބުނެފައެވެ.
މީގެ ކުރިން، ރައީސް ޑރ. މުޙައްމަދު މުއިއްޒުގެ އަބުރުފުޅަށް ހުތުރުވާ ގޮތަށް، ގދ. ގައްދޫ ކައުންސިލްގެ ރައީސް މުޙައްމަދު އަހުމަދު ވާހަކަދެއްކެވި މައްސަލައެއް ބަލައި، ފިޔަވަޅު އަޅަން ލޯކަލް ގަވަމަންޓް އޮތޯރިޓީ (އެލްޖީއޭ)އިން އަންގައިފައިވެއެވެ.
ގައްދޫ ކައުންސިލްގެ ރައީސަށް ފިޔަވަޅު އަޅަން އަންގައިފިއިތުރަށް ވިދާޅުވުމަށް
އެ މައްސަލައިގައި ވެސް އެމްޑީޕީން ނުރުހުން ފާޅުކޮށް، ސަރުކާރަށް ފާޑުކިޔައިފައިވެއެވެ.