އެމްޑީޕީގެ ސަރުކާރުގައި ކުރިއަށްގެންދިޔަ ބިންވެރިޔާ ސްކީމުން ނުހައްގުން ގޯތި ދީފައިވާ ކަމަށް ތުހުމަތު ކުރެވޭ މައްސަލައިގައި ފުލުހުން އަމަލުކުރި ގޮތުން ފެންނަނީ ސިޔާސީވެފައިވާ މަންޒަރު ކަމަށާއި އެ މައްސަލައިގެ އިންސާފުވެރި ތަހުގީގެއް ހިންގާނެ ކަމަށް ގަބޫލުނުކުރެވޭ ކަމަށް އެ ޕާޓީން މިއަދު ބުނެފިއެވެ.
ބިންވެރިޔާ ސްކީމްގެ މައްސަލައިގައި ފުލުހުން ވަނީ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އާއި ހައުސިން މިނިސްޓްރީގެ ކުރީގެއާއި މިހާރުގެ މުވައްޒަފުންނާ ވެސް ގުޅުމެއް ވޭތޯ ބަލާނެ ކަމަށް މީގެ ކުރިން ބުނެފައެވެ. އެ ތަހުގީގަށް ބައެއް މީހުންގެ ޕާސްޕޯޓް ހިފަހައްޓައިފައިވާއިރު އޭގެ ތެރޭގައި ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވެސް ހިމެނެއެވެ.
އެ ތަހުގީގާ ގުޅޭ ގޮތުން އެމްޑީޕީން މިއަދު ބޭއްވި ނޫސްވެރީންގެ ބައްދަލުވުމުގައި ވާހަކަދައްކަމުން ރައީސް އޮފީހުގެ ލީގަލް އެފެއާސްގެ ކުރީގެ އަންޑަ ސެކްރެޓަރީ އަޙްމަދު މައުރޫފް ވިދާޅުވީ މި މައްސަލައިގައި ފުލުހުން އަމަލުކުރަނީ މީގެ ކުރިން މިފަދަ މައްސަލަތަކުގައި އަމަލުކޮށްފައިވާ ގޮތަށް ނޫން ކަމަށެވެ.
މިހާތަނަށް މީގެ ކުރީން އަމަލު ކުރި ގޮތެއްވެސް ނޫންއެއީ ތަހުގީގަކަށް މީހަކު ހާޒިރުކުރީމަ ވަކިން ޚާއްސަކޮށް މިހާރު އަޅުގަނޑުމެން މި ވާހަކަ ދެކެވޭ މައްސަލައިގަ ތުހުމަތުކުރެވޭ ފަރާތް، ކަނޑައެޅިގެން ފޯޖުކޮށްގެން ރަސްމީ ލިޔުންތަކެއް ކަމަށް ދައްކަން ވެގެން އަމިއްލަޔަށް ލިޔުމެއް ހަދައިގެން ތަނަކަށް ހުށަހަޅައިގެން ގޯއްޗެއް ހޯދާފައި އޮތް މީހަކު ފުލުހުންގެ އިދާރާއަށް ގޮސްދޭ މައުލޫމާތަކީ ރަނގަޅު މައުލޫމާތެއް ކަމަށް ބަލައިގެން ފުލުހުން ރައްޔިތުންނަށް އެ މައުލޫމާތު ދިނުމަކީ މިއަދު ފާހަގަކުރެވޭ ކަމެއްރައީސް އޮފީހުގެ ލީގަލް އެފެއާސްގެ ކުރީގެ އަންޑަ ސެކްރެޓަރީ އަހުމަދު މައުރޫފް
އޭނާ ވިދާޅުވީ ކުށެއްގެ ތުހުމަތުގައި ގެންދާ މީހަކު ދޮގު ވެސް ހަދައިފާނެ ކަމަށާއި އެއީ ހަގީގަތެއް ކަމަށް ދެކިގެން ފުލުހުން އާންމުންގެ ތެރޭގައި އެ ވާހަކަ ދެއްކުމަކީ ކުށްވެރިކުރާ ކަމެއް ކަމަށެވެ.
މީގެ އިތުރުން އެ މައްސަލައިގައި އަކްރަމަށް ކުރާ ތުހުމަތުތަކަށް ވެސް އޭނާ އިޝާރާތް ކުރެއްވިއެވެ.
އެމްޑީޕީއިން މިއަދު ބޭއްވި ނޫސްވެރީންގެ ބައްދަލުވުމުގެ ތެރެއިން: މައުރޫފް ވިދާޅުވީ ބިންވެރިޔާގެ ތަހުގީގު ކުރިއަށްދާ ގޮތުން ފުލުހުން ސިޔާސީވެފައިވާކަން ހާމަވާ ކަމަށް ---
އެއީ އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދަށް ވެސް ނުހައްގުން ގޯއްޗެއް ލިބިފައިވާ ކަމަށް ތުހުމަތުކުރެވޭއިރު، އެ ގޯތީގެ ލިޔުން ދީފައިވަނީ އަކްރަމް ކަމަށް އޭނާ ތަހުގީގުގައި ވިދާޅުވެފައިވާ ކަމަށް ފުލުހުން ހާމަކުރުމާ ގުޅިގެންނެވެ.
މައުރޫފް ވިދާޅުވީ އެ މައްސަލައިގައި އަކްރަމާ ސުވާލުކޮށްފައިނުވާ ކަމަށާއި އަދި އަކްރަމް ހާޒިރުކުރި ނަމަ، އޭނާ ވެސް ދައްކަވާ ވާހަކައެއް ފުލުހުން އެގޮތަށް އާންމުންނާ ހިއްސާކުރާނެ ކަމާމެދު ސުވާލު އުފެދޭ ކަމަށެވެ.
މި މައްސަލައިގައި ފުލުހުން އަމަލުކުރި ގޮތުން އަޅުގަނޑުމެންނަށް އެނގޭ ފުލުހުން މިތިބީ ސިޔާސީ ގޮތުން ވަކި ކޮޅެއް ނަގާފައިކަންރައީސް އޮފީހުގެ ކުރީގެ ލީގަލް އެފެއާސްގެ އަންޑަ ސެކްރެޓަރީ އަހުމަދު މައުރޫފް
މީގެ އިތުރުން، އެ ތަހުގީގާ ގުޅޭ ގޮތުން މިދިޔަ ބުރާސްފަތި ދުވަހުގެ ރޭ ފުލުހުން ނޫސްވެރީންގެ ބައްދަލުވުން ބޭއްވިއިރު އެ ތުހުމަތުތައް ވުޖޫދުވާން މެދުވެރިވި ލިޔެކިޔުމާ ބެހޭ ފޮރެންސިކް ތަހުލީލުތައް ހަދައިފައިނުވާކަން އޭނާ ފާހަގަކުރެއްވިއެވެ.
މައުރޫފް ވިދާޅުވީ މި ޒަމާނުގައި ޑޮކިއުމެންޓަކާ ގުޅޭ މައްސަލައެއް ބަލާއިރު، ޝާމިލުވާ މީހުންނާ ސުވާލުކުރުމުގެ ބަދަލުގައި އަމަލުކުރާ ގޮތަކީ ޑޮކިއުމެންޓްގެ ސައްހަކަން ކަށަވަރު ކުރުން ކަމަށެވެ. އަދި އެކަން ކުރާނޭ ގޮތްތައް ފުލުހުންނަށް އެނގޭނޭކަން އޭނާ ވަނީ ފާހަގަކުރައްވައިފައެވެ.
މޯލްޑިވްސް ޕޮލިސް ސާވިސްގައި ހުރި ފޮރެންސިކް ލެބަކީ އެ ބޭފުޅުން ވިދާޅުވާ ގޮތުގައި މި އޭޝިއާ ސަރަހައްދުގައި ހުންނަ އެންމެ ފެންވަރު ރަނގަޅު ލެބޯޓްރީތަކުގެ ތެރެއިން ލެބޯޓްރީއެއް. މި މައްސަލައިގަ ފުލުހުން އަމަލުކުރި ގޮތަކީ ކަނޑައެޅިގެން ޑޮކިއުމެންޓެއްގެ ސައްހަކަމާމެދު ސުވާލު އުފެދިފައި އޮއްވައި އޭގެ ސައްހަ ކަމާމެދު ތަހުލީލެއް ހެދުމެއްނެތި އެ ޑޮކިއުމެންޓާ ގުޅޭ ގޮތުން ވާހަކަ ދެއްކީރައީސް އޮފީހުގެ ކުރީގެ ލީގަލް އެފެއާސްގެ އަންޑަ ސެކްރެޓަރީ އަހުމަދު މައުރޫފް
ފޮރެންސިކް ތަހުލީލުތަކުން ލިޔެކިޔުންތަކާ ގުޅޭ ވަރަށް ގިނަ ކަންކަން އެނގޭނެކަން ފާހަގަކުރައްވައި އޭނާ ވިދާޅުވީ އޭގެ ތެރޭގައި ކަރުދާހުގެ އުމުރާއި މީހަކު ސޮއިކޮށް ނުވަތަ އަތުލިޔުމުން ލިޔެފައި ވާނަމަ އެ ލިޔެފައިވާ ފަރާތްވެސް ދެނެގަނެވޭނެ ކަމަށެވެ.
އެހެން ނަމަވެސް އެކަން ނުކުރައްވާ އެރެއިން އެރެއަށް އެއްޗެއް ބުނަންޖެހިގެން ސިޔާސީގޮތުން ނިއުސް ކޮންފަރެންސްއެއް ބާއްވާ އެ ވާހަކަތައް ދެއްކިކަމަށް އަޅުގަނޑުމެންނަށް މި ގަބޫލުކުރެވެނީ. އެހެންވީމަ މިކަމުގައި ފުލުހުން ދެން އިންސާފުވެރި ތަހުގީގެއް ހިންގަފާނެ ކަމަކަށް އަޅުގަނޑުމެން ދެން ގަބޫލުކުރާކަށް ބޭނުމެއް ނޫން. ރައީސް އޮފީހުގެ ކުރީގެ ލީގަލް އެފެއާސްގެ އަންޑަ ސެކްރެޓަރީ އަހުމަދު މައުރޫ
މައުރޫފް ވިދާޅުވީ ސުވާލު އުފެދިފައިވާ ޑޮކިއުމެންޓްގެ ރަނގަޅު ފޮރެންސިކް ތަހުގީގެއް ހެދުމަށްފަހު އޭގެ ރިޕޯޓް ހާމަކުރަން ފުލުހުންނަށް ނުކުރޭނެ ކަމަށެވެ.
ބިންވެރިޔާ ސްކީމުގެ ލިސްޓުގައި ޝަރުތު ހަމަނުވާ މީހެއްގެ ގޮތުގައި އޮތް ފަޒީލް، އަކްރަމާ ބައްދަލު ކުރިކަމަށް ފުލުހުން ބުނި ވާހަކަ އޭނާ ވަނީ ދޮގުކުރައްވައިފައެވެ.
އެ މައްސަލައިގައި ފަޒީލާއި ފަޒުލްގެ ވެސް ޕާސްޕޯޓް ވަނީ މުއްދަތެއް ނެތް ގޮތަށް ހިފަހައްޓައިފައެވެ.
މީގެ އިތުރުން އެ މައްސަލައިގެ ތަހުގީގު ކުރިއަށްދާތީ ފަޒުލްއާއި އެޗްޑީސީގެ ގިނަ ބޯޑު މެންބަރުންނާއި ބައެއް އިސް މުވައްޒަފުން ވެސް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން ސަސްޕެންޑުކޮށްފައިވާއިރު، އެމްޑަބްލިއުއެސްސީގެ ބޯޑުން ވަނީ ފަޒީލް ސަސްޕެންޑުކޮށްފައެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ވެރިކަމުގައި އިއުލާން ކުރެއްވި ބޯހިޔާވަހިކަމުގެ ދެ މަޝްރޫއު ކަމަށްވާ ބިންވެރިޔާއާއި ގެދޮރުވެރިޔާ ސްކީމް ވެސް ތަހުގީގު ކުރުމަށް ޕްރޮސެކިއުޓާ ޖެނެރަލް އައްބާސް ޝަރީފް ވަނީ ފުލުހުންނާއި އެންޓި ކޮރަޕްޝަން ކޮމިޝަނަށް އަމުރުކުރައްވައިފައެވެ.
ބިންވެރިޔާ ސްކީމުން ގޯތި ދޫކުރަން ނިންމައިފައިވަނީ ހުޅުމާލެއާއި ގުޅީފަޅާއި ގިރާވަރުފަޅުންނެވެ. އޭގެ ތެރެއިން ހުޅުމާލެ ދެވަނަ ފިޔަވަހިން ދޫކުރަން ޖެހޭ ގޯތިތައް ދޫކޮށް ނިމިފައިވާ ކަމަށް މި ސަރުކާރުގެ ހައުސިން މިނިސްޓްރީން ބުނެފައިވެއެވެ.
ގެދޮރުވެރިޔާ ސްކީމުން ފްލެޓު ދޫކުރުމުގައި ގޯސްތަކެއް ހަދައިފައިވާ ކަމަށް ބުނެ އޭސީސީން އެކަން ބަލައި، މައްސަލަ ހުރި ފޯމުތައް މުރާޖާކުރުމަށް ފަހު ފުލެޓުތައް ދޫކުރުމަށް މިދިޔަ ފެބްރުއަރީ މަހު ވަނީ އަންގައިފައެވެ. އޭގެ ފަހުން ފުލެޓު ލިސްޓު އިއުލާންކުރަން މި ސަރުކާރުން އެކި ތާރީޚުތައް ދިން ނަމަވެސް އަދިވެސް އެ ލިސްޓު ހާމަކުރެވިފައިނުވެއެވެ.