ގާނޫނުއަސާސީއަށް ހަވަނަ އިސްލާހު ގެނައުމުގެ ބިލު އިއްޔެ ރައްޔިތުންގެ މަޖިލީހަށް ހުށަހަޅައި، އިއްޔެ ފާސްކޮށް ތަސްދީގުކުރެއްވީ ރިކޯޑު ސްޕީޑެއްގައިތޯ ކުރީގެ ރައީސް މައުމޫން އަބްދުލްގައްޔޫމް މިއަދު ސުވާލު އުފައްދަވައިފިއެވެ.
ގާނޫނުއަސާސީ އިސްލާހުކުރަން ސަރުކާރުން ހުށަހެޅީ އިއްޔެއެވެ. ހެނދުނު މަޖިލީހުގައި ފުރަތަމަ ކިޔުން އިއްވައި އެ ބިލު ބަލައިގަތެވެ. މެންދުރު ފަހު، ވީހާ ވެސް އަވަހަށް ބިލުގެ މަސައްކަތް ނިންމަން މުޅި މަޖިލީހުގެ ކޮމިޓީއަށް ފޮނުވައި މެންދުރު ފަހު ކޮމިޓީގެ މަސައްކަތް ނިންމައިލިއެވެ. ތަޅުމުން ހަވީރު ބިލު ފާސްކުރިއިރު އިރުއޮއްސުނުއިރު ރައީސް ޑރ. މުހައްމަދު މުއިއްޒު ވަނީ ބިލު ތަސްދީގުކުރައްވައި، ގެޒެޓުކުރައްވާފައެވެ.
އެ ކަމާ ގުޅިގެން މައުމޫން މިއަދު އެކްސްގައި ކުރެއްވި ޕޯސްޓެއްގައި ވަނީ ގާނޫނުއަސާސީއަށް އިސްލާހު ހުށަހަޅައި ފާސްކުރީ ހަ ގަޑިއިރުން ކަމަށް ވިދާޅުވެފައެވެ. އެއީ، ދުނިޔޭގެ ރިކޯޑެއްތޯ އެ މަނިކުފާނު ސުވާލު އުފެއްދެވިއެވެ.
މިހާރު އަމަލުކުރާ ގާނޫނުއަސާސީ ތަސްދީގުކުރެއްވި ރައީސް މައުމޫން އެ ފަދައިން ސުވާލު އުފެއްދެވީ ކުއްލިއަކަށް ގާނޫނުއަސާސީ އަވަސް އަރުވާލައިގެން އިސްލާހުކުރި ކަމަށް ބުނެ، އިދިކޮޅު ފަރާތްތަކުން ކަންބޮޑުވުން ފާޅުކުރަމުން އަންނަ ދަނޑިވަޅެއްގައެވެ.
ފާހަގަކޮށްލެވޭ ގޮތުގައި ގާނޫނުއަސާސީ އިސްލާހުކުރުމަކީ ތަހުޒީބީ ގިނަ ގައުމުތަކުގައި ވަރަށް ގިނަ ވަގުތުން ނޫނީ ނުކުރެވޭ ކަމެކެވެ. ރާއްޖޭގެ ނިޒާމު އެކުލަަވައިލިއިރުގައި މިސާލަކަށް ބެލި އެމެރިކާ ފަދަ ގައުމުތަކުގައި ވެސް އޮންނަނީ އެ ފަދައިންނެވެ.
ސަރުކާރުން އިއްޔެ ގާނޫނުއަސާސީއަށް ގެނައި މައިގަނޑު އިސްލާހުތަކަކީ:
- ވަކި ޕާޓީއަކުން ހޮވޭ މެންބަރަކު ޕާޓީން ވަކިވުން، ޕާޓީން ވަކިކުރުން ނުވަތަ އެހެން ޕާޓީއަކާ ގުޅުން
- މަޖިލީހުުގެ މެންބަރަކު ޕާޓީ ބަދަލުކުރުން، ޕާޓީން ވަކިވުން، ނުވަތަ ވަކިކުުރުން
- އަމިއްލަ ގޮތުން އިންތިޚާބުވީ މެންބަރަކު ސިޔާސީ ޕާޓީއަކާ ގުޅުން
އެ އިސްލާހުތަކާ ގުޅިގެން އެމްޑީޕީން އަންނަނީ ކަންބޮޑުވުން ފާޅުކުރަމުންނެވެ. އެ ގޮތުން، އެއީ ގާނޫނުއަސާސީގެ މައިގަނޑު އަސާސްތަކާ ފުށުއަރާ ގޮތަށް ފާސްކޮށްފައިވާ އިސްލާހުތަކެއް ކަމަށް އެ ޕާޓީން އަންނަނީ ތުހުމަތުކުރަމުންނެވެ.
އެ އިސްލާހުތަކުގެ މައްސަލަ ސުޕްރީމް ކޯޓަށް ހުށަހަޅަން ވެސް ކުރީގެ ބަންޑާރަނައިބު ފާތިމަތު ދިޔާނާ ސައީދު ވަނީ ގޮވާލައްވާފައެވެ.
އެކަމަކު، ގާނޫނުއަސާސީއަށް ގެނައި އިސްލާހުތަކަކީ ރައްޔިތުންގެ ހައްގުގައި ގެނެވުނު ހެޔޮ ބަދަލުތަކެއް ކަމަށް ރައީސް މުއިއްޒު ވަނީ ވިދާޅުވެފައެވެ. އެހާ އަވަސް މުއްދަތެއްގައި އެ އިސްލާހުތައް ގެނައުމުން އެ މަނިކުފާނު ވަނީ މަޖިލީހުގެ މެންބަރުންނަށް ޝުކުރު އަދާކުރައްވާފައެވެ.
މިހާރު އަމަލުކުރާ ފެހި ގާނޫނުއަސާސީ އެކުލަވައިލުމުގެ މަސައްކަތް ފެށީ މައުމޫންގެ 30 އަހަރުގެ ވެރިކަމުގެ ފަހު ދައުރުގައެވެ. އާ ގާނޫނުއަސާސީ ތަސްދީގުކުރީ އޮގަސްޓް 7، 2008 ގައެވެ.