ކުރިއަށް އޮތް 20 އަހަރަށް ކަނޑައަޅާ ތަރައްގީގެ މާސްޓާޕްލޭން އެކުލަވައިލުމުގެ މަސައްކަތް ފެށުމަށް, މުޅި ރާއްޖެ ޝާމިލުވާ ގޮތަށް ހަރަކާތެއް ބާއްވާނެ ކަމަށް ސަރުކާރުން ބުނެފިއެވެ.
ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި އިޝާރާތް ކުރެއްވީ، މާސްޓާޕްލޭންގެ މަސައްކަތް ރަސްމީކޮށް ފެށުމަށް އަގު ބޮޑު ރަސްމިއްޔާތެއް އަންނަ ހަފުތާގައި ބާއްވަން ނިންމައިފައިވާ ކަމަށް ބުނެ އޮންލައިން ނޫހަކުން ރިޕޯޓުކޮށްފައިވާ ޚަބަރަކަށެވެ.
އެ ޚަބަރާ ގުޅުވައި ހީނާ ވިދާޅުވީ އެ ހަފުލާއަކީ މުޅި ރާއްޖެ ޝާމިލުވާގޮތަށް ހިންގަން ރާވައިފައިވާ ހަފުލާއެއް ކަމަށެވެ. އެ ނޫހަށް ދޮގު މައުލޫމާތު ފަތުރާ ކަމަށް ވެސް އޭނާ ތުހުމަތު ކުރެއްވިއެވެ.
"މިނިވަން ނޫސްވެރިކަމުގެ ޓެގް އަޅުވައިގެން މި ގައުމުގައި ދޮގު މަޢުލޫމާތު ފަތުރާ، ފިތުނަ ފަސާދަ އުފެއްދުމަށް މަސައްކަތް ނުކުރުމަށް އިލްތިމާސްކުރަން،" ހީނާ ވިދާޅުވިއެވެ.
ރައީސް ޑރ. މުޙައްމަދު މުއިއްޒުގެ މެނިފެސްޓޯގައި ހިމަނުއްވާފައިވާ، ރާއްޖޭގެ 20 އަހަރުގެ ތަރައްގީގެ ޕްލޭން ހެދުމުގެ މަސައްކަތް ފަށަން ސަރުކާރުން ތައްޔާރުވެފައިވާ ކަމަށް މިދިޔަ މަހު އެ މަނިކުފާނު ވަނީ ވިދާޅުވެފައެވެ.
ރައީސް ވިދާޅުވީ އެ ޕްލޭންގެ މަސައްކަތް ކުރިއަށްގެންދާނީ ރައްޔިތުންގެ ފުރިހަމަ ބައިވެރިވުން ހިމެނޭ ގޮތަށް ކަމަށާއި އެގޮތުން ހުރިހާ ޕާޓީތަކާއި ޖަމިއްޔާ ޖަމާއަތްތަކާއި އެކިއެކި ސްޓޭކްހޯލްޑަރުންނާއި މާހިރުންގެ މަޝްވަރާ ހޯދާނެ ކަމަށެވެ.
އެ ޕްލޭނަކީ ރައީސް ވައުދުވެވަޑައިގެންފައިވާ ގޮތަށް، ގާނޫނީ ބާރުވެރިކަމާއި ހިމާޔަތް ލިބިފައިވާ ޕްލޭނަކަށް ހެދުމަށް ޓަކައި އެކަމަށް ޚާއްސަކޮށް ގާނޫނެއް ހަދާނެ ކަމަށް ވެސް ރައީސް ވިދާޅުވެފައިވެއެވެ.
އެއަށްފަހު، މިމަހުގެ ތިން ވަނަ ދުވަހު ހައުސިން މިނިސްޓްރީން ވަނީ މި މާސްޓާޕްލޭން ހަދަން އޮސްޓްރޭލިއާގެ އެހީ ހޯދުމަށް އެމްއޯޔޫއެއްގައި ސޮއިކޮށްފައެވެ.
އެ އެއްބަސްވުމުގެ ދަށުން، މާސްޓާޕްލޭން އެކުލަވާލުމުގައި އެހީވާން އޮސްޓްރޭލިއާ ސަރުކާރުން ވަނީ 90،000 އޮސްޓްރޭލިއަން ޑޮލަރު ނުވަތަ 9.4 މިލިއަން ރުފިޔާ ދީފައެވެ.