ކުރިއަށް އޮތް 20 އަހަރުގެ ތަރައްގީގެ ޕްލޭން އެކުލަވާލުމަށް ބޭނުންވާ އެހީތެރިކަން ފޯރުކޮށްދިނުމަށް ރާއްޖެއާއި އޮސްޓްރޭލިއާއާ ދެމެދެ ފަހުމުނަމާއެއްގައި މިއަދު ސޮއިކޮށްފިއެވެ.
ހައުސިން މިނިސްޓްރީގައި ބޭއްވި ރަސްމިއްޔާތެއްގައި، އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ހައުސިން މިނިސްޓަރު ޑރ. އަލީ ހައިދަރެވެ. އޮސްޓްރޭލިއާ ސަރުކާރުގެ ފަރާތުން ސޮއިކުރެއްވީ އެގައުމުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ޑޭވިޑް ޖޭސަފެވެ.
މިނިސްޓަރު ހައިދަރު ނޫސްވެރިންނަށް މައުލޫމާތު ދެއްވަނީ: ކުރިއަށް އޮތް 20 އަހަރުގެ ތަރައްގީގެ ޕްލޭން އެކުލަވާލުމަށް އޮސްޓްރޭލިއާއިން އެހީވަނީ --- ސަން ފޮޓޯ/ އަމަން ލަތީފް
މި ރަސްމިއްޔާތުގައި ވާހަކަދައްކަވަމުން މިނިސްޓަރު ހައިދަރު ވިދާޅުވީ، ޕްލޭން ހެދުމަށް މައުލޫމާތު އެއްކުރާނީ އެއްވެސް ބަޔަކު ބާކީ ނުވާ ގޮތަށް ކަމަށާއި މައުލޫމާތު އެއްކުރުމަށާއި ދިރާސާ ކުރުން މުޅި ރާއްޖޭގެ އެކި ކަންކޮޅުތަކުގައި ކުރިއަށް ދާނެ ކަމަށެވެ.
ރައްޔިތުން ބޭނުންވާފަދަ ދިވެހިންގެ ރާއްޖެއެއް ހޯދުން ހަގީގަތަކަށް ހަދައިދެއްވާނެ ކަމަށް ހައިދަރު ވިދާޅުވެފައިވެއެވެ.
މީގެއިތުރުން، ރާއްޖޭގެ ތަރައްގީއަށް ކުރިއަށް ގެންދާ މިފަދަ މުހިންމު މަސައްކަތްތަކަށް އޭހީތެރިކަން ފޯރުކޮށްދޭތީ މިނިސްޓަރު ހައިދަރު ވަނީ އޮސްޓްރޭލިއާ ސަރުކާރަށް ޝުކުރު އަދާކުރައްވާފައެވެ.
ސަފީރު ޑޭވިޑް: ކުރިއަށް އޮތް 20 އަހަރުގެ ތަރައްގީގެ ޕްލޭން އެކުލަވާލުމަށް އޮސްޓްރޭލިއާއިން އެހީވަނީ ----- ސަން ފޮޓޯ/ އަމަން ލަތީފް
މި އެއްބަސްވުމުގެ ދަށުން ރާއްޖޭގެ ކުރިއަށް އޮތް 20 އަހަރުގެ ތަރައްގީގެ ޕްލޭން އެކުލަވާލަން އެހީވާން އޮސްޓްރޭލިއާ ސަރުކާރުން ވަނީ 90،000 އޮސްޓްރޭލިއަން ޑޮލަރު ނުވަތަ 9.4 މިލިއަން ރުފިޔާ ދީފައެވެ.
މި ރަސްމިއްޔާތުގައި ސަފީރު ޑޭވިޑް ވިދާޅުވީ، މި ޕްލޭން އެކުލަވާލުމަށް ހުރިހާ ގޮތަކުން އެހީތެރިކަން ފޯރުކޮށްދޭނެ ކަމަށެވެ. އެގޮތުން، ފަންނީ ލަފާދިނުމާއި، އިޤްތިޞާދު، ތިމާވެށި، އިޖުތިމާޢީ އަދި ސްޕޭޝަލް ޕްލޭނިންގެ ދާއިރާއިން އެހީތެރިކަން ދޭނެކަން ސަފީރު ފާހަގަކުރައްވާފައިވެއެވެ.
މިދިޔަ މަހުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ ކުރިއަށް އޮތް 20 އަހަރުގެ ތަރައްގީގެ ޕްލޭން އެކުލަވާލުމަށް ނިންމި ކަން އިއުލާނު ކުރައްވާފައެވެ.