ސަރުކާރުގެ މަތީ މަގާމުތަކަށް މީހުން އައްޔަން ކުރަނީ ކޮރަޕްޝަން ހިންގައި ވައްކަން ކުރަން ނޫންކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު "ސަންގު"އަށް ދެއްވި ޚާއްސަ އިންޓަވިއުއެެއްގައި ރައީސް ވިދާޅުވީ، މަގާމުތަކަށް މީހުން އައްޔަން ކުރަނީ ގަވާއިދާ ޚިލާފު ކަންކަން ކުރާކަށް ވެސް ނޫންކަމަށެވެ. އޭގެ ބަދަލުގައި މަގާމުތަކަށް އައްޔަންކުރާ މީހުންގެ ޒިންމާއަކީ އަމާނާތްތެރިކަމާއެކު ރައްޔިތުންނަށް ޚިދުމަތް ކުރުން ކަމަށް ރައީސް ވިދާޅުވިއެވެ.
"އެހެންވީމައި އެކަމަށް ހުރަސްއެޅޭ ގޮތަކަށް ނޫނީ އެނޫން ގޮތަކަށް ކަމެއް ކުރާކަމަށް ގަބޫލު ކުރެވޭ ނަމަ އަޅުގަނޑު އެމީހަކު އެތަނުން ދުރުކުރާނަން ނޫނިއްޔާ އެކަން ހުއްޓުވާނަން،" ރައީސް ވިދާޅުވިއެވެ.
ރައީސް ވިދާޅުވީ ކުރިއަށް އޮތް ތަނުގައި ވެސް ވައްކަމާއި ކޮރަޕްޝަންގެ ހާލަތްތަކުގައި އަމަލުކުރާނީ މިފަދައިން ކަމަށެވެ.
ކުރީ ސަރުކާރުތަކުން އެފަދައިން އަމަލު ނުކުރީ ކީއްވެގެން ކަން ނޭންގޭ ކަމަށާއި ނަމަވެސް، މި ސަރުކާރުން ކޮރަޕްޝަނަށް ޖާގަ ކުދޭނެކަން ރައީސް ވަނީ ތަކުރާރުކޮށް ފާހަގަކުރައްވާފައެވެ.
"މިނިސްޓްރީއެއްގައި ވިޔަސް ކުންފުންޏެއްގައި ވިޔަސް މުއައްސަސާއެއްގެ ތެރޭގައި ވިޔަސް، ދައުލަތުގެ މުއައްސަސާއެއްގައި ވެސް އެކަހަލަ ކަމެއް ހިނގަންޔާ އަޅުގަނޑު ހަމަ އެދެން އޭސީސީއާ ދެން ހުރި ތަންތަނުން ކަމާބެހޭ ފަރާތްތަކުން އެކަންކަން ބަލަން،" ރައީސް ވިދާޅުވިއެވެ.
ރައީސް މިފަދައިން ވިދާޅުވީ، މިދިޔަ ސަރުކާރުން ހިންގި ބިންވެރިޔާ ސްކީމުގެ ދަށުން ނުހައްގުން ގޯތިތަކެއް ދިން މައްސަލަ ފެންމަތިވެފައި ވަނިކޮށެވެ. މި މައްސަލަތަކުގައި އެންމެ ބޮޑު ތުހުމަތެއް އަމާޒުވަނީ އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދަށެވެ. ނުހައްގުން ގޯތި ލިބުނު މީހުންގެ ތެރޭގައި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު ވެސް ހިމެނެވެ.
މި މައްސަލަ ފެންމަތިވެފައި އޮއްވައި އިިއްޔެ ވަނީ ފްލެޓު އެޅުމުގެ ނަމުގައި ސީލައިފް ގްލޯބަލްއިން ހިންގި ސްކޭމްގައި ގެއްލުންވި މީހުންނަށް ވިނަރެސް ފުލެޓުތަކެއް ދޭން އެންގުމުން، ސީލައިފަށް ފައިސާ ދެއްކި ކަމުގެ ފޭކު ލިޔުންތަކެއް ހަދައިގެން ވިނަރެސް ފުލެޓުތަކެއް ދީފައިވާކަން ވެސް ހާމަވެފައެވެ.
މި ކަންކަން ކަމާބެހޭ އިދާރާތަކުން ތަހުގީގުކުރަމުން ދަނިކޮށް ރޭ ފަޒުލް ވަނީ އިސްތިއުފާ ދެއްވައިފައެވެ. އަދި އެޗްޑީސީގެ މެނޭޖިން ޑިރެކްޓަރުގެ މަގާމަށް ކުރީގެ މިނިސްޓަރު މުޙައްމަދު މައުރޫފް ޖަމީލް މިއަދު ވަނީ އައްޔަން ކުރައްވައިފައެވެ.
މައުރޫފާ ގުޅިގެން ރައީސް މިއަދު ވިދާޅުވީ، އެއީ ރައީސް ފުރިހަމައަށް އިތުބާރު ކުރައްވާ ބޭފުޅެއް ކަމަށެވެ.