ގާނޫނުއަސާސީން ރައްޔިތުންނަށް ކަށަވަރުކޮށްދީފައިވާ އެތައް ހައްގުތަކެއް ސަރުކާރުން ނިގުޅައިގަންނަމުންދާ ކަމަށް ތުހުމަތުކޮށް އިދިކޮޅު އެމްޑީޕީން މިއަދު ވެސް މުޒާހަރާކުރަން ފަށައިފިއެވެ.
ހައްގުތައް ނިގުޅައިގަނެ، ޚުދުމުޚުތާރު ވެރިކަމެއް ކުރައްވަން ރައީސް ޑރ. މުހައްމަދު މުއިއްޒު އުޅުއްވާ ކަމަށް އެމްޑީޕީން އަންނަނީ ތުހުމަތުކުރަމުންނެވެ.
ރައްޔިތުންގެ މަޖިލީސް ހުންނަ ސަރަހައްދުގައި 'ޑިމޮކްރެޓިކް ނިޒާމު ފުނޑާލަނީ' ނަމުގައި އެމްޑީޕީން އަންނަނީ މުޒާހަރާކުރަމުންނެވެ. އެ މުޒާހަރާގައި އެ ޕާޓީގެ އާންމު މެންބަރުންނާ އެކު އެ ޕާޓީއަށް ނިސްބަތްވާ މަޖިލީސް މެންބަރުން ވެސް ބައިވެރިވެލައްވައެވެ.
މުޒާހަރާގެ ތެރެއިން ވާހަކަދައްކަވަމުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވީ، މި ސަރުކާރުން މި އަހަރަށް 55 ބިލިއަން ރުފިޔާ، ސަޕްލިމެންޓަރީ ބަޖެޓާ އެކު ފާސްކޮށްފައިވާއިރު އެ ފައިސާ ޚަރަދުކުރަނީ ކޮން ކަމަކަށްކަން ބުނެ ނުދެވޭ ކަމަށެވެ.
އެމްޑީޕީން ކުރާ މުޒާހަރާގެ ތެރެއިން: އެ ޕާޓީގެ މަޖިލީސް މެންބަރުން ވަނީ ރައްޔިތުންނަށް މަގުތަކަށް ނުކުންނަން ގޮވާލައްވާފައި -- ސަން ފޮޓޯ/ މޫސާ ނަދީމް
އެއީ، ރައްޔިތުންނަށް ދެވޭ ވަރަށް ބޮޑު އަނިޔާއެއްގެ ގޮތުގައި އޭނާ ވަނީ ސިފަކުރައްވައިފައެވެ.
"މިއީ ރައްޔިތުން ގޭގައި ބަލަން ތިބޭ ވަރަށްވުރެ މާ ނުރައްކާތެރި ހާލަތެއް،" ނުރުހުން ފާޅުކުރައްވަމުން މައުރޫފް ޒާކިރު ވިދާޅުވިއެވެ.
"މި ވަރުގެ ބޮޑު އަނިޔާއެއް ރައްޔިތުންނަށްވަމުންދާއިރު ދިވެހި ރައްޔިތުން މަޑުން ނުތިބޭ،"
އޭނާ ވިދާޅުވީ، ރައްޔިތުން އެމްޑީޕީއާ ގުޅިގެން މި ސަރުކާރު ހަމަ މަގަށް އަޅުވަން މަގުތަކަށް އެއްވާންޖެހޭ ކަމަށެވެ. ރައްޔިތުންގެ ބާރު އޮތްކަން ސަރުކާރަށް ދައްކަން ޖެހޭ ކަމަށާއި އެކަން ކުރެވޭނީ އެމްޑީޕީއާ އެކު މަގުތައް މައްޗަށް ނުކުމެގެން ކަމަށް އޭނާ ވިދާޅުވިއެވެ.
މީގެ އިތުރުން، އެއްވުމުގައި ވާހަކަދައްކަވަމުން މަރަދޫ ދާއިރާގެ މެންބަރު އަހުމަދު ދީދީ ވިދާޅުވީ، މި ސަރުކާރުން ގެންދަނީ ރައްޔިތުންނަށް ގާނޫނުއަސާސީން ލިބިދީފައިވާ އެތައް ހައްގުތަކެއް ހަނިކޮށް، ހުރަސް އަޅަމުން ކަމަށެވެ.
އެމްޑީޕީން ކުރާ މުޒާހަރާގެ ތެރެއިން: އެ ޕާޓީން ބުނީ ރައީސް މުއިއްޒު ޚުދުމުޚުތާރު ވެރިކަމެއް ކުރައްވަން އުޅޭ ކަމަށް -- ސަން ފޮޓޯ/ މޫސާ ނަދީމް
އެހެންވެ، އެ ފަދަ ޚުދުމުޚުތާރު ކަންކަން ކުރާއިރު ރައްޔިތުން ބަލަން ތިބުމަކީ ގޮތެއް ނޫން ކަމަށް ވިދާޅުވެ، އޭނާ ވެސް ވަނީ ރައްޔިތުންނަށް މަގުތައްމައްޗަށް ނުކުމެ މުޒާހަރާކުރަން ގޮވާލައްވައިފައެވެ.
"ދިވެހި ރައްޔިތުންނަށް ލިބިފައިވާ ހައްގުތައް ނިގުޅައިގަންނަ މަންޒަރު ބަލަން އަޅުގަނޑުމެން ތިބެގެން ނުވާނެ،" އަހުމަދު ދީދީ ކަންބޮޑުވުން ފާޅުކުރެއްވިއެވެ.
އެމްޑީޕީ ސަރުކާރުގައި ހިންގި ގެދޮރުވެރިޔާ ސްކީމާއި ބިންވެރިޔާ ސްކީމްގެ ދަށުން ގޯއްޗާއި ފުލެޓު ލިބުނު ފަރާތްތަކަށް އެ ތަންތަން ހަވާލުނުކުރާ ކަމަށް ބުނެ މި މަހުގެ 21 ވަނަ ދުވަހު ވެސް އެމްޑީޕީން ވަނީ މުޒާހަރާކޮށްފައެވެ.
އެ ގޯތިތައް ހަވާލުކުރަން ގުރުނެގި ގޮތާ މެދު ކަންބޮޑުވުން ފާޅުކޮށް، އެމްޑީޕީން މިއަދު މަޖިލީހަށް ކުއްލި މައްސަލައެއް ވެސް ހުށަހެޅިއެވެ. އެކަމަކު، ސަރުކާރު ހިންގާ ޕީއެންސީގެ މެޖޯރިޓީ އޮންނަ މަޖިލީހުން ވަނީ އެ މައްސަލަ ބޭރުކޮށްލައިފައެވެ.