ގިނަ އައިސްޕްލާންޓުތައް ހުއްޓިފައިވާ ކަމަށާއި އެކަން އެގޮތަށް ދިމާވީ މިދިޔަ އެމްޑީޕީ ސަރުކާރުން އައިސްޕްލާންޓްތައް ހިންގަން ފެނަކައާ ހަވާލުކުރުމުން ކަމަށް ފިޝަރީޒް މިނިސްޓަރު އަހުމަދު ޝިިޔާމް މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހޯރަފުށި ދާއިރާގެ މެންބަރު އަލީ މޫސާ ކުރެއްވި ސުވާލަށް ޖަވާބުދެއްވާ މިނިސްޓަރު ޝިޔާމް ވިދާޅުވީ, ގިނަ އައިސްޕްލާންޓްތައް ނުހިނގައި ހުއްޓިފައިވާ ކަމަށެވެ.
އެކަން އެގޮތަށް ދިމާވީ މިދިޔަ ސަރުކާރުން ފެނަކަ ކުންފުންޏާ އައިސްޕްލާންޓުތައް ހަވާލުކުރުމުން ކަމަށާއި އެ ކުންފުންޏަކީ އައިސްޕްލާންޓު ހިންގުމަށް ގާއިމުކޮށްފައިވާ ކުންފުންޏެއް ނޫން ކަމަށް ޝިޔާމް ވިދާޅުވިއެވެ. އެ އައިސްޕްލާންޓްތައް ހިންގުމަށް ބޭނުންވާ ފައިސާއެއް ވެސް އެ ކުންފުނީގައި ނެތް ކަމަށް ޝިޔާމް ވިދާޅުވިއެވެ.
ފެނަކައަކީ މީ އައިސްޕްލާންޓު ހިންގަން އޮންނަ ކުންފުންޏެއް ނޫން. ފެނަކައިގެ މައިގަނޑު މަސައްކަތަކީ ރައްޔިތުންނަށް ކަރަންޓު ދިނުން. ދެން ބައެއް ރަށްރަށުގައި އެބަހުރި ނަރުދަމާގެ މަސައްކަތްތަކާ ހަވާލުވެފައި. ފެނަކައިގައި އައިސްޕްލާންޓުގެ ޓެކްނިކަލް ކަންކަން ކުރާނެ މީހުން ނެތުމާ އެކު އައިސްޕްލާންޓުގެ ކަންކަން ހުރީ އޮޕަރޭޝަންގައެއް ނޫން، ފިޝަރީޒް މިނިސްޓަރު އަހުމަދު ޝިިޔާމް
ޝިޔާމް ވިދާޅުވި ގޮތުގައި މި ސަރުކާރު ވެރިކަމަށް އައިސް ޖެހުނީ ސަރުކާރު މަސް ކުންފުނި، މިފްކޯއާ ގުޅިގެން އައިސްޕްލާންޓްތައް އޮޕަރޭޝަނަށް ގެންނަން މަސައްކަތްތަކެއް ކުރަން ކަމަށެވެ. އެގޮތުން، މިހާތަނަށް ކުރި މަސައްކަތުން ބައެއް އައިސްޕްލާންޓުތައް އޮޕަރޭޝަނަށް ގެނެވިފައިހުރި ކަމަށް ވިދާޅުވިއެވެ.
މި އަހަރުގެ މާޗު މަހު ރާއްޖޭގެ އެކި ސަރަހައްދުތަކުގައި އައިސްޕްލާންޓް އަޅަން ފެނަކައާ ހަވާލުކުރި އެއްބަސްވުންތަކުގެ ތެރެއިން އަށް އެއްބަސްވުމެއް މި ސަރުކާރުން ބާތިލްކޮށްފައި ވެސް ވެއެވެ. އޭރު މިނިސްޓަރު ވިދާޅުވީ، އެ އެއްބަސްވުންތައް ގާއިމުކޮށްފައިވަނީ، ދުނިޔޭގެ ބާޒާރުގައި މަސައްކަތްކުރެވޭ އަގަށް ވުރެ ވެސް ދަށް އަގެއްގައި ކަމަށެވެ.
އެހެންނަމަވެސް، މަސް ދޯނި ފަހަރަށް އައިސް ލިބުމުގައި ދިމާވާ ދަތިތަކަށް ހައްލު ހޯދުމުގެ ގޮތުން އިތުރު 11 ރަށެއްގައި އައިސްޕްލާންޓު ގާއިމުކުރުމުގެ މަޝްރޫއެއް ފެށުމަށް ވާންޖެހޭ ތައްޔާރީތައް ނިމި އަމަލީ މަސައްކަތްތައް ފެށުމަށް ތައްޔާރުވެފައިވާ ކަމަށް ވެސް ޝިޔާމް މީގެ ކުރިން ވިދާޅުވިއެވެ.