މި ސަރުކާރުގެ އަމަލުތައް މިހާރު ހުރި ގޮތުން ފެންނަނީ ޑިޕްލޮމަސީގައި މި ސަރުކާރުގެ ތަޖުރިބާ ނެތްކަން ކަމަށާއި، ބައިނަލްއަގްވާމީ ގުޅުންތައް ދޮގާއި، މަކަރާއި، ހީލަތުން ނުހިންގޭނެކަން މިހާރު މި ސަރުކާރަށް އިހުސާސްކުރެވޭނެ ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު އެފަދައިން ވިދާޅުވިއިރު، ރައީސް ޑރ. މުހައްމަދު މުއިއްޒާއި ސަރުކާރުގެ ވަފްދެއް މިވަގުތު ގެންދަވަނީ އަވައްޓެރި އިންޑިއާއަށް ފުރަމާނަ ދަތުރުފުޅެއް ކުރައްވަމުންނެވެ. އެ ދަތުރުފުޅަކީ އިންޑިއާގެ ރައީސް ދުރްޕަތީ މުރްމޫގެ ދައުވަތަކަށް ކުރައްވާ ދަތުރުފުޅެކެވެ.
އިދިކޮޅު އެމްޑީޕީގެ ފާޑުކިޔުންތައް މި ސަރުކާރަށް އެންމެ ބޮޑަށް އަމާޒުވަމުން ދަނީ، ވެރިކަމަށް އައުމަށް ޓަކައި ޕީޕީއެމް/ޕީއެންސީން އިދިކޮޅުގައި ތިބެ "އިންޑިއާ އައުޓް"ގެ ނަމުގައި ހަރަކާތެއް ކުރިޔަށް ގެންދިއުމުންނެވެ. އެއީ ރާއްޖޭގެ މިނިވަންކަމާއި ސަލާމަތަށް ނުރައްކާވާ ފަދަ އެއްބަސްވުންތަކެއް އެމްޑީޕީގެ ސަރުކާރުން ހަދާފައިވާ ކަމަށް ތުހުމަތުކޮށް ފެށި ހަރަކާތެކެވެ.
މި ސަރުކާރުން ވެރިކަމަށް އައުމަށް ފަހު ވެސް ރާއްޖެ-އިންޑިއާ ގުޅުން ގޯސްވިއެވެ. އެއީ ތިން ޑެޕިއުޓީ މިނިސްޓަރަކު އިންޑިއާގެ ބޮޑުވަޒީރު ނަރެންދްރަ މޯދީއަށް ކުޑައިމީސްކޮށް ދެއްކި ވާހަކަތަކާ ގުޅިގެންނެވެ. ސީދާ ރައީސް ވެސް އިންޑިއާއަށް ރައްދުވާހެން ނުސީދާ މޭރުމަކުން ވަނީ ފާޑުކިއުންތަކެއް ރައްދުކުރައްވައިފައެވެ. އެހެން ނަމަވެސް އެ ގުޅުން މިހާރު ވަނީ ވަރަށް ބޮޑަށް ރަނގަޅުވެފައެވެ.
ރައީސް މުއިއްޒާއި މޯދީއާއެކު --- ފޮޓޯ/ ރައީސް އޮފީސް
އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ ރާއްޖެއާއި އިންޑިއާއާ ދެމެދު އޮތް ޒަމާންވީ ގުޅުން އަލުން ރަނގަޅުވިކަމަށް ޓަކައި އުފާކުރައްވާ ކަމަށެވެ. އަދި އިންޑިއާއިން ދިވެހި ރައްޔިތުންނާއެކު ސާބިތުކަމާއެކު ދެމިތިބީތީ ޝާހިދު ވަނީ ޝުކުރު ދަންނަވާފައެވެ.
އަޅުގަނޑުމެންނަށް މިފެންނަނީ ބައިނަލްއަގްވާމީ ގުޅުންތައް، ދޮގާއި މަކަރާއި ހީލަތުން ނުހިންގޭނެކަން. މި ސަރުކާރަށް އިޙްސާސްކުރެވެމުން އެދަނީ. އަޅުގަނޑުމެންނަށް މިފެންނަނީ ޑިޕްލޮމަސީގައި މި ސަރުކާރުގެ ތަޖުރިބާ ނެތްކަން، އެމްޑީޕީގެ ރައީސް އަބްދުﷲ ޝާހިދު
ޝާހިދު ވިދާޅުވީ ރާއްޖެއާ އެންމެ ގާތް ރަހުމަތްތެރިޔާގެ ގޮތުގައި އަބަދުވެސް އޮންނަ އިންޑިއާއާއެކު ގުޅުން ދެމިއޮންނާނެ ކަމަށް އުއްމީދުކުރައްވާ ކަމަށެވެ.
އަދި ކުރީގެ ރައީސް އިބްރާހީމް މުހައްމަދު ޞާލިޙުގެ ވެރިކަމުގައި ފައްޓަވާފައިވާ މަޝްރޫއުތައް ކާމިޔާބުވެ، ކުރިއަށް ދާތަން ފެންނާތީ އުފާކުރައްވާ ކަމަށް ވެސް ޝާހިދު ވިދާޅުވިއެވެ.
އޭގެ ތެރޭގައި، އިންޑިއާއަށް ރައީސް ކުރައްވާ ދަތުރުފުޅުގައި ރުޕޭ ކާޑު ތައާރަފްކުރުމާއި، ހަނިމާދޫ އެއާޕޯޓުގެ ރަންވޭ އިފްތިތާހުކުރުމުގެ އިތުރުން އެންޓި ކޮރަޕްޝަން ކޮމިޝަނާއި، ޖުޑީޝަލް ސާވިސް ކޮމިޝަން އަދި ކުޅިވަރާއި ޒުވާނުންނާ ގުޅުން ހުރި އެމްއޯޔޫތައް ދެމެހެއްޓުން ހިމެނޭކަން ފާހަގަކުރެއްވިއެވެ.
މީގެ އިތުރުން އައްޑޫ ސިޓީގައި ހުޅުވަން މަޝްވަރާކުރަމުން އަންނަ އިންޑިއާގެ ކޮންސިއުލޭޓަކީ މީގެ ކުރިން އިދިކޮޅުގައި ތިބެ މި ސަރުކާރުގެ ވެރިން ދެކޮޅުވި ކަމެއް ނަމަވެސް އެކަމަށް ވަރަށް ރަނގަޅު ސަމާލުކަމެއް މިހާރު ދީފައިވާތީ އުފާކުރައްވާ ކަމަށް ޝާހިދު ވިދާޅުވިއެވެ.
އިންޑިއާއަށް ކުރައްވާ ދަތުރުފުޅުގެ ތެރެއިން ރައީސް މުއިއްޒު ވަނީ، އިންޑިއާގެ ރައީސާއި، ބޮޑުވަޒީރު އަދި އިންޑިއާ ސަރުކާރުގެ މުހިންމު ބައެއް ބޭބޭފުޅުންނާ ބައްދަލުކުރައްވާފައެވެ. އަދި އިންޑިއާގެ ނިއުދިއްލީގައި ބޭއްވި އިންޑިއާ-މޯލްޑިވްސް ބިޒްނަސް ފޯރަމުގައި ވެސް ބައިވެރިވެވަޑައިގެންފައިވެއެވެ.
މި ދަތުރުފުޅު ނިންމަވާލައްވާނީ މި ހަފުތާގެ ބުރާސްފަތި ދުވަހެވެ.