އިޒްރޭލު ފަތުރުވެރިންނަށް ރާއްޖެ ނާދެވޭގޮތަށް އެ ގައުމުގެ ޕާސްޕޯޓު މަނާކުރަން އިމިގްރޭޝަންގެ ގާނޫނަށް އިސްލާހު ގެނައުމަށް ހުށަހެޅި ބިލުގެ މަސައްކަތް ލަސްވާ ސަބަބު ސާފުކުރުމަށްޓަކައި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް، މަޖިލީހުގެ ރައީސް އަބްދުއްރަހީމް އަބްދުﷲއަށް ސިޓީއެއް ފޮނުއްވައިފިއެވެ.
މި ބިލު މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ، 241 ކޮމިޓީއަށް ދިރާސާކުރަން ފޮނުވީ މިދިޔަ މަހުގެ 10ވަނަ ދުވަހުއެވެ. ނަމަވެސް ކޮމިޓީގައި އެ ބިލުގެ މަސައްކަތް އެޖެންޑާ ނުކޮށް އޮންނަތާ މިއަދަށް ވަނީ 59 ދުވަސް ވެފައެވެ.
އެކަމުގެ ކަންބޮޑުވުން ފާހަގަކުރައްވާ، މެންބަރު މީކާއިލް އިއްޔެ ވަނީ މަޖިލިސް ރައީސަށް ސިޓީއެއް ފޮނުއްވާފައެވެ. އެ ސިޓީގައި ވަނީ އެ ބިލު ކޮމިޓީގައި އޮންނަތާ 59 ދުވަސްވީއިރު ވެސް ބިލުގެ އެއްވެސް މަސައްކަތެއް ކުރިއަށް ނުދާކަން ފާހަގަކުރައްވާފައެވެ. އަދި އެ ބިލުގެ މަސައްކަތް ކޮމިޓީގައި ވެސް އެޖެންޑާ ނުކޮށް އޮތް ސަބަބު ސާފުކޮށްދިނުމަށް ވަނީ އެދިވަލައްވާފައެވެ.
އެކަމާ ގުޅިގެން ސުވާލުކުރުމުން މިދިޔަ މަހުގެ 21ވަނަ ދުވަހު ޕީއެެންސީ ޕާލަމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު ވިދާޅުވީ އެ ބިލުގެ މަސައްކަތް ދިރާސާ ކުރަމުން ދާކަމަށެވެ.
ފަލާހަކީ 241 ކޮމިޓީގެ ނައިބު މުގައްރިރެވެ. ފަލާހު ވިދާޅުވި ގޮތުގައި އެއީ ވަރަށް މުހިންމު މަސައްކަތެއް ކަމުން އެ ބިލުގެ ދިރާސާއަށް އަދި ދުވަސްކޮޅެއް ނަގާނެއެވެ. ނަމަވެސް މިހާރު އޭގެ ފަހުން ވަނީ 20 ދުވަސް ފާއިތުވެފައެވެ.
އިދިކޮޅު އެމްޑީޕީގެ ޕާލިމެންޓްރީ ގްރޫޕުން މީގެ ކުރިން ވެސް ވަނީ އެ މައްސަލަ ލަސްވާތީ ކަންބޮޑުވުން ފާޅުކޮށްފައެވެ. އެމްޑީޕީން ބުނާ ގޮތުގައި އެ ބިލު، ކޮމިޓީ މަރުހަލާގައި އޮތީ "ތާށިވެފަ"އެވެ.
ވައިކަރަދޫ ދާއިރާގެ އެމްޑީޕީ މެންބަރު ހުސައިން ޒިޔާދު (ފިއްޓޭ) މީގެ ކުރިން ވިދާޅުވީ އެ ބިލަށް ސަރުކާރުގެ މެންބަރުން މަޖިލީހުގައި ރަނގަޅަށް ބަހުސް ވެސް ކޮށްފައި ނުވާކަމަށެވެ. އެކަމުގެ ސަބަބެއްގެ ގޮތުގައި ޕީއެންސީ މެންބަރުން ދެއްކެވީ "އެ ބިލުގެ ބަހުސްގައި ބައިވެރިނުވީ އެ ބިލު އަވަސްކުރަންވެގެން" ކަމަށް ޒިޔާދު ވިދާޅުވިއެވެ.
އިޒްރޭލު މީހުންނާއި އެ ގައުމުގެ ޕާސްޕޯޓު އޮންނަ އެންމެންނަށް ރާއްޖެ ނާދެވޭ ގޮތަށް ޕާސްޕޯޓު މަނާކުރަން ބިލެއް ހުށަހެޅުއްވީ އެމްޑީޕީގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ. ސަރުކާރުން ނިންމީ، އެ ބިލު ބަލައިގަނެ، ކޮމިޓީ މަރުހަލާގައި ސަރުކާރުން ބިލަށް ގެންނަން ބޭނުންވާ ބަދަލުތައް ގެންނާށެވެ.
އެހެންކަމުން، ޖުމުލަ 88 މެންބަރުންގެ ވޯޓާ އެކު އިޒްރޭލު ޕާސްޕޯޓު މަނާކުރާ މައްސަލަ 241 ކޮމިޓީއަށް ފޮނުވީއެވެ.
ސަރުކާރުން އިޒްރޭލު ޕާސްޕޯޓު މަނާކުރަން ނިންމީ އެކަންކުރަން ގޮވާލައި މުޒާހަރާ ވެސް ކުރަމުން އަންނަނިކޮށެވެ.