ހުޅުމާލޭ ދެވަނަ ފިޔަވަހީގެ ވިނަރެސް ފުލެޓު ކައިރީގައި މިއަދު އެކްސިޑެންޓުވި ކާރު ދުއްވަން އިން މީހާ އާއި ކާރުގައި ދެން ތިބި ދެ މީހުން މިރޭ ހައްޔަރުކޮށްފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، އެކްސިޑެންޓުވި ވަގުތު ކާރު ދުއްވަން އިނުމަށް ފަހު ފިލައިގެން ދިޔަ މީހާ ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށެވެ.
އެ މީހާއަކީ 25 އަހަރުގެ ދިވެހި ފިރިހެނެއް ކަމަށް އެ މެސެޖުގައިވެއެވެ.
އޭގެ ފަހުން ފުލުހުން ވަނީ, އެ ކާރުގައި ދެން ތިބި ދެ މީހުން ވެސް ހައްޔަރުކޮށްފައިވާ ކަމަށް ބުނެފައެވެ. އޭގެ ތެރެއިން އެކަކަކީ 33 އަހަރުގެ ދިވެހި ފިރިހެނެއް ކަމަށް ބުނި ނަމަވެސް، ތިން ވަނަ މީހާގެ ތަފުސީލެއް މިހާތަނަށް ހާމަކޮށްފައިނުވެއެވެ.
އެ އެކްސިޑެންޓުގެ ވީޑިއޯތަކެއް ސޯޝަލް މީޑިއާގައި ދައުރުވެފައިވާއިރު، ވީޑިއޯއިން ފެންނަނީ ބާރު ސްޕީޑުގައި ދުއްވާފައި ދިޔަ ކާރެއް ކޮންޓްރޯލުން ނެއްޓިގެން ގޮސް، ސައިކަލެއްގައި ޖެހޭ މަންޒަރެވެ.
އެ ސައިކަލު މަތީގައި އިން މީހާ ވިއްސައިގެންދާ މަންޒަރު ވެސް ވީޑިއޯއިން ފެނެއެވެ.
އެ މީހާގެ އާއިލާގެ މީހަކު ވަނީ އެއީ 27 އަހަރުގެ ދިވެހި ފިރިހެނެއް ކަމަށާއި އެ އެކްސިޑެންޓުގައި އޭނާގެ މޫނުމައްޗަށް އަނިޔާ ލިބި، ކަށިތައް ބިނދިފައިވާ ކަމަށް ބުނެފައެވެ. އޭނާއަށް މިހާރު ފަރުވާ ދެނީ އައިޖީއެމްއެޗް ވޯޑުގައި ކަމަށާއި ހާލު ރަނގަޅު ވަމުން އަންނަ ކަމަށް ވެސް އާއިލާއިން ބުންޏެވެ.
މާލެ ސަރަހައްދުގައި އެއްގަމު އުޅަނދުގެ އެކްސިޑެންޓުތައް މިފަހުން އިތުރުވެފައިވާއިރު، އެފަދަ ގިނަ ހާދިސާތައް ދިމާވަނީ ބާރު ސްޕީޑުގައި ދުއްވާ ކާރާއި ސައިކަލު ކޮންޓްރޯލް ނުކުރެވިގެންނެވެ.