ފުލުހުންގެ ޚިދުމަތުގެ އިކޮނޮމިކް ކްރައިމް އިންވެސްޓިގޭޝަންގެ ހެޑްގެ މަގާމުގައި މަސައްކަތްކުރައްވަމުން ގެންދަވާ ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބު ކުރައްވަމުން ގެންދެވި މަސައްކަތްތައް ވަގުތީގޮތުން އެހެން ފަރާތަކާ ހަވާލުކޮށްފިއެވެ.
މި ފަހުން ރަޖުނީ އާންމުންނަށް ފެނިފައިވަނީ ހައްގުނޫން ބަޔަކަށް ހުޅުމާލެއިން ގޯތިދިން ކަމަށް ތުހުމަތުކުރާ މައްސަލައިގައި ފުލުހުން ބޭއްވި ނޫސްވެރިންގެ ބައްދަލުވުމުންނެވެ.
ފުލުހުން އެ ބައްދަލުވުމުގައި ދެއްކި ވާހަކަތަކަށްފަހު، ރަޖުނީއާ ގުޅޭ ތުހުމަތުތަކެއް ސޯޝަލް މީޑިއާގައި ފެންމަތިވިއެވެ. އެގޮތުން އޭނާ ނުހައްގުން ވިނަރެސް ފްލެޓެއް ހޯދައިފައިވާ ކަމަށް ބުނެ ސޯޝަލް މީޑިއާގައި ލިޔެކިޔުންތަކެއް އަންނަނީ ދައުރުކުރަމުންނެވެ.
އެއާއެކު ސޯޝަލް މީޑިއާގައި ޚިޔާލު ފާޅުކުރި ގިނަ ބަޔަކު ވަނީ އެ ފަދަ ތުހުމަތެއް އޭނާއާމެދު ކުރެވޭއެރު ގޯތިތަކުގެ މައްސަލަ ބެލުމުގައި އޭނާ އުޅުމަކީ މައްސަލައަށް ނުފޫޒެއް ނެތި ރަނގަޅަށް ބެލޭނެ ކަމެއް ކަމަށް ބުނެފައެވެ.
އެހެންވެ ފުލުހުންގެ ތަރުޖަމާނު އެސިސްޓެންޓް ކޮމިޝަނާ އޮފް ޕޮލިސް އަހްމަދު ޝިފާން މިއަދު ވަނީ ރަޖުނީއާ ގުޅުންހުރި ތުހުމަތުތައް ބަލާކަމަށް ބުނެފައެވެ.
އެއަށްފަހު މިރޭ ޝިފާން އެކްސްގައި ކުރެއްވި ޕޯސްޓެއްގައި ވިދާޅުވީ ރަޖުނީ މަސައްކަތުން އެކަހެރިކުރީ އިކޮނޮމިކް ކްރައިމް އިންވެސްޓިގޭޝަންސްގައި މިވަގުތު ކުރަމުންގެންދާ ބިންވެރިޔާ އަދި ގެދޮރުވެރިޔާ ސްކީމާގުޅޭ ތަހުގީގުގެ ކްރެޑިބިލިޓީ ހިފެހެއްޓުމާއި އެ ތަހުގީގަށް އެއްވެސް ކަމަކުން ނުރަނގަޅު އަސަރެއް ނުފޯރާނެކަން ޔަގީންކުރުމަށް ޓަކައި ކަމަށެވެ.
ނަމަވެސް މި ނިންމުމަކީ ރަޖުނީ ޝުއައިބާ ގުޅޭގޮތުން މި ޚިދުމަތުން ޔަގީންކުރަމުންދާ ކަންކަމުގައި، އެ ފަރާތުން އެއްވެސް ނުރަނގަޅު އަމަލެއް ހިންގާފައިވާކަން މިހާތަނަށް ފާހަގަކުރެވިގެން ނިންމި ނިންމުމެއް ނޫންކަމަށް ޝިފާން ވިދާޅުވިއެވެ.
މިއަދު ވަނީ ފްލެޓު އެޅުމުގެ ނަމުގައި ސީލައިފް ގްލޯބަލްއިން ހިންގި ސްކޭމްގައި ގެއްލުންވި މީހުންނަށް ވިނަރެސް ފުލެޓުތަކެއް ދޭން އެންގުމުން، ސީލައިފަށް ފައިސާ ދެއްކި ކަމުގެ ފޭކު ލިޔުންތަކެއް ހަދައިގެން ވިނަރެސް ފުލެޓުތަކެއް ދީފައިވާކަން ވެސް ހާމަވެފައެވެ.
ވިނަރެސް ފުލެޓުތައް ދިނުމުގައި ވެސް އޮޅުވާލުމަށް ސައްހަ ނޫން ލިޔެކިޔުންތަކެއް ބޭނުންކޮށްފައިވާ ކަމަށް އިތުބާރު ހުރި މަސްދަރަކުން "ސަން"އަށް މައުލޫމާތު ދީފައިވެއެވެ.
އެ ދެ މައްސަލައާ ގުޅުންހުރި ލިޔެކިޔުންތަކެއް ސޯޝަލް މީޑިއާގައި ވަނީ އާންމުވެފައެވެ.
"ސަން"އަށް މައުލޫމާތު ލިބިފައިވާ ގޮތުގައި، ސީލައިފަށް ފައިސާ ނުދައްކާ ބައެއް މީހުންނަށް ވެސް އެ އެއްބަސްވުމުގެ ދަށުން ކަމަށް ބުނެ ވިނަރެސް ފުލެޓު ދީފައިވެއެވެ. އަދި އެގޮތަށް ފުލެޓު ދިނުމަށް ޓަކައި ފޭކު ލިޔެކިޔުން ހެދި ކަމަށް ވެސް މައުލޫމާތު ލިބިފައިވެއެވެ.