ގަލޮޅުގައި ހުރި ގެއެއް ތެރޭގައި ޒުވާނަކު މަރުވެފައި އޮއްވާ ފެނިއްޖެ

މާލޭގެ ގަލޮޅުގައި ހުރި ގެއެއްގެ ތެރޭ ޒުވާން ފިރިހެނަކު މަރުވެފައި އޮއްވާ މިއަދު ފެނިއްޖެއެވެ.

މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، ގަލޮޅުގައި ހުރި ގެއެއްގައި މީހަކު ޚަބަރު ހުސްވެފައި އޮތް ކަމުގެ މައުލޫމާތު ފަތިހު 05:02 ހާއިރު ލިބުނު ކަމަށެވެ.

މަރުވެފައި އޮއްވާ ފެނުނީ 35 އަހަރުގެ ގ. ފްރެސް ލައިޓް، އަލީ ރަޝީދެވެ.

އައިޖީއެމްއެޗާ ހަވާލާދީ ފުލުހުން ބުނީ ހޮސްޕިޓަލަށް ގެންދިޔަ އިރު ވެސް އެމީހާ މަރުވެފައިވާ ކަމަށެވެ. މި މައްސަލަ ފުލުހުން އަންނަނީ ތަހުގީގު ކުރަމުންނެވެ.

މި މަހުގެ ތިން ވަނަ ދުވަހު ވެސް ވަނީ މާލޭގެ ގުލާބީ މަގުގައި ހުރި ގެއެއް ތެރޭގައި ދިވެއްސަކު މަރުވެފައި އޮއްވައި ފެނިފައެވެ. އޭރު މަރުވެފައި އޮއްވާ ފެނުނީ މއ. ހުދުއަކިރި، އަބްދުﷲ ހަސަން (53އ) އެވެ.