ނިމިދިޔަ 19 ވަނަ ރައްޔިތުންގެ މަޖިލީހުން ފެނުނު "ހަޑިމުޑުދާރު" މަންޒަރުތަކެއް މިހާރުގެ 20 ވަނަ މަޖިލީހުން ނުފެންނާނެ ކަމަށް، ތިމަރަފުށީ ދާއިރާގެ ޕީއެންސީ މެންބަރު އަހުމަދު ރިޔާޒު މިރޭ ވިދާޅުވެއްޖެއެވެ.
އެސްއެސްޓީވީގެ 'ބާރުހަތަރެއް' ޕްރޮގްރާމްގައި ވާހަކަދައްކަވަމުން ރިޔާޒު ވިދާޅުވީ، މަޖިލީހުގެ އާ ގަވާއިދު ފާސްވެގެން އައިއިރު މަޖިލިސް މެންބަރުންގެ އަޚުލާގު ހިފަހެއްޓުމަށްޓަކައި ވަރަށް ބޮޑު އިސްކަމެއްދިން ކަމަށެވެ. އަދި ގަވައިދުތަކަށް ބަދަލުތަކެއް ވެސް ގެނެސްފައިވާނެ ކަމަށް އޭނާ ވިދާޅުވިއެވެ.
އެގޮތުން 20 ވަނަ މަޖިލީހަކުން "19 ވަނަ މަޖިލީހުން ފެނިގެންދިޔަ ޒާތުގެ ހަޑިމުޑުދާރު މަންޒަރުތަކެއް" ފެނިގެން ނުދާނެ ކަމުގެ ޔަގީންކަން ރިޔާޒު ވަނީ ދެއްވާފައެވެ.
އެއީ އަޅުގަނޑު ޝައްކެއް ވެސް ކުރާނެ ކަމެއް ނޫން. ހަމަ ޔަގީންކަންދެން އަޅުގަނޑު ދިވެހި ލޮބުވެތި ރައްޔިތުންނަށް އެފަދަ ވިޔާނުދާ އަމަލުތަކެއް އަޅުގަނޑުމެންގެ ޅަ ދަރިން ޓީވީ ބަލަން ތިބޭއިރު އަޅުގަނޑުމެން މި 20 ވަނަ މަޖިލީހުން ފެނިގެން ނުދާނެ، ތިމަރަފުށީ ދާއިރާގެ މެންބަރު އަހުމަދު ރިޔާޒު
ރިޔާޒު ވިދާޅުވީ މިހާތަނަށް ދިޔަ އިރުވެސް ފެންނަނީ ވަރަށް އޮމާންކަމާއެކު ވަރަށް ތަހުޒީބީ ބަހުސްތަކެއް މަޖިލިސް ތަޅުމުގައި ކުރިއަށްދާތަން ކަމަށެވެ.
މަޖިލީހުގެ ޖަލްސާއެއްގެ ތެރެއިން: މެންބަރު ރިޔާޒު ވިދާޅުވީ 19 ވަނަ މަޖިލީހުން ފެނިގެންދިޔަ "ހަޑިމުޑުދާރު" މަންޒަރުތަކެއް 20 ވަނަ މަޖިލީހުން ނުފެންނާނެ ކަމަށް -- ފޮޓޯ/ މަޖިލިސް
ވިހި ވަނަ މަޖިލީހުގެ ގަވާއިދު ފާސްކޮށްފައި ވަނީ މިމަހުގެ 24 ވަނަ ދުވަހުއެވެ.
އެ ގަވާއިދުގެ 18 ވަނަ މާއްދާގައި ބަޔާންކޮށްފައިވާ ސުލޫކީ މިންގަނޑުތަކާ ޚިލާފުވެއްޖެ ނަމަ އަޅާނެ އާ ފިޔަވަޅުތަކެއް ވެސް ގަވާއިދުގައި ވަނީ ހިމަނާފައެވެ. ސުލޫކީ މިންގަނޑާ ޚިލާފުވުން މާނަކޮށްފައިވަނީ ރާއްޖޭގެ އެއްވެސް ގާނޫނަކާއި ގަވާއިދަކާ އަދި ސުލޫކީ މިންގަނޑުގެ ތެރޭގައި ހިމެނޭ ކަންކަމުގެ ތެރެއިން ކަމަކާ ޚިލާފުވުމެވެ.
ސުލޫކީ މިންގަނޑާ ޚިލާފުވާ މެންބަރުން ވަކި އަދަދަކަށް ކޮމިޓީއާއި ޖަލްސާތަކުގައި ބައިވެރިނުވެވޭ ގޮތަށް ސަސްޕެންޑުކުރަން ވެސް ވަނީ ގަވާއިދުގައި ހިމަނައިފައެވެ. އެކަމަކު، ރައީސް ވަކިކުރުން ފަދަ މުހިންމު ކަންކަން އޮންނަ ޖަލްސާތަކުގައި އެ މެންބަރުންނަށް ބައިވެރިވެވޭނެއެވެ.
މީގެ ކުރިން ރައްޔިތުންގެ މަޖިލީހުގައި އަޑުގަދަކޮށް، މަޖިލީހުގެ ނިޒާމު ނަގާލުމުގެ މައްސަލަތައް ކުރިމަތިވެފައިވެއެވެ. މިދިޔަ 19 ވަނަ މަޖިލީހުގައި ވެސް އެކަން ތަކުރާރުވެ، ޖަލްސާތައް ނުބޭއްވި ދިޔަތަން ވެސް ފެނުނެވެ.
ހަމައެއާއެކު މަޖިލީހުގެ ތަޅުމުގައި ހުންނަ ބައެއް ތަކެއްޗަށް ގެއްލުން ދިނުމުގެ މައްސަލަތައް ވެސް ފެންމަތިވެފައިވެއެވެ.