ބްރޯޑްކާސްޓިން ކޮމިޝަން (ބްރޯޑްކޮމް)ގެ ހުސްވެފައިވާ ދެ މަގާމަށް އައްޔަނު ކުރުމަށް، ރައީސް ޑރ. މުޙައްމަދު މުއިއްޒު ހުށަހެޅުއްވި ބޭފުޅުންގެ ތެރެއިން ރައީސް އޮފީހުގެ ކުރީގެ ތަރުޖަމާން، އިބްރާހީމް މުއާޒު އިންޓަވިއުއިން ކަޓައިފިއެވެ.
ބްރޯޑްކޯމްގެ ދެ މަގާމު ހުސްވީ އެ ކޮމިޝަންގެ ރައީސާއަކަށް ހުންނެވި މަރިޔަމް ވަހީދާއާއި އެ ކޮމިޝަންގެ މެންބަރު އަލީ ޔޫސުފްގެ ދައުރު މިދިޔަ ޑިސެންބަރުމަހުގެ ފަހަކަށް ހަމަވުމުންނެވެ.
އެ މަގާމަށް ކުރިމަތިލާން ހުޅުވައިލި ފުރުސަތުގައި، ކުރިމަތިލީ ބޭފުޅުންގެ ތެރެއިން ޝަރުތުހަމަވާ ފަރާތްތައް، ރައީސް މުއިއްޒު އިސްކަން ދެއްވާ ތަރުތީބުން މަޖިލީހަށް ހުށަހެޅުއްވިއިރު، ލިސްޓުގެ އެންމެ ކުރީގައި އޮތީ މުހައްމަދު އަބްދުﷲ (މުހަންމާ)ގެ ނަމާއި މުއާޒުގެ ނަމެވެ. މި ކަމުން، ރާއްޖޭގައި ޒުވާނުން ތައުލީމު ހާސިލް ކުރުމުގެ މާނައެއް ނެތްކަން ދައްކުވައިދޭ ކަމަށް ބުނެ، އިދިކޮޅު އެމްޑީޕީން ފާޑު ވެސް ކިއެވެ.
ރައީސް މަޖިލީހަށް ހުށަހެޅުއްވި ލިސްޓުގައި ޝަރުތުހަމަވާ 12 ބޭފުޅުންގެ ނަން އޮތްއިރު، އެ މަގާމަށް މީހުން އައްޔަން ކުރުމަށް އިންޓަވިއު ކުރާނީ، ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމިޓީންނެވެ.
މިނިވަން މުއައްސަސާތަކާއި މިނިވަން މުސްތަގިއްލު މަގާމުތަކަށް މީހުން އައްޔަނު ކުރުމަށް އިންޓަވިއުކުރެވޭ ފަރާތްތަކަށް މާކްސްދިނުމުގައި ވަޒަން ކުރާނެ މިންގަނޑުގެ ތެރެއިން އެންމެ ގިނަ މާކްސްދެނީ، ހާސިލްކޮށްފައިވާ ތައުލީމާއި މަގާމުގެ މަސައްކަތާ ހުރި ގުޅުން ސާބިތުކޮށްދެވިފައިވާ މިންވަރަށެވެ. އެ ބައިން 20 މާކްސްދެއެވެ.
ދެން އެންމެ ގިނައިން މާކްސްދެނީ، ލިބިފައިފާ ތަޖުރިބާއާއި މަގާމުގެ މަސައްކަތާ ހުރި ގުޅުން ދައްކުވައިދީފައިވާ މިންވަރާއި، ދުރުމުސްތަގުބަލުގެ ތަސައްވުރާއި އަމާޒު ހުރި ގޮތާއި، ތެދުވެރިކަމާއި އިޚްލާސްތެރި ކަމަށެވެ. މިއިން ކޮންމެ ބަޔަކަށް 15 މާކްސްދެއެވެ.
މި މައްސަލަ ބަލައި ނިންމުމަށްފަހު، ކޮމިޓީން ނެރުނު ރިޕޯޓުގައިވާ ގޮތުން، 75އަށްވުރެ ގިނަ މާކްސް ލިބިފައިވާ ހަތަރު ބޭފުޅުންގެ ތެރޭގައި ހިމެނެނީ:
- އަލްއުސްތާޒާ އާނިމަތު ސަރާހަތު އިއްޒަތު
- ޝިފްޒާ މުސްތަފާ
- މުހައްމަދު އަބްދުﷲ (މުހަންމާ)
- ޝިމްލާ އަހްމަދު
މި މަގާމަށް އައްޔަނު ކުރުމަށް ޓަކައި ކޮމިޓީއަށް ރައީސް ފޮނުއްވި ނަންތަކުގައި އެންމެ ފުރަތަމަ ހިމަނާފައިވާ މުހަންމާއަށް 77 މާކްސް ލިބިފައިވެއެވެ. މުއާޒަށް ލިބިފައިވަނީ 68 މާކްސްއެވެ.
ރައީސް އޮފީހުގެ ތަރުޖަމާނެއްގެ ގޮތުގައި މަސައްކަތްކުރުމުގެ ކުރިން މުއާޒު މަސައްކަތް ކުރެއްވީ ދައުލަތުގެ މީޑިއާގައެވެ. ކުރީގެ ރައީސް އަބްދުﷲ ޔާމީންގެ ވެރިކަން ނިމުމުން، އޭނާ ވަނީ ކުރީގެ ނައިބު ރައީސް އަހްމަދު އަދީބު އިސްކޮށް ހުންނަވައިގެން އުފެއްދެވި މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ)އަށް ސޮއިކުރައްވައިފައެވެ. އަދި އެ ޕާޓީގެ ނައިބު ރައީސްގެ މަގާމު ވެސް ފުރުއްވިއެވެ.
އެހެން ނަަމަވެސް، މި ފަހުން ސިޔާސީ ހަރަކާތްތަކުން އޭނާ މާ ގިނައިން ފެނިފައެެއް ނުވެއެވެ. އޭގެ ފަހުން 2023ގައި އޮތް ރިޔާސީ އިންތިޚާބާ ދިމާކޮށް އޭނާ ވަނީ އެމްޑީޕީއަށް ސޮއިކުރައްވައިފައެވެ.