ސައްހަ ނޫން ފޯމުތައް އިލެކްޝަންސް ކޮމިޝަން (އީސީ)އަށް ހުށަހެޅުމަށް ސޮއިކުރި ހެކިންނަށް ފިޔަވަޅު އެޅިތޯ ބަލަން ރައްޔިތުންގެ މަޖިލީހުގެ ގަލޮޅު ދެކުނު ދައިރާގެ މެންބަރު މީކާއިލް ނަސީމް މަޖިލީހަށް ހުށަހަޅުއްވައިފިއެވެ.
މީކާއިލް މަޖިލީހަށް ފޮނުއްވި ނޯޓިސްގައި ވިދާޅުވީ، ހޯމް މިނިސްޓްރީގެ ދަށުން ހިންގާ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަންގެ ޑޭޓާ ބޭސް ބޭނުންކޮށްގެން މީހުންގެ ޝަހުސު އޮޅުވާލައިގެން، ޕީއެންސީއަށް މެންބަޝިޕް ފޯމު ފުރާފައިވާކަން ހާމަވެފައިވާ ކަމަށެވެ.
އެހެންވެ، މީހުންގެ ޒާތީ މައުލޫމާތު އިތުރަށް ރައްކާތެރި ކުރުމަށް އަޅުއްވާނީ ކޮން ފިޔަވަޅެއްތޯއާއި ސައްހަ ނޫން ފޯމުތަކުގައި ސޮއިކުރި ހޯމް މިނިސްޓްރީގެ އިސްވެރިންނާ މެދު ފިޔަވަޅެއް އެޅިތޯ ސާފުކުރުމަށް މީކާއިލް ހުށަހަޅުއްވާފައިވެއެވެ.
އެ މައްސަލާގައި ހޯމް މިނިސްޓަރު އަލީ އިހުސާނާ ސުވާލު ކުރުމަށް އެ ނޯޓިސްގައި މީކާއިލް ވަނީ އެދިފައެވެ.
ފާހަގަކޮށްލެވޭ ގޮތުގައި، މި ފަހުންވަނީ ރައްޔިތުންގެ މަޖިލީހުހެ ވައިކަރަދޫ ދާއިރާގެ އެމްޑީޕީ މެންބަރު ހުސައިން ޒިޔާދު (ފިއްޓޭ)އަށް ނޭނގި އޭނާ ވެސް ޕީއެންސީއަށް ވައްދައިފައެވެ.
މި މައްސަލައިގައި އެމްޑީޕީގެ އިސްވެރިންވަނީ އިލެކްޝަންސް ކޮމިޝަނަށް ގޮސް، އެ ތަނުގެ އިސްވެރިންނާ ބައްދަލުކޮށްފައެވެ. އެ ކޮމިޝަނުންވަނީ އެ ފޯމު ބާތިލުކޮށް، ޒިންމާވާ ފަރާތްތަކަށް ފިޔަވަޅު އަޅާނެ ކަމަށް ބުނެފައެވެ.
މި މައްސަލައިގައި ޕީއެންސީންވަނީ ސައްހަ ނޫން ފޯމުތަކެއް އެ ޕާޓީގެ ފަރާތުން ހުށަހެޅި ކަމަށް އެއްބަސްވެފައެވެ. އަދި އެ ޕާޓީއަށް ލިބޭ ފޯމުތަކުގެ ސައްހަކަން ކަށަވަރު ކުރުމުގެ ގާބިލުކަން ޕާޓީގެ ކިބައިގައި ނެތް ކަމަށް ބުނެފައިވެއެވެ.
އެހެން ނަމަވެސް، މައްސަލަ ބެލުމަށް އިލެކްޝަންސް ކޮމިޝަނަށް އެއްބާރުލުންދޭނެ ކަމަށް ޕީއެންސީން ބުނެއެވެ.
މިފަދަ މައްސަލަތައް ފެންމަތިވެފައިވަނިކޮށް، ވަގަށް ސިޔާސީ ޕާޓީތަކަށް ވައްދާފައި ތިބި މީހުންނަށް އެމްޑީޕީން ވަނީ ގާނޫނީ އެހީތެރިކަން ފޯރުކޮށްދޭން ފަށައިފައެވެ.