ޓްރައިލެޓަރަލް ޖޮއިންޓް އެކްސަސައިޒް ދޯސްތީ-16 އަށް އިންޑިއާއާއި ސްރީ ލަންކާއިން ރާއްޖެ އަންނަ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން މިއަދު ބުނެފިއެވެ.
މި ހަރަކާތަކީ ކޮންމެ ދެ އަހަރަކުން އެއް އަހަރަކު، ރާއްޖެއާއި އިންޑިއާ އަދި ސްރީލަންކާގެ ދެމެދުގައި އޮންނަ އަސްކަރީ ގުޅުން އިތުރަށް ހަރުދަނާކޮށް ކަނޑުމަތީގައި ދިމާވާ ހާދިސާތަކުގައި ތިން ޤައުމު ގުޅިގެން ހަރަކާތްތެރިވާނެ ގޮތްތައް ދަސްކުރަން ބާއްވާ ހަރަކާތެކެވެ.
އެމްއެންޑީއެފުން މިއަދު އެކްސްގައި ކުރި ޕޯސްޓެއްގައި ބުނީ މި އަހަރު އޮންނަ 'ދޯސްތީ-16'އަށް އިންޑިއާއާއި ލަންކާއިން އަންނަ ބޯޓުތަކަށް އެމްއެންޑީއެފުން މަރުހަބާ ކިޔާ ކަމަށެވެ.
މި އަހަރުގެ ޓްރައިލެޓަރަލް ޖޮއިންޓް އެކްސަސައިޒް 'ދޯސްތީ-16' އޮންނާނީ މިއަދުން ފެށިގެން މި މަހުގެ 25 ވަނަ ދުވަހުގެ ނިޔަލަށް މާލޭގައެވެ.
ކުރިން 2016 ވަނަ އަހަރު ބޭއްވި ޓްރައިލެޓަރަލް ޖޮއިންޓް އެކްސަސައިޒް ދޯސްތީގެ ތެރެއިން -- ސަން ފޮޓޯ/ ފަޔާޒު މޫސާ
މި ހަރަކާތުގައި ބައިވެރިވާން އިންޑިއާ އަދި ސްރީލަންކާގެ ކޯސްޓުގާޑުގެ އިތުރުން ބަނގްލަދޭޝްގެ އޮބްޒާވަރުން ވެސް އަންނާނެ ކަމަށް އެމްއެންޑީއެފުން ވަނީ މައުލުމާތު ދީފައެވެ.
އެކްސަސައިޒް ދޯސްތީ އަކީ 1991 ވަނަ އަހަރުން ފެށިގެން ކޮންމެ ދެ އަހަރުން އެއް އަހަރު އިންޑިއާއި އެމްއެންޑީއެފް ކޯސްޓްގާޑް ގުޅިގެން ހިންގަން ފަށާފައިވާ އެކްސަސައިޒެކެވެ.
މި އެކްސަސައިޒްގައި ސްރީލަންކާ ބައިވެރިވެފައިވަނީ 2012 ވަނަ އަހަރުން ފެށިގެންނެވެ. މި އެކްސަސައިޒް އެންމެ ފަހުން ބާއްވާފައި ވަނީ 2021 ވަނަ އަހަރެވެ.