ރައީސް ޑރ. މުހައްމަދު މުއިއްޒުގެ ވަޒީރުންގެ މަޖިލީހުގެ ބޭފުޅުންނަށް ރުހުންނުދިނުމަކީ ސަރުކާރު ހިންގުމަށް ހުރަސްއެޅުން ކަމަށް ވެރިކަން ކުރާ ކޯލިޝަނުން މިއަދު ބުނެފިއެވެ.
މިއަދު އޮތް ރައްޔިތުންގެ މަޖިލީހުގެ ދައުރުން ބޭރު ޖަލްސާގައި މެންދުރު ފަހު، 1:00 އަށް ވަނީ ވަޒީރުންނަށް ރުހުންދޭން ވަނީ އެޖެންޑާކޮށްފައެވެ. އެކަމަކު، އިދިކޮޅު ދަ ޑިމޮކްރެޓުންނާއި އެމްޑީޕީން ގެންދަނީ ބައެއް ވަޒީރުންނަށް ރުހުންނުދޭނެ ކަމަށް ބުނަމުންނެވެ.
ޕީޕީއެމް/ޕީއެންސީން މިއަދު ނެރުނު ނޫސްބަޔާނެއްގައި ބުނީ، ސަރުކާރެއްގެ ސިޔާސަތު ތަންފީޒުކުރަން އެކުލަވައިލާ ވަޒީރުންގެ މަޖިލީހުގެ މެންބަރުންނަށް ރުހުން ނުދިނުމަކީ ރައްޔިތުންގެ މަންފާއަށް ސަރުކާރުން ކުރަމުން ގެންދާ މަސައްކަތަށް ހުރަސް އެޅުން ކަމުގައި ޤަބޫލުކުރާ ކަމަށެވެ.
"ސިޔާސަތުތައް އެންމެ ފުރިހަމަ ގޮތުގައި ތަންފީޒުކޮށް ހިންގެވުމަށްމަށް ބޭނުންވާ ވުޒާރާތަކާއި، އިދާރަތައް އުފެއްދެވުމާއި، އެ ވުޒާރަތަކާއި، އިދާރަތައް ހިންގެވެމުމަށް ޤާބިލު ބޭފުޅުން ޢައްޔަން ކުރެއްވުން އެއީ ރައީސުލްޖުމްހޫރިއްޔާގެ ޒިންމާއެކެވެ،" އެ ބަޔާނުގައި ވެއެވެ.
ޕީޕީއެމް/ޕީއެންސީން ބުނީ، ރައީސް ޑރ. މުޙައްމަދު މުޢިއްޒު ޢައްޔަންކުރައްވާފައިވާ ވަޒީރުންނަކީ ކަމަށް ޤާބިލު އެ ވުޒާރާތައް ހިންގެވުމުގެ ތަޖުރިބާ ހުންނެވި، އަދި އެ ބޭފުޅުންގެ ޒިންމާ ފުރިހަމައަށް އަދާކުރައްވާނެ ރައްޔިތުންގެ ލާބައާއި މަންފާއަށް އިސްކަން ދެއްވައިގެން މަސައްކަތް ކުރައްވާނެ ވަޒީރުންކަމާ މެދު އެ ދެ ޕާޓީން ޝައްކުނުކުރާ ކަމަށެވެ.
މީގެ އިތުރުން، ވުޒާރާތަކަށް އައްޔަންކުރައްވާފައިވާ ވަޒީރުންނާ މެދު ފުރިހަމަ އިތުބާރު އެބައޮތް ކަމަށް ވެސް ދެ ޕާޓީގެ ބަޔާނުގައި ވަނީ ބުނެފައެވެ.
"ރައީސުލްޖުމްހޫރިއްޔާ ވުޒާރާތަކަށް ޢައްޔަންކުރައްވާފައިވާ ވަޒީރުންނަށް އެބޭފުޅުންގެ މަޤާމުގެ މަސްޢޫލިއްޔަތު އަދާކުރުމުގެ ފުރުޞަތު ދިނުމަކީ ސިޔާސީ ޕާޓީތަކުން ކުރާންޖެހޭ ކަމެއްކަމަށް މިކޯލިޝަނަށް ޤަބޫލު ކުރެވޭތީ، އެމަނިކުފާނުގެ ކެބިނެޓަށް ޢައްޔަން ކުރައްވާފައިވާ ވަޒީރުންނަށް ރުހުން ދިނުމަކީ ކޮންމެހެން ކުރަން ޖެހޭ ކަމެއްކަމުގައި މި ކޯލިޝަނުން ޤަބޫލު ކުރަމެވެ،" ބަޔާނުގައި ވެއެވެ.
ދެ ޕާޓީގެ ބަޔާނުގައި ބުނީ، ވަޒީރުންނަށް ރުހުން ނުދިނުމަކީ ސަރުކާރު ހިންގަން ދޭންޖެހޭ އެއްބާރުލުން ނުދިނުން ކަމަށާއި އެއީ ރައްޔިތުންނަށް ފޯރުކޮށްދޭން ހެހޭ ޚިދުމަތަށް ފާޅުގައި ހުރަސްއެޅުން ކަމަށެވެ.
ވަޒީރުންނަށް ރުހުންދިނުމުގެ މަސައްކަތް ކުރިއަށް އޮތްއިރު، ވަޒީރުންނަށް ރުހުންދިނުމާ މެދު ގޮތެއް ނިންމަން މަޖިލީހުގެ މެޖޯރިޓީ އޮތް އެމްޑީޕީން އަންނަނީ އެ ޕާޓީގެ ޕާލިމަންޓްރީ ގްރޫޕުގައި މަޝްވަރާކުރަމުންނެވެ. އަދި، އެމްޑީޕީއާ އެކު މަސައްކަތްކުރާ ދަ ޑިމޮކްރެޓްސްއިން މިހާރު ވެސް ވަނީ ބައެއް ވަޒީރުންނަށް ރުހުންނުދޭން ނިންމައިފައެވެ.
މަޖިލީހުގެ މިދިޔަ ތިންވަނަ ދައުރު ހަމަވުމުގެ ކުރިން ވެސް ތަޅުމަށް ވަޒީރުންނަށް ރުހުންދޭން އެޖެންޑާކުރިއެވެ. އެކަމަކު، އޭރު ކޮމިޓީން ފޮނުވި ރިޕޯޓު ފުރިހަމަނުވާ ކަމަށް ބުނެ، މަޖިލީހުން ވަނީ އެ މައްސަލަ އަނބުރާ ކޮމިޓީއަށް ފޮނުވައިލައިފައެވެ.
ކޮމިޓީގައި ވެސް އެ މައްސަލަ ވަރަށް ބޮޑަށް ދިގުލައިގެން ދިޔައެވެ. އެ މައްސަލަ ކޮމިޓީން ނިންމީ ދައުރު ނިމުނު ފަހުންނެވެ.
އެކަމަކު، އޭގެ ފަހުން ވަޒީރުންނަށް ރުހުންދޭން ޖަލްސާއެއް ނުބާއްވައި އޮތުމަށް ފަހު މިއަދަށް ދައުރުން ބޭރުގެ ޖަލްސާއެއް ބާއްވަން ހުށަހެޅީ އިންތިޚާބުތަކާ ބެހޭ އާންމު ގާނޫނަށް އިސްލާހެއް ހުށަހަޅައި، ރޯދަ މަހު އިންތިޚާބުތައް ނުބޭއްވޭ ގޮތަށް ފަސްކުރާށެވެ.