މި ސަރުކާރުގައި ދުނިޔޭގެ ތަހުޒީބު އަދި ރާއްޖެއަށް ވުރެ މާ ބޮޑެތި ގައުމުތަކަށް ވުރެ ވަޒީރުންނާއި ސިޔާސީ މަގާމުތައް ގިނަ ކަމަށް ބުނެ، އެމްޑީޕީން މިއަދު ސަރުކާރަށް ފާޑު ކިޔައިފިއެވެ.
މިއަދު އޮތް ރައްޔިތުންގެ މަޖިލީހުގެ ދައުރުން ބޭރު ޖަލްސާއަށް ވަނީ ސަރުކާރުގައި ތިއްބަވާ 22 ވަޒީރުންނަށް ރުހުންދިނުމުގެ މައްސަލަ އެޖެންޑާކޮށްފައެވެ.
އެ މައްސަލައިގެ ބަހުސްގެ ވަގުތުގައި އެމްޑީޕީގެ ފަރާތުން ވާހަކަދައްކަވަމުން މަޖިލީހުގެ ނައިބު ރައީސް އަހުމަދު ސަލީމް ވިދާޅުވީ، މި ސަރުކާރުގައި މާ ވަޒީރުން ގިނަ ކަމަށެވެ. އަދި، ދުނިޔޭގެ ބޮޑެތި ގައުމުތަކަށް ވުރެ މާ މަތިބަރު ކަމަށް ވިދާޅުވެ، އޭނާ ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފައެވެ.
"ރަދީފުގައި އޮންނަނީ ރުހުމުގެ މާނައަކީ ގަބޫލުވުން، ނުވަތަ ހިތްހަމަޖެހުން ކަމަށް،" ސަލީމް މިއަދު ވާހަކަ ފެއްޓެވިއެވެ.
"[މަޖިލީހުގެ ރުހުން ދިނުން] ބިނާވަނީ ގާނޫނު އަސާސީގައި އޮންނަ ފަސް ޝަރުތައް ކަމަށް ވާނަމަ، އަޅުގަނޑު ގަބޫލެއް ނުކުރަން މަޖިލީހަށް މި މައްސަލަ ހުށަހަޅަން ޖެހޭނެ ކަމަކަށް ވެސް. ޝަރުތުތައް ފުރިހަމަ ވޭތޯ ހަމައެކަނި ބަލައިލުން އެއީ މި މަޖިލީހުން ކުރަންޖެހޭ ކަމެއް ކަމަށް ވަނީނަމަ އަޅުގަނޑު ދެކޭ ގޮތުގައި މަޖިލީހުން މި ކުރަނީ ވަރަށް ތާކުންތާކު ނުޖެހޭ ބޭކާރު މަސައްކަތެއް،"
މަޖިލީހުގެ ނައިބު ރައީސް އަހުމަދު ސަލީމް: އޭނާ ވިދާޅުވީ ސަރުކާރު މާ މަތިބަރު ކަމަށް -- ފޮޓޯ/ މަޖިލިސް
އޭނާ ވިދާޅުވީ، ގާނޫނު އަސާސީގައި ބުނާ ފަސް ޝަރުތަކީ ވަރަށް އާދައިގެ ޝަރުތުތަކެއް ކަމަށެވެ. އެހެންވެ، ވަޒީރުންނަށް ރުހުން ދިނުމުގައި އެއަށްވުރެ ފުންކޮށް ވިސްނަންޖެހޭނެ ކަމަށް އޭނާ ވިދާޅުވިއެވެ.
ސަލީމް ވިދާޅުވީ، ގާނޫނު އަސާސީއަށް ބަދަލު ގެނެސްގެން ނަމަވެސް ސަރުކާރުގެ މަގާމުތަކަށް އައްޔަންކުރައްވާ ބޭފުޅުންނަކީ ގާބިލު މީހުންކަން ކަށަވަރު ކުރުމުގެ މަސައްކަތް ކުރަންޖެހިފައިވާ ކަމަށެވެ. އަދި، އެއްވެސް މިނެއް ނެތި ސަރުކާރަށް ބޭފުޅުން އައްޔަންކުރުމުގެ ބާރު ރައީސުލްޖުމްހޫރިއްޔާއަށް ލިބިގެންނުވާނެ ކަމަށް ވެސް އޭނާ ވިދާޅުވިއެވެ.
"ރާއްޖޭގައި 22 ވަޒީރުން އެބަ ތިއްބެވި. ސިންގަޕޫރަށް ވުރެ ވަޒީރުން ގިނަ. ފަސް މިނިސްޓްރީން ހިންގާ ގައުމުތައް އަޅުގަނޑުމެންނަށް ފެނިއްޖެ،" އޭނާ ވިދާޅުވިއެވެ.
އޭނާ ވިދާޅުވީ، ޔޫރަޕިން ޔޫނިއަންއަށް ބެލި ނަމަވެސް ކެބިނެޓުގެ އެވްރެޖު ސައިޒަކީ 17 ކަމަށެވެ. އެހެންވެ، ރާއްޖެ ފަދަ ގައުމެއްގައި 22 ވަޒީރުން ބޭނުންވާ ސަބަބެއް ނުވިސްނޭ ކަމަށް އޭނާ ވިދާޅުވިއެވެ.
ސަރުކާރުގެ މަތިބަރުކަން ފާހަގަކުރައްވައި އޭނާ ވިދާޅުވީ، ޑެޕިއުޓީ މިނިސްޓަރުންނާއި ސްޓޭޓު މިނިސްޓަރުންނާއި މިނިސްޓަރުން އަދި މިނިސްޓަރު ފެންވަރުގައި ތިއްބެވި ބޭފުޅުންގެ މުސާރައަށް އެކަނި ވެސް މަހެއްގެ މައްޗަށް 13 މިލިއަން ރުފިޔާ ޚަރަދުކުރަން ޖެހޭ ކަމަށެވެ.
"މި ދެންނެވި މައްސަލައަކީ ޅެމަކުން ރައިވަރަކުން ހައްލު ހޯދޭން އޮތް ކަމެއް ނޫން،" ޅެމުން ނަފުސާނީ ފަރުވާ ދޭނެ ކަމަށް ސަގާފަތާ ބެހޭ ވަޒީރު ވިދާޅުވި ވާހަކަފުޅަށް އިޝާރާތްކުރައްވާ ސަލީމް މިއަދު ވިދާޅުވިއެވެ.
މި ސަރުކާރުގައި މިހާތަނަށް 22 ވަޒީރުންގެ އިތުރަށް 91 ސްޓޭޓު މިނިސްޓަރުންނާއި 163 ނައިބު ވަޒީރުން އެބަތިއްބެވެ. އަދި، ވަޒީރު ފެންވަރުގައި ވެސް އިތުރު 20 ބޭފުޅުން އައްޔަންކުރައްވާފައި އެބަތިއްބެވެ. އެހެންވެ، އިދިކޮޅު ފަރާތްތަކުން އަންނަނީ ފާޑުކިޔަމުންނެވެ.
މުސާރައާއި އެލަވަންސާ އެކު އެ ބޭފުޅުންނަށް މަހެއްގެ މައްޗަށް 47،000 ރުފިޔާ ލިބިވަޑައިގަންނަވާނެއެވެ. މި ސަރުކާރުގައި މިހާތަނަށް 91 ސްޓޭޓު މިނިސްޓަރުން ތިބީއިރު އެ ބޭފުޅުންގެ މުސާރައަށް މަހެއްގެ މައްޗަށް 4.2 މިލިއަނެއްހާ ރުފިޔާ ޚަރަދުވާނެއެވެ. މުސާރައާއި އެލަވަންސާ އެކު ޑެޕިއުޓީ މިނިސްޓަރަކަށް މަހަކު، 35,500 ރުފިޔާ ލިބިލައްވައެވެ. އައްޔަންކޮށްފައި ތިބި 163 މިނިސްޓަރުންނަށް އެހެންވެ މަހެއްގެ މައްޗަށް 5.7 މިލިއަން ރުފިޔާ ޚަރަދުވާނެއެވެ.
އެއީ، ޖުމުލަ ސްޓޭޓު މިނިސްޓަރުންނާއި ޑެޕިއުޓީ މިނިސްޓަރުންގެ މުސާރައަށް މަހަކު 10 މިލިއަން ރުފިޔާއެވެ.