ރައްޔިތުންގެ މަޖިލީހުގެ މެޖޯރިޓީ އޮތް އެމްޑީޕީގެ މަޖިލިސް މެންބަރުން ގަތުމަށް ސަރުކާރުން ރިޝްވަތު ހުށަހަޅަމުންދާ ކަމުގެ ބޮޑު ތުހުމަތު، އެމްޑީޕީން މިއަދު ކޮށްފިއެވެ.
ރައްޔިތުންގެ މަޖިލީހުގައި މި ވަގުތު ތިބި މެންބަރުންގެ ތެރޭގައި ސަރުކާރު ހިންގާ ޕީޕީއެމް/ޕީއެންސީއަށް ނިސްބަތްވަނީ ހަތަރު މެންބަރުންނެވެ. ސަރުކާރު ކޯލިޝަންގައި ހިމެނޭ އެމްއެންޕީގެ ދެ މެންބަރަކާއި އެމްޑީއޭގެ ދެ މެންބަރުން އެބަތިއްބެވެ. ރައީސާއި ނައިބު ރައީސް އަޒުލް ކުރެވޭ ވަރަށް މަޖިލީހުގެ މެޖޯރިޓީ އޮތީ އިދިކޮޅު އެމްޑީޕީގައެވެ. އެއީ 56 މެންބަރުންނެވެ.
އެމްޑީޕީގެ ގިނަ އަދަދެއްގެ މަޖިލިސް މެންބަރުންތަކެއް ޕީއެންސީއަށް ބަދަލުވާކަމުގެ އަޑުތައް މިވަނީ ވަރަށް ގަދަވެފައެވެ. އަދި މިރޭ ރައީސް ޑރ. މުޙައްމަދު މުއިއްޒު ބައިވެރިވެވަޑައިގަންނަވާ ބޮޑު ޖަލްސާއެއް ޕީއެންސީއިން ދަރުބާރުގޭގައި ބޭއްވުމަށް ތައްޔާރުވަމުން އަންނައިރު އެމްޑީޕީގެ ބައެއް މަޖިލިސް މެންބަރުން މިރޭ ސޮއި ކުރާނެކަން ވަނީ އެނގިފައެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ބައެއް ނޫސް ވެބްސައިޓްތައް ބްލޮކް ކުރުމާ ދެކޮޅަށް ހުށަހެޅި ކުއްލި މައްސަލައަށް ބަހުސް ކުރައްވަމުން، އެމްޑީޕީއަށް ނިސްބަތްވާ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ވިދާޅުވީ މިހާރު ރާއްޖެ މިދަނީ ރާއްޖޭގެ ދުސްތޫރީ ހަޔާތުގައި ވަރަށް ބިރުވެރި، ނާމާން މިސްރާބަކަށް ކަމަށެވެ. މަޖިލީހުގެ މެންބަރުން އިންތިޚާބު ކާމިޔާބު ކުރުމަށް ރައްޔިތުންގެ ގާތުގައި ވީ އެންމެ ބޮޑު ވައުދަކީ ޕާޓީ ބަދަލު ނުކުރުން ކަމަށާއި ނަމަވެސް މެންބަރުން ގަތުމުގެ މަސައްކަތް ސަރުކާރުން މިހާރު ފަށާފައިވާ ކަމަށް އޭނާ ތުހުމަތު ކުރެއްވިއެވެ.
"ޑރ. މުޙައްމަދު މުއިއްޒު އެ މަނިކުފާނުގެ އެންމެ ފުރަތަމަ މަހު ވެސް މި ހަޑިމުޑުދާރު ކުޅިވަރު. މެންބަރުން ގަނެ ވިއްކާ. މި ރައްޔިތުންގެ މަޖިލިސް ހަރާބުގެ މަގަށް ގެންދިއުމުގެ ހަޑި މުޑުދާރު ކުޅިވަރު ފައްޓަވައިފި ކަމުގެ މަލަމަތި ވެސް އެ މަނިކުފާން ދައްކަވައިފި،" މީކާއީލް ވިދާޅުވިއެވެ.
"މި ފަސް އަހަރު މިހެން ނިންމާލައިފި ކަމަށްވާނަމަ މި ރާއްޖެ މި ފަސް އަހަރު ނިމޭއިރު ހޯދާ ނުފެންނާނެ."
އެ ކުއްލި މައްސަލައަށް ބަހުސް ކުރައްވަމުން ކެލާ ދާއިރާގެ އެމްޑީޕީ މެންބަރު އިބްރާހީމް ޝަރީފް ވެސް ވަނީ ހަމަ އެ ތުހުމަތު ސަރުކާރަށް ކުރައްވައިފައެވެ. އޭނާ ވިދާޅުވީ މަޖިލިސް މެންބަރުން ގަތުމަށް ސަރުކާރުން ރިޝްވަތު ހުށަހަޅަމުން ދާ ކަމަށާއި ސަރުކާރުން މިކަން ކުރަނީ ގޮތް ހުސްވެގެން ކަމަށެވެ.
"އަޅުގަނޑުމެންގެ ތެރެއިން އެއްވެސް މެންބަރަކު ނެތް ބައިވަރު އޮފާތަކާއި މުދަލާއި ފައިސާއާ މި އެއްޗެހި ހުށަނާޅާ ހަމަ އެއްވެސް މެންބަރަކު ނެތް،" ޝަރީފް ވިދާޅުވިއެވެ.
މި ސަރުކާރު ކުރިއަށް ދަނީ ދެކޮޅުވާ ކޮންމެ އެއްޗެއް ނައްތާލަމުން ކަމަށް ވެސް ޝަރީފް ވިދާޅުވިއެވެ.
އިދިކޮޅު މަޖިލިސް މެންބަރުންގެ މި ތުހުމަތުތަކާ ގުޅޭގޮތުން ސަރުކާރުގެ އިސް ތަރުޖަމާން މުޙައްމަދު ޝަހީބް ވިދާޅުވީ އެ މެންބަރުން އެ ދެއްކެވީ ދޮގު ވާހަކަތަކެއް ކަމަށެވެ.
އެމްޑީޕީގެ މަޖިލިސް މެންބަރުންނާއި ސަރުކާރުގެ އިސް އޮފިޝަލު ވެސް ވަނީ އެމްޑީޕީގެ ގިނަ އަދަދެއްގެ މެންބަރުން ޕީއެންސީއަށް ސޮއި ކުރަމުން އަންނަކަން "ސަން" އަށް ކަށަވަރު ކޮށްދެއްވައިފައެވެ.