ޔޫވީ އަތުން މާޒިޔާއަށް ފަސޭހަ މޮޅެއް

އެކާވީސް އަހަރުންދަށުގެ ކުޅުންތެރިންނަށް އަމާޒުކޮށްގެން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބާއްވާ ޔޫތު ޗެމްޕިއަންޝިޕްގައި ޔުނައިޓެޑް ވިކްޓަރީ (ޔޫވީ) އަތުން މާޒިޔާ ސްޕޯޓްސް އެންޑް ރެކްރިއޭޝަން ކްލަބު ފަސޭހަ މޮޅެއް ހޯދައިފިއެވެ.

ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު ޔޫތު ޗެމްޕިއަންޝިޕްގެ މެޗުގައި ޔޫވީ އަތުން މާޒިޔާ މޮޅުވެފައިވަނީ 3-0 ގެ ނަތީޖާއަކުންނެވެ.

އެ މެޗުގެ ފުރަތަމަ ހާފުގައި މާޒިޔާއިން ދެ ލަނޑު ކާމިޔާބުކުރިއެވެ. މެޗުގެ ނުވަވަނަ މިނެޓުގައި މާޒިޔާއަށް އިރުފާން އާދަމް ނަސީރު ލީޑު ހޯދައިދިން އިރު، އެ ޓީމުގެ ދެވަނަ ލަނޑު ކާމިޔާބުކޮށްދިނީ ހަސަން ފުވާދެވެ. މެޗުގެ 61 ވަނަ މިނެޓުގައި މާޒިޔާގެ ތިންވަނަ ލަނޑު ކާމިޔާބުކޮށްދިނީ އިބްރާހިމް އަތީގު ހަސަނެވެ.

އެ މުބާރާތުގެ ފުރަތަމަ މެޗުގައި އިއްޔެ އެންމެ ފަހުގެ ޗެމްޕިއަން އީގަލްސްއިން ވަނީ މޮޅެއް ހޯދައިފައެވެ. އިއްޔެ ހަވީރު ކުޅުނު މެޗުގައި އީގަލްސްއިން ވަނީ 1-0 ގެ ނަތީޖާއަކުން ގދ. ތިނަދޫ އަތުން މޮޅުވެފައެވެ.

އެ މުބާރާތުގައި ދެން މެޗެއް ކުޅުމަށް ހަމަޖެހިފައިވަނީ އަންނަ ހޯމަ ދުވަހުއެވެ. އަންނަ ހޯމަ ދުވަހުގެ 15:50ގައި ކުޅޭ މެޗުގައި އީގަލްސްއާއި މާޒިޔާ ބައްދަލުކުރާ އިރު، އެ ދުވަހުގެ 20:00ގައި ކުޅޭ މެޗުގައި ބައްދަލުކުރާނީ ގދ. ތިނަދުއާއި ޔޫވީއެވެ.