ރާއްޖޭގެ ކަނޑުގެ ސަރަހައްދުން ތެޔޮ ފެނި، ދެމެހެއްޓެނެވި ގޮތެއްގައި އޭގެ ވިޔަފާރި ކުރެވެން ފެށިއްޖެ ނަމަ އޭގެ ހެޔޮ ބަދަލު ރާއްޖޭގެ އިގްތިސާދަށް ކުރާނެ ކަމަށް އެސްޓީއޯގެ މެނޭޖިން ޑިރެކްޓަރު އަހުމަދު ޝަހީރު ވިދާޅުވެއްޖެ އެވެ.
"ސަން" އަށް ދެއްވި ޚާއްސަ އިންޓަވިއުއެއްގައި ޝަހީރު ވިދާޅުވީ ރާއްޖޭގެ އިގްތިސާދަށް އެކަމުގެ ސަބަބުން ވަރަށް ބޮޑެތި ބަދަލުތަކެއް އަންނާނެ ކަމަށެވެ. އެގޮތުން ފަތުރުވެރިކަމަށް ބަރޯސާވާން ޖެހޭ މިންވަރު ކުޑަވުމާ އެކު ތެލަށް ކުރާ ޚަރަދު ކުޑަވެ، ބޭރު ފައިސާ ހޯދުމަށް ލުއިތަކެއް ލިބޭނެ ކަމަށް އޭނާ ވިދާޅުވި އެވެ.
"ރާއްޖެ އިން ބޭރުވާ ފޮރިން ކަރަންސީއެއް މިދަނީ ތެޔޮ އެތެރެކުރަން. އޭގެ ސަބަބުން [ތެލުގެ ވިޔަފާރި ފެއްޓިއްޖެ ނަމަ] ވަރަށް ބޮޑު ބަދަލެއް އަންނާނެ ރާއްޖެގެ އިކޮނޮމީއަށް،" ޝަހީރު ވިދާޅުވި އެވެ.
ރާއްޖެއަށް ތެޔޮ އެތެރެ ކުރާ އެންމެ ބޮޑު ކުންފުންޏަކީ އެސްޓީއޯ އެވެ. ޝަހީރު ވިދާޅުވި ގޮތުގައި އެކުންފުނިން ތެޔޮ އެތެރެކުރަނީ ގަލްފުގެ ގައުމުތަކުން ކަމަށެވެ. ނަމަވެސް މަދު ފަހަރެއްގައި "އޮކޭޝަނަލީ" ސިންގަޕޫރުން ވެސް ތެޔޮ އެތެރެކުރާ ކަމަށް އޭނާ ވިދާޅުވި އެވެ.
ހަމައެކަނި ގަލްފުން ތެޔޮ އެތެރެ ކުރާ ސަބަބު ވިދާޅުވަމުން ޝަހީރު ވިދާޅުވީ ރާއްޖެއަށް އެތެރެ ކުރާ ތެލަކީ ވަކި ސްޓޭންޑަޑެއްގެ ތެލެއް ކަމަށެވެ. އެހެން ކަމުން އެތެރެ ކުރާ ތެލަކީ އެ ސްޓެންޑަޑުގެ ތެލެއްކަން ކަށަވަރުކުރުމަށް ޓަކައި އެ ކުންފުނިން ތެޔޮ ގަންނަނީ ގަލްފުގައި ފާހަގަކޮށްލެވޭ ބޮޑެތި ކުންފުނިތަކުން ކަމަށް ވެސް އޭނާ ވިދާޅުވި އެވެ.
"އަޅުގަނޑުމެންނަކީ ވަކި ކޮލިޓީއެއްގެ ތެޔޮ އެތެރެކުރާ ބައެއް. އަޅުގަނޑުމެންނަށް ވަރަށް މުހިއްމު ކޮލިޓީ މެއިންޓެއިން ކުރުން. އެސްޓީއޯ އަކީ އެމްއޭސީއެލްއަށް ވެސް ތެޔޮ ސަޕްލައި ކޮށްދޭ ކުންފުނި. އޭގެ އިތުރުން ރާއްޖޭގަ އަޕް މާކެޓު ބައެއް ރިސޯޓުތަކުން ވެސް އެބަ ޔަގީންކުރަން ބޭނުންވޭ ލޯ ސަލްފާ ހުންނަ ތެޔޮ އެތެރެކުރަން. އެހެންވެ ލޯ ސަލްފާ ހުންނަ ތެޔޮ އެތެރެކުރަން އެސްޓީއޯ އިން ވަރަށް މުހިއްމު ކަމެއް ދޭ،" ޝަހީރު ވިދާޅުވި އެވެ.
މީގެ އިތުރުން ޝަހީރު ވިދާޅުވީ އެކުންފުނީގެ ތެލުގެ ސްޓޮރެޖް އިތުރު ކުރުމަށް މަސައްކަތްތަކެއް ކުރަމުން އަންނަ ކަމަށާއި، މި އަހަރުގެ ތެރޭގައި އައްޑޫ ސިޓީ ގަމުގައި 8000 ޓަނުގެ އިތުރު ސްޓޮރެޖެއް ގާއިމްކޮށް ހުޅުވުމަށް ނިންމާފައިވާ ކަމަށެވެ. އަދި ކުރިއަށް އޮތް ދެތިން މަސް ދުވަސް ތެރޭ ފުނަދޫގެ ސްޓޮރެޖް ބޮޑު ކުރުމުގެ މަސައްކަތް ވެސް ނިމޭނެ ކަމަށް އޭނާ ވިދާޅުވި އެވެ.
ރާއްޖެ އިން ތެޔޮ ފެނިއްޖެ ނަމަ އެކަމުގެ ފައިދާ ދިވެހި އިގްތިސާދަށް ކުރާނެ ކަމުގެ ޔަގީންކަން ޝަހީރު ދެއްވި އިރު، ފިޝަރީސް މިނިސްޓަރު ޑރ. މުހައްމަދު ޝައިނީ މީގެ ކުރިން ވަނީ ރާއްޖެއިން ތެޔޮ ފެނިފައިވާ ކަމަށް ވިދާޅުވެފަ އެވެ. ނަމަވެސް މިނިސްޓަރު ވިދާޅުވީ ތެޔޮ ނެގުމުގެ މަސައްކަތުގެ ދެވަނަ ސްޓޭޖުގައި ކުރަން ޖެހޭ ކަންކަން ކުރާނެ ފަރާތްތައް ހޯދުމަށް ދުނިޔޭގެ ބައެއް ހިސާބުތަކަށް ދަތުރުކޮށް، ކަމާ ބެހޭ ތަޖުރިބާކާރުންނާ މަޝްވަރާކުރިކުރުމުން ލިބުނު މައުލޫމާތުގެ އަލީގައި ސަރުކާރުން ނިންމީ މިވަގުތަށް މަޑުކޮށްލައިގެން ތިބުމަށް ކަމަށެވެ.