ނޫސްވެރިންގެ ބައްދަލުވުމެއްގައި އެމްޕީއެލްގެ ސީއީއޯ މުހައްމަދު ޖުނައިދު، ރައްޔިތުންގެ މަޖިލީހުގެ ވިލިފުށީ ދާއިރާގެ މެމްބަރު ރިޔާޒް ރަޝީދު ހިންގާ، މެރީޑިއަމް ކުންފުންޏާ ގުޅޭ ގޮތުން ދޮގު މައުލޫމާތު ދެއްވި ކަމަށާއި އެ ހަބަރު މީޑިއާގައި ފެތުރި މައްސަލަ މީޑިއާ ރެގިއުލޭޓަރުންނަށް ހުށަހަޅައިފިި އެވެ.
"ސަން" އަށް މައުލޫމާތު ދެއްވަމުން ރިޔާޒު ވިދާޅުވީ ޖުނައިދުގެ ވާހަކަތަކާ ގުޅިގެން ކުންފުންޏަށް ގެއްލުން ވަމުންދާ ކަމަށާއި އެހެން ކަމުން ބަދަލު ހޯދުމަށް ޓަކައި ކޯޓުގައި ދައުވާ ކުރާނެ ކަމަށެވެ.
ރިޔާޒް ވިދާޅުވި ގޮތުގައި، މޯލްޑިވްސް މީޑިއާ ކައުންސިލް (އެމްއެމްސީ)އަށް މިހާރު މައްސަލަ ވަނީ ހުށަހަޅައިފަ އެވެ. އެ މައްސަލަ ހުށަހަޅާފައި ވަނީ "އަވަސް"، "ސަން" އަދި "މިހާރު" ނޫހާ ދެކޮޅަށް ކަމަށް ވެސް އޭނާ ވިދާޅުވި އެވެ.
މީގެ އިތުރުން އެ ހަބަރު ދެއްކި ޓީވީތަކުގެ މައްސަލަ ބްރޯޑްކާސްޓިން ކޮމިޝަނަށް ހުށަހަޅާފައިވާ ކަމަށް ވެސް ރިޔާޒް ވިދާޅުވި އެވެ. އެގޮތުން މައްސަލަ ހުށަހަޅާފައި ވަނީ ރާއްޖެ ޓީވީ، ސަންގު ޓީވީ އަދި ޗެނަލް 13 އާ ދެކޮޅަށެވެ.
ޖުނައިދު ދެއްކެވި ވާހަކަ، އޭނާ ދެއްކެވި ގޮތަށް ގެނެސްދީފައިވި ނަމަވެސް، ރިޔާޒް ވިދާޅުވީ އެފަދަ ޚަބަރެއް ގެނެސްދިން އިރު އެއްވެސް މީޑިއާ އަކުން މެރީޑިއަމްގެ ބަހެއް ހޯދާފައި ނުވާ ކަމަށެވެ.
"ޚަބަރު އާންމުކޮށްފައި ފަހުން ބަދަލު ކުރިޔަސް ނުވާނެ ދެއްތޯ އާންމު ނުކުރާ ކަމަކަށް. އަދި ފަހުން ޚަބަރު ނެގިޔަސް ނުވާނެ ޚަބަރު އާންމު ނުކުރާ ކަމަކަށް،" ރިޔާޒް ވިދާޅުވި އެވެ.
އެ މައްސަލަ އަދި ފައިލްކޮށްފައި ވަނީ މީޑިއާ ރެގިއުލޭޓްކުރާ އިދާރާތަކާ ކަމަށްވީ ނަމަވެސް ފަހުން އަދި ކޯޓަށް ވަޑައިގަންނަވާނެ ކަމަށް ރިޔާޒް ވިދާޅުވި އެވެ.
އެމްޕީއެލްގެ ސީއީއޯ މުހައްމަދު ޖުނައިދު ކުރިން ވިދާޅުވީ، އެ ކުންފުންޏަށް ތެޔޮ ސަޕްލައި ކުރުމަށް މެރީޑިއަމަށް ހަވާލުކޮށްފައި ވަނީ ބިޑްކުރުމެއް ނެތި ކަމަށެވެ. އަދި ތެޔޮ ސަޕްލައި ކުރުމުގައި އެމްޕީއެލުން އަމަލުކުރާ ގޮތުން މިލިއަނުން ގެއްލުންތަކާ ކުރިމަތިވާ ކަމަށް ޖުނައިދު ވިދާޅުވި އެވެ.
"މިތަނަށް ތެޔޮ ސަޕްލައިކުރަނީ މެރީޑިއަމުން. މިތަނަށް ތެޔޮ ސަޕްލައި ކުރަނީ 12 ރުފިޔާއަށް ލިޓަރެއް. މިއަދު މާކެޓުގައި އަޅުގަނޑުމެން ކުރި އިއުލާނާ ގުޅިގެން އަގުތައް ލިބިފައި ހުރީ 6.90 ރުފިޔާ އަށް ލިޓަރެއް. އެހެންވީމާ ސަރުކާރަށް، ދައުލަތަށް ވަރަށް ބޮޑެތި ގެއްލުންތަކެއް އެވަނީ." މިދިޔަ އޮކްޓޫބަރު މަހު 12 ވަނަ ދުވަހު ބޭއްވި ނޫސްކޮންފަރެންސެއްގައި ޖުނައިދު ވިދާޅުވި އެވެ.
އެމްޕީއެލް އަށް ތެޔޮ ސަޕްލައިކުރަން މެރީޑިއަމް އަށް ދީފައި ވަނީ ރަނގަޅަށް ކަމަށާއި އެ ނޫން ބަޔަކަށް ތެޔޮ ސަޕްލައި ކުރުން ނުދިނުމަށް އަންގައި ސިވިލް ކޯޓުން ވަގުތީ އަމުރެއް ނެރުނެވެ. އަދި އެ އަމުރު މުރާޖާ ކޮށްދިނުމަށް އެމްޕީއެލްގެ ފަރާތުން ސިވިލް ކޯޓުގައި އެދުމުން، އެ އަމުރަށް ބަދަލު ގެންނަން ނުޖެހޭ ކަމަށް ސިވިލް ކޯޓުން ވަނީ ބުނެފަ އެވެ. ނަމަވެސް އެމްޕީއެލް އިން ވަނީ އެ މައްސަލަ ހައި ކޯޓުގައި އިސްތިއުނާފުކޮށްފަ އެވެ.