މިދިޔަ ހޯމަ ދުވަހު ކޯސްޓްލައިން ހާޑްވެއާގައި އަލިފާނުގެ ހާދިސާ ހިނގަން މެދުވެރިވި ސީދާ ސަބަބެއް ބުނެދޭން އަދި ނޭނގޭ ކަމަށާއި އެކަމުގެ ތަހުގީގު ކުރަމުން އަންނަ ކަމަށް ކަމާބެހޭ އިދާރާތަކުން ބުނެފިއެވެ.
އެމްއެންޑީއެފްގެ ފަޔާ އެންޑް ރެސްކިއު ކޮމާންޑަރު ކާނަލް އަބްދުﷲ ޒުހުރީ މިއަދު ސަން އަށް ވިދާޅުވީ، އަލިފާންރޯވީ ހާޑްވެއާގެ ކޮން ލޮކޭޝަނެއްގައި ކަން ދެނެގަނެވިފައިވާއިރު އަލިފާން ރޯވަން ދިމާވި ސަބަބުވެސް ތަހުގީގު ކުރަމުން އަންނަ ކަމަށެވެ.
ފުލުހުންނާއި ސިފައިންވެސް އެހާދިސާ ތަހުގީގު ކުރަމުން އަންނައިރު އޭގެ ތަފްސީލް އަދި ހާމަކުރެވެން ނެތް ކަމަށް ޒުހުރީ ވިދާޅުވިއެވެ.
ފުލުހުންގެ އިންފޮމޭޝަން އޮފިސަރު އިސްމާއިލް އަލީ މިއަދު ސަން އަށް ވިދާޅުވީ، މިހާތަނަށް ދެވެންއޮތް ތަފްސީލަކީ "އެމައްސަލަ ތަހުގީގު ކުރަމުން އަންނަކަން" ކަމަށެވެ.
ހޯމަ ދުވަހު ކޯސްޓްލައިން ހާޑްވެއާގައި ރޯވި އަލިފާންގަނޑު ކޮންޓްރޯލު ކުރެވުނީ ތިން ގަޑިއިރުގެ މަސައްކަތުންނެވެ. އެ އަލިފާންގަނޑު ޖުމްލަ ތިން ގެޔަކަށް ފެތުރިފައިވާ އިރު، އެ ހާދިސާގައި ގެއްލުން ލިބުނު ގިނަ ބަޔަކަށް ސަރުކާރުން ވަނީ، ބޯހިޔާވަހިކަން ފޯރުކޮށްދީފަ އެވެ.
އަލިފާނުގެ ހާދިސާގައި، އެ އިމާރާތުގެ ވަށައިގެން ހުރި ގެތަކަށް ގެއްލުންވުމުން ކޯސްޓްލައިން އިންވެސްޓްމެންޓުން އެ ގެތަކަށް އެއް މިލިޔަން ރުފިޔާގެ ފައިސާގެ އެހީއެއްވަނީ ދީފައެވެ.