ޓްރިވެންޑްރަމް، އިންޑިއާ (27 ޑިސެމްބަރު) - ސާފް ސުޒުކީ ކަޕްގައި މާދަމާ ހަވީރު ރާއްޖެއާއި އަފްޣާނިސްތާން ވާދަކުރާ މެޗުބަލަން ދަނޑަށްދާ ދިވެހި ސަޕޯޓަރުން ދަނޑުގެ އެއް ބްލޮކެއްގައި ތިބެގެން ގައުމީ ޓީމަށް ސަޕޯޓްކުރެވޭނެ އިންތިޒާމް ހަމަޖެއްސުމަށް މަސައްކަތްކުރަމުން ދާ ކަމަށް ޓްރިވެންޑްރަމްގައި ހުންނަ ދިވެހިރާއްޖޭގެ ކޮންސިއުލޭޓުން ބުނެފި އެވެ.
ކޮންސިއުލޭޓުން މިއަދު ބުނީ، މާދަމާ ހަވީރު 6:30ގައި ރާއްޖެއާ އަފްޣާން ބައްދަލުކުރާ މެޗުގެ ޓިކެޓް، ޓްރިވެންޑްރަމް އިންޓަނޭޝަނަލް ސްޓޭޑިއަމްގެ އެއް ސަރަހައްދަކުން ހޯދުމަށް ދިވެހި ކޮންސިއުލޭޓާއި ރާއްޖޭގެ ފުޓްބޯޅައިގެ މައި އިދާރާ ގުޅިގެން މަސައްކަތްކުރަމުން ދާކަމަށެވެ.
ޑިސެމްބަރު 26، 2015؛ އިންޑިއާގެ ޓްރިވެންޑްރަމްގައި ކުރިއަށްދާ ސާފް ސުޒުކީ ކަޕްގައި ރާއްޖެ އާއި ބަނގުލަދޭޝް ބައްދަލު ކުރި މެޗުގެ ތެރެއިން-- ސަން ފޮޓޯ/ ފަޔާޒު މޫސާ
އާއި ބަނގުލަދޭޝް ބައްދަލު ކުރި މެޗުގެ ތެރެއިން-- ސަން ފޮޓޯ/ ފަޔާޒު މޫސާ
އެގޮތުން ސަޕޯޓަރުން ދިވެހި ސަޕޯޓަރުން ދަނޑުގެ އެކި ސަރަހައްދު ތަކުގައި ތިބުމުގެ ބަދަލުގައި އެއް ބްލޮކެއްގައި ތިބެގެން ސަޕޯޓް ކުރެވޭނެ އިންތިޒާމް، މުބާރާތް އިންތިޒާމް ކުރާ ފަރާތާ މަޝްވަރާ ކޮށްގެން ހަމަޖެހޭތޯ ކޮންސިއުލޭޓާއި އެފްއޭއެމުން މަސައްކަތްކުރަމުން އަންނަކަމަށް ކޮންސުލް އަލީ އާދަމް (އަލިބެ) ވިދާޅުވިއެވެ.
"އަޅުގަނޑުމެން އެގޮތަށް ހަމަޖެއްސުމުގެ އެންމެ ބޮޑު ބޭނުމަކީ، ދިވެހި ސަޕޯޓަރުން ދަނޑުގެ އެއް ސަރަހައްދެއްގައި ތިބެގެން ފޯރިއާއެކު އެންމެން އެއްކޮށް ގައުމީ ޓީމަށް ތަރުހީބުދިނުމުގައި ބައިވެރިވުން،" އަލިބެ ވިދާޅުވިއެވެ.
އަލިބެ ވިދާޅުވީ، ގައުމީ ސާފް ސުޒުކީ ކަޕްގައި ގައުމީ ޓީމު ކުޅޭ ތިންވަނަ މެޗު ބަލަން ދިވެހި ސަޕޯޓަރުންނަށް ދަނޑުގެ އެއް ސަރަހައްދެއްގައި ތިބުމުގެ ފުރުސަތު ތަނަވަސް ވާނޭ ކަމުގެ ވަރަށް ބޮޑު އުންމީދެއް އެބަ އޮތްކަމަށެވެ.
"އިންތިޒާމްތައް ހަމަޖެއްސުމަށް ފަހު، ދިވެހި ސަޕޯޓަރުންނަށް ޓިކެޓް ދޫކުރާނެ ގަޑިތައް އަޅުގަނޑުމެން އަންގާލަދޭނަން،" އަލިބެ ވިދާޅުވިއެވެ.
ޑިސެމްބަރު 26، 2015؛ އިންޑިއާގެ ޓްރިވެންޑްރަމްގައި ކުރިއަށްދާ ސާފް ސުޒުކީ ކަޕްގައި ރާއްޖެ އާއި ބަނގުލަދޭޝް ބައްދަލު ކުރި މެޗުގެ ތެރެއިން-- ސަން ފޮޓޯ/ ފަޔާޒު މޫސާ
މިފަހަރުގެ މުބާރާތުގެ ރާއްޖެ މިހާތަނަށް ކުޅުނު ދެމެޗު ބެލުމަށްވެސް ދިވެހީންގެ ގިނަ ބަޔަކު ދަނޑަށް ވަދެފައިވާއިރު، އޭގެ ތެރެއިން ގިނަ ޓިކެޓަކީ ކޮންސިއުލޭޓާއި އެފްއޭއެމް ގުޅިގެން ކުރި މަސައްކަތުން ހިލޭ ބަހާފައިވާ ޓިކެޓްކަން ފާހަގަކޮށްލަން ޖެހެއެވެ. އެގޮތުން ރާއްޖެ ކުޅުނު ފުރަތަމަ މެޗަށް 1500އަށް ވުރެ ގިނަ ޓިކެޓް ހިލޭ ބަހާފައިވާއިރު، އިއްޔެ ބަނގުލަދޭޝްއާ ދެކޮޅަށް ރާއްޖެ ކުޅުނު މެޗަށް 2500އަށް ވުރެ ގިނަ ޓިކެޓް ބަހާފައިވާ ކަމަށް ކޮންސިއުލޭޓުން ވަނީ ބުނެފައެވެ.