ޝަންގްރިއްލާ، ވިލިގިނލި ރިސޯޓުގެ ގަހަނާ ފިހާރައެއް ފަޅާލައި ގަހަނާ ވަގަށްނެގި ކަމުގެ ތުހުމަތުގައި އެރިސޯޓުގެ ތިން މުވައްޒަފަކު ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލް ވިދާޅުވީ، އެ މައްސަލައިގައި ކޯޓު އަމުރެއްގެ ދަށުން 36 އަހަރުގެ ފިރިހެނަކާއި 26 އަހަރުގެ ދެ ފިރިހެނުން ހައްޔަރުކޮށްފައިވާ ކަމަށެވެ. އެ އެންމެންނަކީ ވެސް ދިވެހީން ކަމަށް ވިދާޅުވި އެވެ.
ސަން އަށް ކަށަވަރުވެފައިވާގޮތުގައި އެ ތިން މީހުންނަކީވެސް އެރިސޯޓުގެ މުވައްޒަފުންނެވެ.
އެމީހުންގެ ބަންދުގެ މުއްދަތު މިހާރު ވަނީ 15 ދުވަހަށް ކޯޓުން އިތުރުކޮށްފައެވެ.
ސަން އަށް އެނގިފައިވާ ގޮތުގައި އެ ގަހަނާ ފިހާރައިން ވަނީ އަގުބޮޑެތި ގަހަނާތަކެއް ވަގަށް ނަގައިފައެވެ. ނަމަވެސް ޝަންގްރިއްލާ އަށް ގުޅަން ކުރި މަސައްކަތް ކާމިޔާބު ނުވުމުން އޭގެ ތަފްސީލް ލިބޭގޮތް ވަނީ ނުވެފައެވެ.
އެ ރިސޯޓުގައި ވައްކަމުގެ މައްސަލައެއް ހިނގާފައިވާ އިރު މީގެ އެއް މަސް ކުރިން ވަނީ އެ ރިސޯޓުން 68،000 ޑޮލަރު (1.04 މިލިއަން ރުފިޔާ) އަށް ހިޔާނާތްތެރިވި ކަމުގެ ތުހުމަތުގައިވެސް އެތަނުގެ މުވައްޒަފަކު ހައްޔަރުކޮށްފައެވެ.
ރިސޯޓުގެ ގިނަ އަދަދެއްގެ ފައިސާ އަށް ހިޔާނާތްތެރިވި މައްސަލަ ފުލުހުން މިހާރު ދަނީ ތަހުގީގު ކުރަމުން ކަމަށް މީޑިއާ އޮފިޝަލް ވިދާޅުވި އެވެ.