އޮންލައިން ނޫސް ''އަަދަދު''ގެ އޮފީސް ފުލުހުން ރޭ ބަލައިފާސްކުރި މައްސަލައިގައި މީޑިއާތަކުގެ ބެލެނިވެރި ފަރާތް، މީޑިއާ އެންޑް ބްރޮޑްކާސްޓިން ކޮމިޝަނުން މިއަދު ނެރުނު ބަޔާނެއްގައި، ފުލުހުންގެ ތަހުގީގީ މިންގަނޑުތައް ކަނޑައެޅުމުގެ ގާނޫނީ ބާރެއް ނެތް ކަމަށް ބުނެފިއެވެ.
ރައީސް ޑރ. މުހައްމަދު މުއިއްޒަށް ބޮޑެތި ތުހުމަތުތަކެއް އަމާޒުވާ ގޮތަށް މިދިޔަ މަހު އާންމުކުރި ޑޮކިއުމަންޓްރީއެއްގެ މައްސަލައިގައި އަދަދު ނޫސް ހިންގާ އޮފީހަށް ރޭ ފުލުހުން ވަނީ ވަދެފައެވެ. އަދި އެ ނޫހުގެ މަސައްކަތަށް ދަތިވާ ގޮތަށް ގިނަ އަދަދެއްގެ އިލެކްޓްރޯނިކް އާލާތްތައް ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.
އޭގެ ފަހުން އެ ނޫހުގެ ސީއީއޯ ޙުސައިން ފިޔާޒް މޫސާއާއި މެނޭޖިން އެޑިޓަރު ޙަސަން މުޙައްމަދުގެ ޕާސްޕޯޓް ހިފަހައްޓައި، ދެ މީހުން ފުލުހަށް ހާޒިރުވާން ވެސް ވަނީ އަންގައިފައެވެ.
އެ ފިޔަވަޅުތައް އެޅިއިރު، މީޑިއާ ކޮމިޝަނުން ވަކި އެއްޗެކޭ ބުނެފައި ނުވާތީއާއި، ސުވާލު ކުރުމުން ވެސް ޖަވާބެއް ދީފައި ނުވާތީ ކޮމިޝަނަށް ވަނީ ވަރަށް ބޮޑަށް ފާޑުކިޔުން އަމާޒުވެފައެވެ.
އެ ފާޑުކިޔުންތައް އަމާޒުވި ފަހުން މީޑިއާ ކޮމިޝަނުން ނެރުނު ބަޔާނެއްގައި ވަނީ، އެ ކޮމިޝަނަކީ ނޫސްވެރިކަމުގެ މިނިވަންކަން ފުޅާ ދާއިރާއެއްގައި ދެމެހެއްޓުމުގައި, ރެގިއުލޭޓަރެއްގެ ހައިސިއްޔަތުން އިދާރީ ގޮތުން ކަނޑައަޅަން ޖެހޭ މިންގަނޑުތައް ތަންފީޒުކުރުމަށް ގާނޫނުން މަތިކޮށްފައިވާ އިދާރާއެއް ކަމަށެވެ.
ތަހުގީގަށް ބޭނުންވާ މައުލޫމާތު ހޯދުމުގައި އަމަލުކުރަން ޖެހޭ މިންގަނޑުތައް ކަނޑައެޅުމުގެ ބާރު އެ ކޮމިޝަނަށް ލިބިފައިވާ ނުވާ ކަމަށް އެ ބަޔާނުގައި ވަނީ ބުނެފައެވެ.
ފުލުހުން އަދަދުގެ އޮފީސް ކުރިމަތީގައި: ފުލުހުން ވަނީ އަަދަދުގެ އޮފީސް ބަލައިފާސްކޮށްފައި -- ސަން ފޮޓޯ/ އަހުމަދު އިޔާދު
ނަމަވެސް، މީޑިއާތަކުން އާންމުކުރާ ކޮންޓެންޓާ ގުޅުންހުރި މައްސަލަތައް ބަލައި، ތަހުގީގު ކުރުމާއި އިދާރީ ފިޔަވަޅު އަޅަން ޖެހޭ ހާލަތްތަކުގައި އެކަން ކުރާނެކަން ކޮމިޝަނުން ފާހަގަކުރިއެވެ.
އަދަދު ނޫހުގެ އޮފީހަށް ފުލުހުން ވަތް މައްސަލައިގައި ނޫސްވެރިންގެ ޖަމިއްޔާ އެމްޖޭއޭން ވަނީ ނުރުހުން ފާޅުކޮށްފައެވެ. އަދި، ބައެއް ނޫސްވެރިން ވަނީ އެ އޮފީސް ކުރިމަތީގައި ސުލްހަވެރި އިހުތިޖާޖެއް ވެސް ކޮށްފައެވެ.
ފާހަގަކޮށްލެވޭ ގޮތުގައި މިހާރު އޮތް މީޑިއާ ކޮމިޝަނަކީ ރާއްޖޭގައި މީޑިއާ ރެގިއުލޭޓް ކުރުމަށްޓަކައި މީގެ ކުރިން އޮތް ބްރޯޑްކާސްޓިން ކޮމިޝަނާއި މީޑިއާ ކައުންސިލް އުވާލުމަށް ފަހު، މި ސަރުކާރުގައި އުފެއްދި ކޮމިޝަނެކެވެ. އެ ކޮމިޝަން ވުޖޫދުކޮށްފައިވަނީ، ނޫސްވެރިންގެ ފާޑުކިޔުން ވަރަށް ބޮޑަށް އަމާޒުވި ގާނޫނެއް ފާސްކޮށްގެންނެވެ.