ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކުރުމަށް ގޮވާލައި، ޕެޓިޝަނެއްގައި ސޮއިކުރަން ފަށައިފިއެވެ.
އޮންލައިންކޮށް، ސޮއިކުރެވޭ އެ ޕެޓިޝަންގައި ވަނީ، މަޖިލީސް މެންބަރުންނަށް ދޭ މުސާރަ ކުޑަކޮށް، އެ މެންބަރުންނާއި އާއިލާތަކަށް ދޭ ހެލްތު އިންޝުއަރެންސް ކަނޑާލުމަށާއި ކުރީގެ މެންބަރުންނަށް ދޭ އެލަވަންސްތައް ކަނޑާލުމަށް ގޮވާލާފައެވެ. އަދި، ރައްޔިތުންނެކޭ އެއްގޮތަށް މެންބަރުންނަށް އާސައިންގެ ޚިދުމަތް ދޭން ވެސް ގޮވާލައިފައިވެއެވެ.
އެ މެންބަރުންނަށް ލިބޭ މުސާރައިގެ އިތުރަށް އިނާޔަތްތަކާ ޗުއްޓީއާ ބަލާއިރު، އެކަށީގެންވާ ވަރަށް މަސައްކަތް ނުކުރާ ކަމަށް ޕެޓިޝަނުގައިވެއެވެ.
ރާއްޖޭގެ އިގުތިޞާދު ދަށްވަމުން އަންނަ މި ދަނޑިވަޅުގައި އާންމު ރައްޔިތުންނަށް ލިބޭ މުސާރައާ ނުބައްދަބަލު އާމްދަނީއެއް ދިނުމަކީ ބޭއިންސާފެއް ކަމަށް ޕެޓިޝަނުގަިއ ވަނީ ފާހަގަކޮށްފައެވެ.
އެކަން ކުރަން މިހާރު ވެސް ލަސްވެފައިވާކަން ފާހަގަކޮށް، ޕެޓިޝަންގައިވަނީ، ބޭނުމަކީ އެކަމަށް ބޭނުންވެފައި ތިބި މީހުންގެ ނިސްބަތް ބަލާލުން ކަމަށެވެ.
ފާހަގަކޮށްލެވޭ ގޮތުގައި، ރައްޔިތުންގެ މަޖިލީހުގެ މެންބަރުންނަށް މުސާރައާ އެލަވަންސްގެ ގޮތުގައި މަހަކަށް 82،500 ރުފިޔާ ލިބެއެވެ. އެއީ، މެންބަރުން އަމިއްލައަށް ގާނޫނެއްގެ ޒަރިއްޔާއިން ކަނޑައަޅާ މުސާރައެކެވެ. މިދިޔަ 19 ވަނަ މަޖިލީހުގައި މެންބަރުންނާއި ދައުލަތުގެ ވެރިންގެ މުސާރަ ބޮޑުކުރަން ވެސް މަޝްވަރާކުރިއެވެ. އެކަމަކު، ފާޑުކިޔުން ބޮޑުވުމުން އެ މަސައްކަތް ހުއްޓާލީއެވެ.
އޭގެ އިތުރުން ވެސް މެންބަރުންނާއި މެންބަރުންގެ އާއިލާތަކަށް އާސިއާންގެ ގައުމުތަކުން ހިލޭ ބޭސް ކުރެވެއެވެ.
މީގެ ކުރިން ތަފާތު އެކި ފަހަރު މަތިން މެންބަރުންގެ މުސާރަ ކުޑަކުރަން ތަޅުމުގައި ވެސް ބަހުސްކުރިއެވެ. އެކަމަކު، އެ ކަމަށް މެންބަރުންގެ ފަރާތުން ތާއީދެއް ނުލިބެއެވެ.
މާލީ ދަތިތަކުގެ ސަބަބުން މެންބަރުންގެ މުސާރައިން 10 އިންސައްތަ އުނިކުރަން ރައީސް ޑރ. މުހައްމަދު މުއިއްޒު ނިންމެވި ގޮތަށް އެ ކަންތައް ވެސް ކުރެވެން ނެތް ކަމަށް މި ހިނގާ 20 ވަނަ މަޖިލީހުން ވެސް ވަނީ ނިންމާފައެވެ. މާލިއްޔަތު ކޮމިޓީން އެ ގޮތަށް ނިންމީ ގާނޫނު މިހާރު އޮތް ގޮތުން އެކަން ކުރެވެން ނެތް ކަމަށް ބުނެއެވެ.