ދިވެހިރާއްޖޭގައި 2013 އިން 2018 އަށް ވެރިކަންކުރި, ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) މިއަދު އުވާލައިފިއެވެ.
އިލެކްޝަންސް ކޮމިޝަން (އީސީ)އިން މިއަދު ކުރި އިއުލާނެއްގައި ބުނީ ސިޔާސީ ޕާޓީގެ ޤާނޫނުގެ 30 ވަނަ މާއްދާގައިވާ ގޮތުގެ މަތިން ޕީޕީއެމް އުވާލުމަށް އެ ޕާޓީގެ ސެނެޓުން ނިންމައި، ފުރިހަމަ ކުރަންޖެހޭ ކަންކަން ފުރިހަމަކޮށް އެ ކޮމިޝަނަށް ހުށަހަޅާފައިވާ ކަމަށެވެ.
އެހެންކަމުން މިއަދުން ފެށިގެން ޕީޕީއެމް އުވާލައި، އެ ޕާޓީ ސިޔާސީ ޕާޓީގެ ދަފްތަރުން އުނިކުރިކުރުމަށް ކޮމިޝަނުން ނިންމާފައިވާ ކަމަށް އީސީން ބުންޏެވެ.
ޕީޕީއެމްގެ ސެނެޓުން ޕާޓީ އުވާލުމަށް ނިންމާފައި ވަނީ ޑިސެމްބަރު 2، 2024ގައެވެ.
ޑީއާރުޕީތެރޭގައި އުފެދުނު ދެބަސްވުންތަކާ ގުޅިގެން އުފެއްދި, ޕީޕީއެމް ރަސްމީކޮށް ރަޖިސްޓްރީކުރީ އޮކްޓޫބަރު 27، 2011 ގައެވެ. އެ ޕާޓީއަކީ އެންމެ ކުރު މުއްދަތެއްގައި ވެރިކަމަށް އައި އެއް ޕާޓީއެވެ. މިދިޔަ އަހަރުގެ ސެޕްޓެމްބަރު 19 އާ ހަމައަށް ވެސް އެ ޕާޓީގައި 34،694 މެންބަރުން ތިބި ކަމަށް އީސީގެ ވެބްސައިޓުން ދައްކައެވެ.
ޕީޕީއެމްގެ ސެނެޓު ބައްދަލުވުމުގެ ތެރެއިން--
ފާހަގަކޮށްލެވޭ ގޮތުގައި ޕީޕީއެމް/ޕީއެންސީގެ ކޯލީޝަނުން އުފެދުނު މި ސަރުކާރު އުފެދުނު ފަހުން ޕީޕީއެމަށް މެންބަރުން އިތުރުކުރަން އެއްވެސް ހަރަކާތެއް ނުހިންގާ ކަމަށް އެ ޕާޓީން މައުލޫމާތު ދީފައިވެއެވެ. އަދި، 7،416 އަށްވުރެ ގިނަ މެންބަރުން ޕާޓީ ދޫކޮށްލާފައިވާ ކަމަށް އެ ޕާޓީން މީގެކުރިން ބުންޏެވެ.
މިސަރުކާރުން ވެރިކަމަށް އައިއިރު ވެސް ޕީއެންސީގައި ތިބީ އެންމެ 3،000 އެއްހައި މެންބަރުންނެވެ. ޕީޕީއެމާއި ޕީއެންސީ ދެ ޕާޓީއެއް ނަމަވެސް، ކޯލިޝަން ހިންގާފައިވަނީ ޖޮއިންޓް ކޯލިޝަނަކުން ދެ ޕާޓީގައި އަބަދު ވެސް އެއް ލީޑަރަކު ހުންނަވައިގެންނެވެ.
ކުރިން އެ ޕާޓީގެ ލީޑަރަކަށް ހުންނެވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމެވެ.
މިދިޔަ ރިޔާސީ އިންތިޚާބުގައި ވެސް ޕީޕީއެމްގެ ޓިކެޓުގައި އެ މަނިކުފާނު ވާދަކުރައްވަން ފޯމު ހުށަހެޅުއްވިއެވެ. އެކަމަކު، އޭރު އެ މަނިކުފާނު ޖަލު ހުކުމެއްގައި ހުންނެވުމުން އިންތިޚާބުގައި ވާދަނުކުރެއްވޭނެ ކަމަށް ސުޕްރީމް ކޯޓުން ހުކުމްކުރީއެވެ.
ސެނެޓުގައި ޕްރައިމަރީއެއް ބާއްވާފައި ޕީއެންސީގެ ޓިކެޓުގައި ކެންޑިޑޭޓަކު ނެރެން ނިންމީ، ޔާމީނަށް ވާދަނުކުރެއްވިދާނެ ހާލަތެއް އަތުވެދާނެތީއެވެ. ރައީސް ޑރ. މުހައްމަދު މުއިއްޒު ޕީއެންސީގެ ޓިކެޓުގައި ވާދަކުރެއްވީ އެހެންވެއެވެ.
ރައީސް މުއިއްޒަށް އިންތިޚާބު ކާމިޔާބުވެ، ހުވައިކުރެއްވިތާ ހަފުތާއެއް ނުވަނީސް ޔާމީން ވަނީ ޕީޕީއެމުން ވަކިވެ އަމިއްލަފުޅު އާ ޕާޓީއެއް އުފެއްދެވުމުގެ މަސައްކަތް ފައްޓަވާފައެވެ. އެއީ، ޕީޕަލްސް ނެޝަނަލް ފްރަންޓް (ޕީއެންއެފް)އެވެ. އޭގެ ފަހުން ޕީޕީއެމް/ޕީއެންސީ ކޯލީޝަންގެ ލީޑަރުކަމަށް ރައީސް މުއިއްޒު ވަނީ އިންތިޚާބުކޮށްފައެވެ.
އެ މަނިކުފާނު ޕީޕީއެމްގެ ބަދަލުގައި ހިންގެވީ ޕީއެންސީއެވެ.
ސަރުކާރަށް އަހަރުވީއިރު ޕީއެންސީ މިހާރު މިވަނީ ރާއްޖޭގެ ތާރީޚުގައި ވެސް އެންމެ މެންބަރުން ގިނަ، އެންމެ ބޮޑު ޕާޓީއަށް މިހާރު ވެފައެވެ. އެގޮތުން އީސީގެ ދަފްތަރުގައި މިހާރު ޕީއެންސީގައި 68،968 މެންބަރުން އެބަތިއްބެވެ. ނަމަވެސް ޕީއެންސީއަށް ގިނަ ބަޔަކު ވައްދާފައި ވަނީ އެ މީހުންނަށް ނޭނގި ވަގަށެވެ.
ކުރިން އެންމެ ބޮޑު ޕާޓީގެ ގޮތުގައި އޮތް އެމްޑީޕީގައި މިހާރު ތިބީ 43،755 މެންބަރުންނެވެ.