ދިވެހިރާއްޖޭގައި 2013 އިން 2018 އަށް ވެރިކަންކުރި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުވާލަން އެ ޕާޓީގެ ސެނެޓުން މިއަދު ނިންމައިފިއެވެ.
ޕީޕީއެމް ރަސްމީކޮށް ރަޖިސްޓްރީކުރީ އޮކްޓޫބަރު 27، 2011 ގައެވެ. އެ ޕާޓީއަކީ އެންމެ ކުރު މުއްދަތެއްގައި ވެރިކަމަށް އައި އެއް ޕާޓީއެވެ. މި އަހަރުގެ ސެޕްޓެމްބަރު 19 އާ ހަމައަށް ވެސް އެ ޕާޓީގައި 34،694 މެންބަރުން ތިބި ކަމަށް އިލެކްޝަންސް ކޮމިޝަން (އީސީ)ގެ ވެބްސައިޓުން ދައްކައެވެ.
ޕީޕީއެމުން މިއަދު ބޭއްވި ކުއްލި ސެނެޓު ބައްދަލުވުމެއްގައި ވަނީ ޕާޓީ އުވާލަން ހުށަހަޅާފައެވެ. އެގޮތަށް ނިންމާފައިވަނީ ސެނެޓުގެ އިއްތިފާގުންނެވެ.
ފާހަގަކޮށްލެވޭ ގޮތުގައި ޕީޕީއެމް/ޕީއެންސީގެ ކޯލީޝަނުން އުފެދުނު މި ސަރުކާރު އުފެދުނު ފަހުން ޕީޕީއެމަށް މެންބަރުން އިތުރުކުރަން އެއްވެސް ހަރަކާތެއް ނުހިންގާ ކަމަށް އެ ޕާޓީން މައުލޫމާތު ދީފައިވެއެވެ. އަދި، ވެރިކަމަށް މިވީ މުއްދަތުގައި 7،416 އަށްވުރެ ގިނަ މެންބަރުން ޕާޓީ ދޫކޮށްލާފައިވާ ކަމަށް އެ ޕާޓީން ހާމަކޮށްފައިވެއެވެ.
ޕީޕީއެމްގެ ސެނެޓުން އޮކްޓޫބަރު 17 ގައި ވެސް ކުއްލި ބައްދަލުވުމެއް ބާއްވާފައިވެއެވެ. އެ ބައްދަލުވުމުގައިވަނީ ޕާޓީ އުވާލަން ފަސޭހަކުރަން އަސާސީ ގަވާއިދަށް ބަދަލުތަކެއް ގެނެސްފައެވެ. އެ ގޮތުން:
- ޕާޓީ އުވާލެވޭނީ ސެނެޓުގައި 4/3 ސެނެޓަރުންގެ ވޯޓުން ކަމަށް އޮންނަ މާއްދާ 3/2 ސެނެޓަރުންގެ ވޯޓުން ކަމަށް ބަދަލުކުރުން
- ކުރިން އޮންނަނީ މާލީ ސަބަބުތަކަށްޓަކައި އުވާލަން ހުށަހެޅޭ ގޮތަށް. އެކަމަކު، ލީޑާޝިޕަށް ފެނިއްޖެ ނަމަ ހުށަހެޅޭ ގޮތަށް އެ މާއްދާ ވެސް ބަދަލުކުރި
ޕީއެންސީ އުފެއްދި ނަމަވެސް މި ސަރުކާރު ވެރިކަމަށް އައިއިރު ވެސް އެ ޕާޓީގައި ތިބީ އެންމެ 3،000 އެއްހައި މެންބަރުންނެވެ. ދެ ޕާޓީއެއް ނަމަވެސް، ކޯލިޝަން ހިންގާފައިވަނީ ޖޮއިންޓް ކޯލިޝަނަކުން ދެ ޕާޓީގައި އަބަދު ވެސް އެއް ލީޑަރަކު ހުންނަވައިގެންނެވެ.
ކުރިން އެ ޕާޓީގެ ލީޑަރަކަށް ހުންނެވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމެވެ.
މިދިޔަ ރިޔާސީ އިންތިޚާބުގައި ވެސް ޕީޕީއެމްގެ ޓިކެޓުގައި އެ މަނިކުފާނު ވާދަކުރައްވަން ފޯމު ހުށަހެޅުއްވިއެވެ. އެކަމަކު، އޭރު އެ މަނިކުފާނު ޖަލު ހުކުމެއްގައި ހުންނެވުމުން އިންތިޚާބުގައި ވާދަނުކުރެއްވޭނެ ކަމަށް ސުޕްރީމް ކޯޓުން ހުކުމްކުރީއެވެ.
ސެނެޓުގައި ޕްރައިމަރީއެއް ބާއްވާފައި ޕީއެންސީގެ ޓިކެޓުގައި ކެންޑިޑޭޓަކު ނެރެން ނިންމީ، ޔާމީނަށް ވާދަނުކުރެއްވިދާނެ ހާލަތެއް އަތުވެދާނެތީއެވެ. ރައީސް ޑރ. މުހައްމަދު މުއިއްޒު ޕީއެންސީގެ ޓިކެޓުގައި ވާދަކުރެއްވީ އެހެންވެއެވެ.
ޕީޕީއެމް/ ޕީއެންސީގެ އެއްވުމެއްގެ ތެރެއިން: އެ ޕާޓީގެ ޕްރައިމަރީގައި 71،000 އަށްވުރެ ގިނަ މީހުންނަށް ވޯޓުލެވޭ -- ފޮޓޯ/ ނިއުސްލެބު
އެކަމަކު، އެ މަނިކުފާނަށް އިންތިޚާބު ކާމިޔާބުވެ، ހުވައިކުރެއްވިތާ ހަފުތާއެއް ނުވަނީސް ޔާމީން ވަނީ ޕީޕީއެމުން ވަކިވެ އަމިއްލަފުޅު އާ ޕާޓީއެއް އުފެއްދެވުމުގެ މަސައްކަތް ފައްޓަވާފައެވެ. އެއީ، ޕީޕަލްސް ނެޝަނަލް ފްރަންޓް (ޕީއެންއެފް)އެވެ. އޭގެ ފަހުން ޕީޕީއެމް/ޕީއެންސީ ކޯލީޝަންގެ ލީޑަރުކަމަށް ރައީސް މުއިއްޒު ވަނީ އިންތިޚާބުކޮށްފައެވެ.
އެ މަނިކުފާނު ޕީޕީއެމްގެ ބަދަލުގައި ހިންގެވީ ޕީއެންސީއެވެ. ސަރުކާރަށް އަހަރުވީއިރު އެ ޕާޓީއަށް 82،000 އަށްވުރެ ގިނަ މެންބަރުން ހަމަކޮށްފައިވާ ކަމަށް އެ ޕާޓީން ބުންޏެވެ. އެއީ، މިހާތަނަށް ރާއްޖޭގައި އެއް ޕާޓީއަކަށް މެންބަރުން ހަމަކުރި އެންމެ ގިނަ އަދަދެވެ. ކުރިން އެންމެ ބޮޑު ޕާޓީގެ ގޮތުގައި އޮތް އެމްޑީޕީގައި ތިއްބަވަނީ 50،000 އެއްހައި މެންބަރުންނެވެ.
ޕީޕީއެމްގެ މާޒީއާއި ޕީއެންސީގެ އުފެދުން
ރާއްޖޭގައި ބޭއްވި ފުރަތަމަ ޑިމޮކްރެޓިކް އިންތިޚާބުގައި 2008 ވަނަ އަހަރު ނާކާމިޔާބުވުމަށް ފަހު، ކުރިން އެ ފިކުރުގައި ހިންގި ޑީއާރުޕީގައި ހިޔާލު ތަފާތުވުން އުފެދުނެވެ. އެހެންވެ، ކުރިގެ ރައީސް މައުމޫން އަބްދުލްގައްޔޫމަށް ވަފާތެރި މެންބަރުން ޕީޕީއެމްގެ ނަމުގައި އާ ޕާޓީއެއް އުފެއްދީ 2011 ވަނަ އަހަރެވެ.
ޕީޕީއެމްގެ ޒައީމްގެ ގޮތުގައި އޭރު ހުންނެވީ މައުމޫނެވެ. އެތެރޭ ޕްރައިމަރީ ކާމިޔާބުކުރައްވައި، ޖެހިގެން އައި 2013 ވަނަ އަހަރުގެ އިންތިޚާބުގައި ވާދަކުރެއްވީ މައުމޫންގެ އެއްބަފައި ކޮއްކޯފުޅު ޔާމީނެވެ.
ޕީޕީއެމް ފުރަތަމަ ލީޑުކުރެއްވި، އެ ޕާޓީގެ ޒައީމްގެ ގޮތުގައި ހުންނެވި ކުރީގެ ރައީސް މައުމޫން --- ސަން ފޮޓޯ/ މުހައްމަދު އަފްރާހް
ޑީއާރުޕީގައި ބޮޑެތި ދަރަނިތައް ވެސް ހުރުމާ އެކު އެ ޕާޓީއާ ހަވާލުވާނެ ބޭފުޅަކު ނުވިއެވެ. އެންމެ ފަހުން އެ ޕާޓީ ހިންގެވީ ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެންބަރު އަބްދުﷲ ޖާބިރެވެ. އެކަމަކު، ގާނޫނުގައި ބުނާ 3،000 މެންބަރުންގެ ޝަރުތު ވެސް ހަމަނުވާތީ އެ ޕާޓީ އުވާލަން އިލެކްޝަންސް ކޮމިޝަނުން ނިންމީއެވެ.
ޑީއާރުޕީގެ މެންބަރުން ބަދަލުވީ ޕީޕީއެމަށެވެ. އެ ފިކުރުގައި ހިންގަމުން އައީ ޕީޕީއެމެވެ.
އެކަމަކު، ޔާމީންގެ ވެރިކަމުގެ މެދުތެރެއިން މައުމޫނާއި ދެ ބޭފުޅުންގެ މެދުގައި ހިޔާލު ތަފާތުވުން އުފެދުނީއެވެ. ޕީޕީއެމްގެ މިލްކުވެރިކަމަށް މައުމޫންގެ ފަރާތްޕުޅުން ކޯޓުގައި ދައުވާ ވެސް ކުރިއެވެ.
އެހެންވެ، ޔާމީނަށް ޕީޕީއެމް ގެއްލިދާނެކަމުގެ ބިރަށް ޕީއެންސީގެ ނަމުގައި އާ ޕާޓީއެއް އުފައްދަވައި 3،000 މެންބަރުން ހަމަކުރެއްވިއެވެ. އެ ޕާޓީގެ ރައީސަކަށް އިންތިޚާބުކުރީ މިހާރު ރައްޔިތުންގެ މަޖިލީހުގެ ރައީސްކަމުގައި ހުންނެވި އަބްދުއްރަހީމް އަބްދުﷲއެވެ.
ޖުލައި 11، 2017: ފަހުން ޕީޕީއެމްގެ ހިންގެވި ކުރީގެ ރައީސް ޔާމީން: ޕީޕީއެމް އުވާލަން ވަނީ ނިންމާފައި -- ސަން ފޮޓޯ/ ފަޔާޒު މޫސާ
ފަހުން ޔާމީނަށް ޕީޕީއެމް ލިބިވަޑައިގަތުމުން ޕީއެންސީ އުވައެއް ނުލައްވައެވެ. ކޯލީޝަނެއްގެ ގޮތުގައި ދެ ޕާޓީ ހިންގަމުން އައީ އެއް ޕާޓީއެއްގެ ގޮތުގައެވެ. އެކަމަކު، ޕީއެންސީއަށް މެންބަރުން އިތުރުކުރަން އެއްވެސް ހަރަކާތެއް ހިންގާފައެއް ނުވެއެވެ.
ރައީސް މުއިއްޒު ޕީއެންސީއަށް ގުޅިވަޑައިގަތީ އެ ޕާޓީގެ ސެނެޓުގައި ބޭއްވި ރިޔާސީ ޕްރައިމަރީގައި ވާދަކުރައްވާށެވެ. އެ މަނިކުފާނު ވެރިކަމަށް ވަޑައިގަތުމަށް ފަހު، ޕާޓީގެ ރައީސްކަމަށް ވަޑައިގަތެވެ. އަދި، ޔާމީން ދުރަށް ވަޑައިގަތުމާ އެކު ކޯލީޝަންގެ ލީޑަރުކަމަށް ވެސް ރައީސް މުއިއްޒު އިންތިޚާބުކުރިއެވެ.
އެ މަނިކުފާނު ޕީޕީއެމްގެ ބަދަލުގައި ހިންގެވީ ޕީއެންސީއެވެ. އެހެންވެ، ޕީޕީއެމްގެ މެންބަރުން ޕީއެންސީއަށް ބަދަލުކޮށް، އެ ޕާޓީ އުވާލަން ނިންމީއެވެ.