ވެރިކަން ކުރާ ޕާޓީ، ޕީއެންސީއަށް މެންބަރުން އިތުރުކުރުމުގައި ވަގަށް އެ ޕާޓީއަށް މީހުން ވައްދަން ފޯމު ހުށަހެޅި ކަމަށް ތުހުމަތުވާ މައްސަލަ އަމިއްލަ މީހަކު ވެސް މިއަދު ފުލުހަށް ހުށަހަޅައިފިއެވެ.
އަބްދުﷲ ޖަމީލު މިއަދު ފޭސްބުކްގައި ކުރި ޕޯސްޓެއްގައި ބުނީ، ވަގު ފޯމުތަކުގެ މައްސަލަ މިއަދު ޕޮލިހަށް ހުށަހަޅާފައިވާ ކަމަށެވެ. އެގޮތުން، އެ މައްސަލަ ބަލައިދޭނެ ކަމަށް ތަކުރާރުކޮށް ފުލުހުން ބުނިކަން ފާހަގަކޮށް ޖަމީލް ވަނީ އެ ޚިދުމަތުން ބެހެއްޓި ގާތްކަމަށް ޝުކުރު އަދާކޮށްފައެވެ.
ފުލުހުންނަކީ އޭނާ އަބަދުވެސް ލޯބިވާ އަދި ކަމޭހިތާ ބައެއްކަން ޖަމީލްގެ ޕޯސްޓުގައި ވަނީ ފާހަގަކޮށްފައެވެ،
އެކަމާ ގުޅުން ހުރި އިތުރު ތަފްސީލު 'ސަން'އާ ހިއްސާކޮށް، ޖަމީލް ބުނީ، ވަގަށް ޕީއެންސީއަށް ވައްދާފައި އޮތްކަން އެނގުނީ ޕީއެންސީއަށް ވަގަށް ގިނަ މީހުން ވައްދާފައި އޮތް ކަމަށް އަޑުފެތުރުނު ދުވަސްވަރު، އޭނާ އިލެކްޝަންސް ކޮމިޝަންގެ ވެބްސައިޓުން ޗެކު ކުރުމުން ކަމަށެވެ.
އެކަން އެނގުމުން އިލެކްޝަންސް ކޮމިޝަން(އީސީ)ގައި އެދިގެން ފޯމު ބެލިއިރު، ޖަމީލްގެ ނަމުގައި ވަގަށް އެ ޕާޓީއަށް ވައްދާފައި އޮތްކަން އެނގުނު ކަމަށް ޖަމީލް ބުންޏެވެ.
"ދެން އަޅުގަނޑު ބުނީ އިލެކްޝަން ކޮމިޝަން މީހުން ގާތުގައި އަޅުގަނޑުގެ ފޯމު، އަޅުގަނޑު ނުލަމޭ [ޕީއެންސީ ވަންނަކާށް] ފޯމެއް. ބުނީމާ އެ މީހުން މެއިލްކޮށްލައި ދިނީ އަޅުގަނޑަށް. މެއިލްކުރީމާ އަޅުގަނޑަށް މި އެނގުނީ [ޕީއެންސީން] އެ މީހުން އަޅުގަނޑުގެ ނަމުގައި ވަގު ފޯމެއް ފުރައިގެން ޕީއެންސީއަށް ވައްދާފައި އޮތްކަން،" ޖަމީލް ކިޔައިދިނެވެ.
މި މައްސަލާގައި ހަތް ކަމެއް ޖަމީލް ފާހަގަކުރިއެވެ، އެއީ:
- ކުރީގެ އައިޑީކާޑުގެ ފޮޓޯ ބޭނުންކޮށްފައި ހުރުން
- އަމިއްލަ ސޮއި ފޯޖުކޮށްފައިވުން
- ރާއްޖޭން ބޭރުގައި ހުރި ތާރީޚެއް ފޯމުގައި ޖަހާފައިވުން (22 ޑިސެންބަރު)
- މަންމަގެ ނަން ފޯމުގައި ހިމަނާފައިވުން
- ހެކި ބަސް ދިން ދެ މީހުން ދިނީ ކޮން ހެކިބަހެއްކަން
- ޖަމީލަށް ނޭނގި އައިޑީކާޑުގެ ކޮޕީ ފޯމާ އެކު ހުށަހަޅާފައިވުން
އެހެންވެ، އެކަންތައް ބަލައިދިނުމަށް މިއަދު ޖަމީލް ފުލުހަށް ހުށަހަޅާފައިވާއިރު، އިތުރު ގިނަ މީހުންތަކެއް ވެސް މައްސަލަ މިއަދު ހުށަހެޅި ކަމަށް ފުލުހުންގެ އޮފިޝަލަކު ވިދާޅުވިކަން ޖަމީލް ފާހަގަކުރިއެވެ.
ސިޔާސީ ޕާޓީތަކަށް ވަގަށް މީހުން ވައްދާ މައްސަލަ މި ފަހުން ފެންމަތިވިއިރު، އެއީ ޕާޓީތަކަށް ލިބޭ ފައިސާގެ އަދަދު އިތުރުކުރުމަށް ކުރާ ކަމެއް ކަމަށް ވަނީ ތުހުމަތުކޮށްފައެވެ. އެ މައްސަލައިގައި ސަރުކާރު ހިންގާ ޕީއެންސީއަށް ތުހުމަތުކުރެވޭއިރު، އެހެން ބައެއް ޕާޓީތަކުންނާއި ބައެއް ޖަމިއްޔާތަކުން ވެސް ވަނީ އެކަން ކުށްވެރިކޮށް، ފިޔަވަޅު އެޅުމަށް ސަރުކާރަށް ގޮވައިލައިފައެވެ.
ޕީއެންސީން ގިނަ އަދަދެއްގެ 'ވަގު ފޯމު' ފުރިކަމަށް ތުހުމަތުކޮށް، އިދިކޮޅު ފަރާތްތަކުން ވަނީ އެ މައްސަލަ ތަހުގީގު ކޮށްދޭން އެދި ފުލުހަށް ހުށަހަޅާފައެވެ.
ފާހަގަކޮށްލެވޭ ގޮތުގައި 68،000 އަށްވުރެ ގިނަ މެންބަރުންނާ އެކު ޕީއެންސީ މިހާރު ވަނީ ރާއްޖޭގެ އެންމެ މެންބަރުން ގިނަ ޕާޓީއަށްވެފައެވެ.
އެ މައްސަލަ ބޮޑުވެފައި އޮއްވައި އައިޑީކާޑުތަކާއި ރައްޔިތުންގެ ލިޔެކިޔުން ބަލަހައްޓާ ޑީއެންއާރުގެ އޮފީސް އިމާރާތް ތެރޭގައި ޕީއެންސީއަށް ފޯމުފުރި މައްސަލައެއް ވެސް ފެންމަތިވިއެވެ. އެ ކަންކުރާ ފޮޓޯތަކެއް ވެސް ވަނީ މީސްމީޑިއާގައި ލީކުވެފައެވެ.
ޕީއެންސީން ވެސް ވަނީ ބައެއް ސައްހަކަން ކަށަވަރުނުކުރެވޭ ފޯމުތަކެއް އީސީއަށް ހުށަހެޅި ކަމަށް އިއުތިރާފުވެފައެވެ. އެކަމަކު، އެއީ ގަސްތުގައި ކުރި ކަމެއް ނޫން ކަމަށާއި އެއީ ފޯމުގެ ސައްހަކަން ކަށަވަރުކުރެވޭނެ ގޮތެއް ނެތުމުން ހިނގި ކަމެއް ކަމަށް ޕީއެންސީން ވަނީ ބުނެފައެވެ.
އެ މައްސަލައިގައި އިދިކޮޅު އެމްޑީޕީން ވަނީ ޕީއެންސީން މި ފަހުން ހުށަހެޅި ހުރިހާ ފޯމެއް ބާތިލުކުރަން ވެސް އީސީއަށް ގޮވާލައިފައެވެ.