އައު އަހަރަކަށް ކުރިމަތިލުމާއެކު އައު އަޒުމުތަކަކާއެކު އެންމެން ވެސް އައު ހިތްވަރެއްލާފައިފައި މަސައްކަތްތައް ފަށައިގަނެފީމުއެވެ. އަޅުގަނޑު ވެސް މަސައްކަތްކުރާ ދާއިރާއާ ގުޅުންހުރި މަސައްކަތްތައް ކުރެވޭތޯ އައު އަޒުމާއި އައު ހިތްވަރާއެކު ފަށައިގަނެފީމުއެވެ. ތިޔަ ބޭފުޅުންނެކޭ އެއްފަދައިންނެވެ. ތިޔަބޭފުޅުންނާއެކުގައެވެ. ގައުމަށް ޚިދުމަތްކުރުމަށެވެ. ބަހަށް ޚިދުމަތްކުރުމަށެވެ. ކުއްލި ސިހުމެއް އަޅުގަނޑަށް ލިބުނީ އަހަރުގެ ފުރަތަމަ ހަފުތާގައި އަޅުގަނޑަށް ވައިބަރުން ލިބުނު މެސެޖެއްގެ ސަބަބުންނެވެ. ތިޔަ ހީފުޅުކުރެއްވީ ހެޔޮކޮށެވެ. ދިވެހިބަހާ ގުޅުންހުރި މަސައްކަތްކުރާ މީހަކަށް ލިބޭނީ ބަހާ ގުޅުންހުރި މެސެޖެއްތާއެވެ؟
މީސްމީޑިޔާގެ އޮޅިތަކުގައި ހަރަކާތްތެރިވެ ވަޑައިގަންނަވާ، ދިވެހިބަހަށް ލޯބިކުރައްވާ ބޭފުޅުން ހިމެނިވަޑައިގަންނަވާ އޮޅިތަކުގައި މަލިކުގެ އިބުރާހީމް މަނިކުފާނަކީ ނުފަރިތަ ނަމަކަށް ނުވާނެއެވެ. ގިނަ ބޭފުޅުން ދެނެވަޑައިގަންނަވާނެއެވެ. ޚާއްސަކޮށް ދިވެހިބަސް ދެކެ ލޯބިވެވަޑައިގަންނަވާ "ދިވެހީން" މި ނަމަށް ވަރަށް ފަރިތަވާނެކަމަށް އަޅުގަނޑު ގަބޫލުކުރަމެވެ. އަދި އޭނާއަކީ ދޭތެރެދޭތެރެއިން ދިވެހިރާއްޖެއަށް ޒިޔާރަތް ވެސް ކުރައްވާ ބޭފުޅެކެވެ. އެހެނަސް އަޅުގަނޑާ ބައްދަލުވެ ހާލު އަހައިލާ ހަދާލުމުގެ ނަސީބެއް އަޅުގަނޑަށް ލިބިފައިނެތެވެ. އެކަމަކު އަޅުގަނޑު ވެސް އެނަން ދަންނަމެވެ. އޭނާ ފެނިފައި ނެތަސް އެ ނަން ފަރިތައެވެ.
މި ވަގުތު އަޅުގަނޑު ރަސްމީކޮށް އަދާކުރާ ވަޒީފާއާ ހަވާލުވީ ދުވަހުން ފެށިގެން ކޮންމެވެސް މިންވަރަކަށް ވައިބަރުން އޭނާއާ ވާހަކަދެކެވެއެވެ. ސަލާންގަލާން ގޮވައިލައި ހަދައެވެ. ކޮންމެއަކަސް، ކުރުކުރު އިބާރާތްކޮޅެއް ލިޔެފައި މި އަހަރުގެ ޖަނަވަރީ މަހުގެ 5ވަނަ ދުވަހު ވައިބަރުން އަޅުގަނޑާ ފޮޓޯއެއް ހިއްސާކުރެއްވިއެވެ. ތިރީގައި އެ ވަނީ އެ ފޮޓޯއެވެ.
މަލިކުން ލިބުނު މެސެޖު --
ފޮޓޯއަކީ ރާއްޖޭގެ މަންޒަރެއް ފެންނަ ފޮޓޯއެއް ކަން ކަށަވަރެވެ. ރާއްޖޭގައި ހުރި އެންމެ ވަރުގަދަ އެއް ކުންފުނީގެ ހަރަކާތެއް ޓީވީއަކުން ފެންނަ މަންޒަރެކެވެ. އެތައް ބަޔަކު އެއްވެ ފޯރި ނަގަމުންދާ މަންޒަރެކެވެ. ކުންފުންޏަކީ ކޮބައިކަން ދެނެގަތުމަށް ދަތިނުވަނީ އެ ކުންފުނީގެ ލޯގޯ ފެންނަން ހުރީމައެވެ. ކޮން ދުވަހަކު ބޭއްވި ހަރަކާތެއް ކަމެއް ނޭނގެއެވެ. އެހެނަސް މި ހަރަކާތް ޚަބަރެއްގެ ގޮތުގައި ޓީވީއަކުން ދައްކާނީ އެ ދުވަސް ނުވަތަ އެއާ ކައިރި ދުވަހެއްގައި ހިންގި ހަރަކާތެއް ވީމާ ކަމަށް ގަބޫލުކުރަމެވެ. މި ވާހަކަ ބާއްވަމާ ހިންގަވާށެވެ.
އިބުރާހީމް މަނިކުފާނު ކަންބޮޑުވެވަޑައިގަންނަވައި އަޅުގަނޑަށް މެސެޖެއް އެހާ ދުރުން އެ ފޮނުއްވެވީ، ކަމެއް ފާހަގަކުރެއްވުނީމައެވެ. އެ ފޮޓޯގައި ތާނައިން ލިޔެފައިވާ އިނގިރޭސި އިބާރާތެއް އޮވެގެންނެވެ. "މޯލްޑިވްސް ކަލްޗަރ އެންޑް ފުޑް ފެސްޓިވަލް" އެވެ. ފެންނަ ފެނުމަށް މިއީ އެ ކުންފުނިން ބޭނުންކުރެއްވި އިބާރާތްކަމެއް ކަށަވަރުކަމާއެކު ދަންނަވާކަށް ނޭނގެއެވެ. ބޮޑަށް ލަފާކުރެވެނީ، އެ އިބާރާތްކޮޅު ލިޔެފައި އެ ވަނީ ޓީވީން އެ މަންޒަރު ދައްކަމުން ދިޔަ ޓީވީ އިސްޓޭޝަނުން ކަމަށެވެ. އެ އިސްޓޭޝަނުން އެ ގޮތަށް ލިޔާނީ، އެ ކުންފުނިން އެ ފެސްޓިވަލަށް ނުވަތަ މަހާސަމާއަށް ކިޔައިފައި ވަނީ އެ ނަން ކަމަށް ވީމާ ކަމަށް ގަބޫލުކުރެވެއެވެ.
އިބުރާހީމް މަނިކުފާނުގެ ހިތްޕުޅަށް ދަތިފުޅުވެގެން އެ އުޅުއްވަނީ ތާނައިން އޮތް އިނގިރޭސި އިބާރާތް ފެނިވަޑައިގަތީމައެވެ. ދިވެހިން ބުނެވިދާނެ ނުވަތަ ލިޔެވިދާނެ އިބާރާތެއް ދިވެހިބަހުން ލިޔުމުގެ ބަދަލުގައި އިނގިރޭސި އިބާރާތް ލިޔުއްވީމައެވެ. އެކަން އެނގެނީ ފަހުން އަޅުގަނޑާ ވައިބަރު މެދުވެރިކޮށް ދެކެވިފައިވާ ވާހަކައިންނެވެ. އަދި އެއަށް ވުރެ ބޮޑަށް އެކަން ކަށަވަރު ވަނީ ފޮޓޯގެ ތިރީގައި އިބުރާހީމް މަނިކުފާނު ލިޔުއްވި އިބާރާތްކޮޅުންނެވެ. އެއީ؛ "ދިވެހި އިނގިވެހި ކުރަމުން ގެންނަ އިރު..." މި އިބާރާތެވެ. ހަމަ ހަގީގަތުގައި ވެސް އިނގިރޭސި އާއި ދިވެހި އެއްވެފައެވެ. "އިނގިވެހި" ވެފައެވެ. އިނގިރޭސި އިބާރާތެއް ތާނައިން ލިޔެފައެވެ. އިނގިރޭސިއަކަށް ވެސް ދެނެއެއް ނުގަނެވެއެވެ. މައް ދިވެއްސަކަށް ވެސް މޭރުމެއް ނުވެއެވެ. އެހެންވީމާ މިވީ ކޮން އެއްޗަކަށް ތޯއެވެ؟ އަޅެ ދެރައެއް ނުވޭތޯއެވެ؟ ހަމަގައިމު ވެސް އަޅުގަނޑު ދެރަވިއެވެ. ދެރަވެއެވެ. ދިވެހިބަސްދެކެ ލޯބިވާ ދިވެހީން ދެރަވާނެކަން ކަށަވަރެވެ.
ދެން ހިތަށް އަރަނީ، އެ އިބާރާތް ދިވެހިބަހުން ނުބުނެވޭނެބާވައެވެ؟ ނޫނެކެވެ. ބުނެވޭނެއެވެ. އަޅުގަނޑަށް ގަބޫލުކުރެވެނީ ވަރަށް ފަސޭހައިން ވެސް ބުނެވޭނެ ކަމަށެވެ. މަސައްކަތްކޮށްލަމާ ހިންގަވާށެވެ. "ދިވެހިރާއްޖޭގެ ސަގާފަތާއި ކާބޯތަކެތީގެ މަހާސަމާ" މި ގޮތް އެންމެ ރަނގަޅުތޯއެވެ؟ އިސްވެ ދިޔަ އިބާރާތުގައި ބީރައްޓެހިކަމަށް ފެންނަ ލަފުޒަކީ "މަހާސަމާ"އެވެ. މަހާސަމާގެ މާނައެއް ކަމަށް ދިވެހި ބަސްފޮތުގައި ލިޔެފައި އޮތީ، "ވަކި ކަމަކާ ގުޅިގެން އުފާ ފާޅުކުރާން ގިނަ ފަރާތްތަކެއް ބައިވެރިވެގެން ބާއްވާ ހަރަކާތްތަކާއި ހިންގާ ޕުރޮގުރާމުތައް." މިއެވެ. އެހެންވީމާ މި މާނަ ވަރަށް ގުޅޭ ކަމަށް އަޅުގަނޑަށް ވިސްނެއެވެ. މުޅި އިބާރާތް ދިވެހިވެ، ދިވެހިވަންތަ ކޮށްލެވުނީ ދެއްތޯއެވެ؟ މިވަރު ކަމެކެވެ. ކިހައި ފަސޭހަތޯއެވެ؟
ކޮންމެ އަކަސް ކިތަންމެ ދުރުގައި ހުންނަވައިގެން ވިޔަސް އެ ބޭފުޅާގެ ހިތްޕުޅުގައި އޮތީ ދިވެހިބަހަށް އޮތް ލޯތްބެވެ. ދިވެހީންނަށް އޮތް ލޯތްބެވެ. އެހެންނޫންނަމަ ދުވަހަކު ވެސް ބައްދަލުވެ ވާހަކަދެކެވިފައި ނުވާ މީހަކަށް އެ މެސެޖެއް ނުފޮނުއްވާނެއެވެ. ގާތްކަން އޮތްލެއް ބޮޑުކަމުންނާއި ހިތަށް އަސަރުކުރި މިންވަރު ބޮޑުވީމާ އެ މެސެޖު ފޮނުއްވައިނުލައްވައި ހިތްޕުޅަށް ކެތްނުވީއެވެ. އެ ބޭފުޅާ އަދާ ކުރެއްވީ އެ ބޭފުޅާގެ ވާޖިބެވެ. ދިވެހިރާއްޖޭގައި ބަހާބެހޭ ކަންކަން ނިންމަން ގާނޫނުން ކަނޑައަޅައިފައިވާ މުއައްސަސާއަށް އެކަން އެންގެވީއެވެ. ދެން އޮތީ އެ މުއައްސަސާގެ ޒިންމާއެވެ. މުއައްސަސާއިން އެ ޒިންމާ އަދާކުރެއްވުމަކީ އެ މުއައްސަސާގެ މައްޗަށް ގާނޫނުން މަތިކުރައްވާފައިވާ މަސްއޫލިއްޔަތެކެވެ. މަސްއޫލިއްޔަތެއް ވިއްޔާ އަދާކުރައްވާން ޖެހިވަޑައިގަންނަވާނެއެވެ.