މި ސަރުކާރުގެ ވައްކަމާއި ދޮގުތައް އިންތިހާއަށް އިތުރުވެ، ރައްޔިތުން ސަލާންޖަހަން މަޖުބޫރުވެއްޖެ ކަމަށާއި އެ ކަމާ އަޑު ނުއުފުލައި ތިބެއްޖެނަަ ކަންކަން އަލުން އަނބުރާ އަތްނުފޯރާ ފަށަށް ގޮސްދާނެ ކަމަށް އިދިކޮޅު އެންމެ ބޮޑު ޕާޓީ އެމްޑީޕީގެ ރައީސް އަބްދުالله ޝާހިދު މިއަދު ވިދާޅުވެއްޖެއެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޝާހިދު ވިދާޅުވީ، ސަރުކާރުން ރައްޔިތުން މާޔޫސްކަމެއްގެ ތެރެއަށް ވައްޓާލައި، ރައްޔިތުން މިއަދު ސަލާންޖަހަން މަޖުބޫރުކޮށްފި ކަމަށެވެ. މިހާރު ކަންވަމުން ދަނީ އެމްޑީޕީގެ ސިޔާސަތުތަކާ މުޅިން އިދިކޮޅަށް ކަމަށް ޝާހިދު ވިދާޅުވިއެވެ.
އެމްޑީޕީ ސަރުކާރުގައި ކަރަންޓު އަގު ހެޔޮކުރުމަށާއި، ކާޑު އަގު ހެޔޮކުރުމަށާއި، ފެނާއި ނަރުދަމާގެ ޚިދުމަތްތަކުގެ އިތުރުން ދަތުރުފަތުރުގެ ނިޒާމަށް ވެސް ސަބްސިޑީ ދިންކަން އޭނާ ފާހަގަކުރެއްވިއެވެ. އަދި، ބޭސްފަރުވާ ކުރެވޭނެ ގޮތްތައް އާސަންދައިން ފަހިކޮށްދީ، ކޮވިޑްގެ ދަތި ހާލަތުގައި އެއްވެސް ސަބްސިޑީއެއް ވެސް ކަނޑާނުލައި ބަދަލުގައި އިތުރު އެލަވަންސްތައް އެމްޑީޕީ ސަރުކާރުން ދިން ކަމަށް އޭނާ ވިދާޅުވިއެވެ.
އެހެންނަމަވެސް، މި އަހަރުގެ ބަޖެޓުގައި ހުރިހާ ސަބްސިޑީއެއް ކަނޑާލާފައިވާކަން ފާހަގަކުރައްވާ ޝާހިދު ވަނީ ކަންބޮޑުވުން ފާޅުކުރައްވާފައެވެ. ޓެކްސްތައް ބޮޑުނުކުރާނެކަމުގެ ވައުދާ އެކު އައިސް ޓެކްސްތައް ވެސް ބޮޑުކޮށް، އާސަންދައަށް ސަލާމް ޖެހުމާއި އާސަންދަ ލިބުމުގައި ވެސް ރައްޔިތުންނަށް ދަތިތަކާ ކުރިމަތިލާންޖެހޭ ކަމަށް އޭނާ ވިދާޅުވިއެވެ.
"އަލުން ބަލުން މި ދިވެހިރާއްޖެ ފުރޮޅިގެން މި ދަނީ މާޒީގައި ތަހައްމަލުކުރި ދަތި އުނދަގޫ ހިތްދަތި ދުވަސްތަކަށް. ފުދިއްޖެ. އެހެންވީމާ 31 ވަނަ ދުވަހު އެމްޑީޕީން އިސްނަގައިގެން މި ނުކުންނަނީ،" ޝާހިދު ވިދާޅުވިއެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމުގެ ތެރެއިން -- ފޮޓޯ/ އެމްޑީޕީ
ހަމައެއާއެކު މި ސަރުކާރުން ގާނޫނަކީ ކުޅޭކުޅޭ އެއްޗަކަށް ހަދާފައިވާކަން ފާހަގަކުރައްވާ ޝާހިދު ވިދާޅުވީ، ރައީސް ޑރ. މުހައްމަދު މުއިއްޒު އެ ހުންނަވަނީ ދައުލަތުގެ ހުރިހާ ބާރެއް މުށުތެރެއަށް ލައްވައިގެން ކަމަށެވެ. އޭގެ އެއް މިސާލަކީ މަޖިލިސް މެންބަރުންގެ ތަޅު އަޅުވައި، ރައްޔިތުންގެ ބާރު ކަނޑުވައި، ރައްޔިތުންގެ މަޖިލީހުގައި 'ރަބާ ސްޓޭމްޕް' ޖެހުންކަމަށް ޝާހިދު ވިދާޅުވިއެވެ.
ރައްޔިތުންގެ ބާރު ކެނޑުވުމަށްޓަކައި ދެން ސަރުކާރުން ކުރައްވާނެ ކަމަކީ ޓްވިޓާއާއި ޓިކްޓޮކް ބްލޮކްކުރުން ކަމަށާއި ސަރުކާރުން އެ ދަނީ އެ މަސައްކަތް ވެސް ކުރަމުން ކަމަށް އޭނާ ވިދާޅުވިއެވެ. އޭގެ މަގުސަދަކީ އާންމު ފަރުދުންގެ މެދުގައި ޚިޔާލުފާޅުކުރުން ހުއްޓުވުން ކަމަށް އޭނާ ވިދާޅުވިއެވެ.
މި ސަރުކާރުން ވެރިކަމަށް އައުމުގެ ކުރިންނާއި އަދި ވެރިކަމަށް އައުމަށް ފަހު ވެސް މުޅިން ހަދަނީ ދޮގުކަމަށް ތުހުމަތުކުރެއްވިއެވެ.
"އެއް އަހަރާ ދެމަސްވެގެން މިދަނީ މިސަރުކާރަށް، ތަކުރާރުކޮށް ދޮގު ހެދުމުގައި. ތެދެއް ހެދެން އޮތަސް ހައްދަވަނީ ދޮގު. މައިކެއް ޕޯޑިއަމެއް ލިބުނަސް ހުސް ދޮގު. ޓްވީޓެއް ކުރެއްވިޔަސް ހުސް ދޮގު. އިންޓަވިއުއެއް ދެއްވިޔަސް ހުސް ދޮގު. ދޮގުތަކުގެ އަދަދު ބޭރުގެ ތަހުގީގު ޓީމުތަކަށް ވެސް ގުނައިގެނެއް ހޯދޭނެ ވަރެއް ނުވާނެ. އެއަށްވުރެ މިހާރު އެ ދޮގުތައް ގިނަވެއްޖެ،" ޝާހިދު ވިދާޅުވިއެވެ.
ރައްޔިތުންނަށް އެ ކަންކަން ފުދިއްޖެ ކަމަށާއި، އެމްޑީޕީން ރައްޔިތުންގެ އަޑު އުފުލައިދިނުމުގެ ގޮތުންނާއި ސަރުކާރު ޖަވާބުދާރީކުރުވުމުގެ ގޮތުން ދެން ނުކުންނާނީ މަގުމައްޗަށް ކަމަށް ވެސް މިއަދުގެ ނޫސްވެރިންގެ ބައްދަލުވުމުގައި އެ ޕާޓީން ރަސްމީކޮށް ވަނީ އިއުލާނުކޮށްފައެވެ. އެގޮތުން، މި މަހުގެ 31 ވަނަ ދުވަހު، 'ފުދިއްޖެ ފުނޑިއްޖެ'ގެ ނަމުގައި އެމްޑީޕީން އެއްވުން ބާއްވަން ވަނީ ނިންމާފައެވެ.
އެކަން ފާހަގަކުރައްވާ އޭނާ ވިދާޅުވީ، އެއް ޒަމާނެއްގައި ޚިޔާލު ތަފާތުވިޔަސް، ކުރިއަށްދިޔުމުގައި އެމްޑީޕީއާ އެކުގައި މަސައްކަތްކުރެވޭނެ ކަމަށް ފެންނަ ކަމަށް ވާނަމަ އެ ޕާޓީއަށް އަންނަ ހުރިހާ ބޭފުޅުންނަށް ވެސް މަރުހަބާ ކިޔުއްވާނެ ކަމަށެވެ.
"މި ޕާޓީގެ ވަރުގަދަކަމަކީ، އެހެން ޕާޓީތަކުން ގުޅިވަޑައިގަންނަވާ ބޭފުޅުންނަށް ވެސް ސިޔާސީ ހަރަކާތުގައި އެމްޑީޕީއާ އެކު ކުރިއަށް ދެވޭނެ މަގު މި ޕާޓީގެ ތެރެއިން ލިބޭނެކަން. މި ކަމެއް ނޯންނާނެ އެހެން އެއްވެސް ޕާޓީއެއްގައި،" ޝާހިދު ވިދާޅުވިއެވެ.
ފާހަގަކޮށްލެވޭ ގޮތުގައި ސަރުކާރަށް އަހަރެއްވިއިރު ވެސް އިދިކޮޅު މައި ޕާޓީގެ ގޮތުގައި އޮތް އެމްޑީޕީ އޮތީ ވަރަށް ހަމަހިމޭންކޮށެވެ. މީގެ ކުރިން އިދިކޮޅުގައި އޮވެ، އެމްޑީޕީން ދެއްކި ހަރަކާތްތެރިކަން ވޭތިވެދިޔަ އަހަރު ފެނިފައެއް ނުވެއެވެ.