ޤާނޫނާ ޚިލާފަށް ތިނަދޫ ސިޓީ ކައުންސިލުން އެއްވެސް މުސާރައެއް އެއްވެސް ކައުންސިލަރަކަށް ޖަމާކޮށްފައި ނޯންނާނެ ކަމަށް ތިނަދޫ ސިޓީގެ މޭޔަރު ސައުދު އަލީ މިއަދު ވިދާޅުވެއްޖެއެވެ.
ސިޓީ ކައުންސިލަކަށް, ބަދަލު ނުވަނީސް ތިނަދޫގެ މޭޔަރާއި ކައުންސިލަރުން، ސިޓީއެއްގެ ދަރަޖައިގައި ހިމެނޭ ކައުންސިލެއްގެ މުސާރަ ނެގި ކަމަށް ބުނެ، މައްސަލައެއް ލޯކަލް ގަވަމެންޓް އޮތޯރެޓީ (އެލްޖީއޭ)އަށް ވަނީ ހުށަހަޅައިފައެވެ. މި މައްސަލަ އެލްޖީއޭއަށް ހުށަހެޅުއްވީ މި ސަރުކާރުން ވަކިކުރި އެންވަޔަރަމަންޓް މިނިސްޓްރީގެ ނައިބު، ގާނޫނީ ވަކީލް އަހްމަދު ރާގިބެވެ.
މި މައްސަލަ ހުށަހަޅާފައިވަނީ ތިނަދޫއަކީ ސިޓީއެއްގެ ގޮތުގައި ކަނޑައެޅީ ގާނޫނާ ހިލާފަށް ކަމަށް ވިދާޅުވެ، އެ ދާއިރާގެ ރައްޔިތުންގެ މަޖިލީހުގެ މެންބަރު ސައުދުﷲ ހިލްމީ، އެ މައްސަލަ ވެސް އެލްޖީއޭއަށް ހުށަހަޅުއްވާފައިވާ ދަނޑިވަޅެއްގައެވެ.
އެ ކަމާ ގުޅިގެން "ސަން"އިން ސުވާލުކުރުމުން ތިނަދޫގެ މޭޔަރު ސައުދު ވިދާޅުވީ، ދިވެހި ސަރުކާރުން ތިނަދޫއަކީ ސިޓީއެއް ކަމަށް ކަނޑައަޅައި، ގާނޫނީ ހަމަތަކުގެ ތެރެއިން އެކަން ކޮށްފައިވަނިކޮށް، ވަކި މީހަކު ހިތްހަމަނުޖެހުމުން އެކަން އެ ނޫން ގޮތަކަށް ނުހިނގާނެ ކަމަށެވެ.
ރައްޔިތުންނަށް ކަނޑައެޅިގެން ނިކަމެތިކަމާއި، ގެއްލުންދީ، [ތިނަދޫގެ] ތަރައްގީއަށް ހުރަސްއަޅާކަށް ފުރުސަތެއް ނުދޭނަން، ތިނަދޫ ސިޓީގެ މޭޔަރު ސައުދު އަލީ
ސައުދު ތުހުމަތުކުރެއްވި ގޮތުގައި އެ މައްސަލައަކީ މެންބަރު ސައުދުﷲ، ރާގިބު ލައްވާ ކުރުވާ ކަމެކެވެ. އެއީ، ތިނަދޫ ސިޓީއާ ހަސަދަވެރިވާ، ތިނަދޫ ރައްޔިތުންނަށް ގެއްލުންތަކެއް ދެއްވަން އުޅުއްވާ ބޭފުޅެއް ކަމަށް ވެސް މޭޔަރު ވިދާޅުވިއެވެ. އަދި، އެއީ ސީދާ ތިނަދޫގެ ރައްޔިތުންނަށް "ޣައްދާރުވުން" ކަމަށް ސައުދު ވިދާޅުވިއެވެ.
ގދ. ތިނަދޫ -- ފޮޓޯ/ ސްޓޫޑިއޯ 33
ސައުދު ވިދާޅުވީ، މެންބަރު ސައުދުﷲ ބޭނުންވި ނަމަވެސް ބޭނުންހާ ގޮތަކަށް ތިނަދޫ ސިޓީ ކައުންސިލްގެ ތެރެއަށް އަތް ބޭނިޔަ ނުދެއްވާނެ ކަމަށެވެ. އެ ކައުންސިލްގެ ސިޔާސަތުތައް ބައްޓަންވެފައި އޮންނާނީ ގާނޫނާ އެއްގޮތަށް ކަމަށް ސައުދު ވިދާޅުވިއެވެ.
އޭނާ ވިދާޅުވީ، އެލްޖީއޭއަކުން ވެސް އަދި ކަމާ ގުޅޭ އެހެން އިދާރާއަކުން ވެސް ރަސްމީ ގޮތެއްގައި އެ މައްސަލަތަކާ ގުޅުންހުރި ކަމެއް ކައުންސިލަށް އަންގާފައި ނެތް ކަމަށެވެ. ނަމަވެސް، ސޯޝަލް މީޑިއާއާއި ނޫސްތަކުން އެ ވާހަކަތައް ކައުންސިލަށް ވެސް އެނގޭ ކަމަށް އޭނާ ވިދާޅުވިއެވެ.
ގާނޫނާ ޚިލާފަށް އެއްވެސް މުސާރައެއް ކައުންސިލުން ޖަމާކޮށްފައި ވެސް ނުވާނެ ކަމަށާއި ޖަވާބުދާރީވާންޖެހޭ އިދާރާތަކަށް އެ މައްސަލައިގައި ޖަވާބުދާރީވެސް ވާނެ ކަމަށް ސައުދު ވިދާޅުވިއެވެ.
ތިނަދޫ ސިޓީއަކަށް ހެދީ ރިޔާސީ އިންތިޚާބުގެ ކެމްޕޭންތެރޭގައި ކުރީގެ ރައީސް އިބްރާހީމް މުޙައްމަދު ޞާލިޙު, މިދިޔަ އަހަރުގެ އޮގަސްޓް 30 ގައެވެ. ފަހުން މި ސަރުކާރުން ވެސް ނިންމީ އެކަން އެގޮތަށް ބާއްވާށެވެ.
ނަމަވެސް, މި މައްސަލަ މެންބަރު ސައުދުﷲ އެލްޖީއޭއަށް ހުށަހެޅުއްވީ ތިނަދޫގެ އާބާދީގައި 10،150 މީހުން ހަމަނުވާ ކަމަށް ބުނެއެވެ. އަދި, އެ އަދަދު ހަމަކޮށްފައިވަނީ މީގެ އެތައް އަހަރެއް ކުރިން އެ ރަށުގެ ރަޖިސްޓްރީން ކެނޑިފައި ނުވަތަ މަރުވެފައި ތިބި މީހުން އެ ލިސްޓުގައި ހިމަނައިގެން ކަމަށް މައްސަލައިގައި ފާހަގަކުރެއްވިއެވެ.
އެ މައްސަލައިގައި ސައުދުﷲ އެންމެ ބޮޑަށް ތުހުމަތުކުރެއްވީ މިހާރު އެ ރަށުގެ މޭޔަރަށެވެ. އެގޮތުން، ވަރަށް ބޮޑެތި ޖިނާއީ ކުށްތަކެއް ހިންގާފައި ހުރި ކަމަށް އޭނާ ވިދާޅުވިއެވެ.
މީގެ އިތުރުން، ތިނަދޫގެ އާބާދީގައި 10،000 މީހުން ހަމަނުވާ ކަމަށާއި، އެ ކަން ކޮށްފައި އޮތީ އޮޅުވައިލައިގެންކަމަށް ބުނެ ކުރީގެ ރައީސް ޞާލިޙު އެ ރަށަށް ދެއްވި ސިޓީއެއްގެ ދަރަޖަ އުނިކުރުމަށް އެދި، ހައިކޯޓަށް ދުސްތޫރީ މައްސަލައެއް ވެސް ހުށަހެޅިއެވެ. އެ މައްސަލަ ވެސް ހުށަހެޅުއްވީ ރާގިބެވެ. ނަމަވެސް، ހައިކޯޓުން ނިންމީ އެ މައްސަލަ ބަލައިނުގަތުމަށެވެ.
ކޯޓުން ބުނީ، އެ ކޯޓަށް ދުސްތޫރީ މައްސަލަ ބެލުމަށް ލިބިފައިވާ އިހުތިޞާސަކީ ސުޕްރީމް ކޯޓަށް ބަލައިގަންނަ މައްސަަލަތައް ފިޔަވައި، ގާނޫނެއް ނުވަތަ ގާނުނެއްްގެ ބައެއް، ގާނޫނު އަސާސީއާ ތައާރުޒުވާކަމަށް ބަޔާންކޮށް ހުށަހަޅާ މައްސަަލަތައް ކަމަށެވެ.
މީގެ އިތުރުން ގާނޫނަކުން ބާރު ލިބިގެން ހަދައިފައިވާ ގަވައިދެއް ނުވަތަ އެ ގަވައިދެއްގެ ބައެއް، ގާނޫނުއަސާސީއާ ނުވަތަ، ގާނޫނަކާ ތައާރުޒުވާކަމަށް ބުނެ ހުށަހަޅާ މައްސަލަތައް ކަމަށް އެ ކޯޓުން ވަނީ ބުނެފައެވެ.