ގދ. ތިނަދޫއަކީ ސިޓީއެއްގެ ގޮތުގައި ކަނޑައެޅީ ގާނޫނާ ހިލާފަށް ކަމަށް ވިދާޅުވެ، އެ ދާއިރާގެ ރައްޔިތުންގެ މަޖިލީހުގެ މެންބަރު ސައުދުﷲ ހިލްމީ މިއަދު އެ މައްސަލަ ލޯކަލް ގަވަމަންޓް އޮތޯރިޓީ (އެލްޖީއޭ) އަށް ހުށަހަޅުއްވައިފިއެވެ.
ސައުދުﷲ ވަނީ އެ މައްސަލަ މިދިޔަ އާދިއްތަ ދުވަހު މަޖިލީހަށް ވެސް ހުށަހަޅުއްވާފައެވެ.
ތިނަދޫ ސިޓީއަކަށް ހެދީ ރިޔާސީ އިންތިޚާބުގެ ކެމްޕޭންތެރޭގައި ކުރީގެ ރައީސް އިބްރާހީމް މުޙައްމަދު ޞާލިޙު, މިދިޔަ އަހަރުގެ އޮގަސްޓް 30 ގައެވެ. ފަހުން މި ސަރުކާރުން ވެސް ނިންމީ އެކަން އެގޮތަށް ބާއްވާށެވެ.
ނަމަވެސް, މި މައްސަލަ އެލްޖީއޭއަށް ހުށަހެޅުއްވީ ތިނަދޫގެ އާބާދީގައި 10،150 މީހުން ހަމަނުވާ ކަމަށް ބުނެއެވެ. އަދި, އެ އަދަދު ހަމަކޮށްފައިވަނީ މީގެ އެތައް އަހަރެއް ކުރިން އެ ރަށުގެ ރަޖިސްޓްރީން ކެނޑިފައި ނުވަތަ މަރުވެފައި ތިބި މީހުން އެ ލިސްޓުގައި ހިމަނައިގެން ކަމަށް މައްސަލައިގައި ފާހަގަކުރެއްވިއެވެ.
ގދ. ތިނަދޫ. (ފޮޓޯ/ޝަހާއު މުހައްމަދު)
"ސަން"އާ ވާހަކަދައްކަވަމުން މެންބަރު ސައުދުﷲ ވިދާޅުވީ، އެކަން އޭނާއަށް އެނގުނީ މިދިޔަ މަހުގެ 15ގައި ކަމަށެވެ. އޭނާ ވިދާޅުވީ، އާބާދީގައި 1،800 މީހުންގެ ތަފާތެއް އުޅޭ ކަމަށެވެ.
"ކައުންސިލުން ފޮނުވި ލިސްޓު އަޅުގަނޑަށް ފެނުނީ. ބަލައިލިއިރު ކަމަކުދާކަށް ނެތް. ތިނަދޫގެ ރަޖިސްޓްރީން މީގެ 30 އަހަރުކުރިން ކެނޑިފައި ތިބި މީހުން ވެސް ލިސްޓުގައި އެބަތިބި. އަނެއްކާ މަރުވެފައި ތިބި އަޅުގަނޑު ދަންނަ މީހުން ވެސް އެބަތިބި،" ސަދުﷲ ވިދާޅުވިއެވެ.
"...އަޅުގަނޑު ބޭނުމެއް ނުވޭ އަޅުގަނޑުގެ ދަރިންގެ ދަރިންނާ ހިސާބަށް "ވަގު ސިޓީ"އެކޭ ކިޔައިގެން އެކަން ދެމިގެންދާކަށް. ދެން އެހެން ނޫނަސް އަޅުގަނޑަކީ ގާނޫނާ ގަވާއިދުގެ ތެރެއިން ކަންކަންކުރަން ބޭނުންވާ މީހެއް،"
އޭނާ ވިދާޅުވި ގޮތުގައި ފަހަރެއްގައި ވެސް އޭނާ އުޅެނީ ތިނަދޫ ސިޓީގެ ލަގަބު ގެއްލުވާލަން ބޭނުންވެގެނެއް ނޫނެވެ. ތިނަދޫއަށް ސިޓީއެއްގެ ދަރަޖަ އެންމެ ބޮޑަށް ދޭން ބޭނުންވާ އެކަކީ ވެސް އޭނާ ކަމަށް ވިދާޅުވިއެވެ. އެހެންނަމަވެސް، ގާނޫނާ ޚިލާފަށް ނުވަތަ އޮޅުވާލައިގެން ކަމެއް ކޮށްފައި އޮތްކަން އެނގޭތީ އެކަން އިސްލާހުކުރަން އުޅެނީ ކަމަށް ސައުދުﷲ ވިދާޅުވިއެވެ.
"[ރައީސް] ޑރ. މުހައްމަދު މުއިއްޒު ކެމްޕެއިން ތެރޭ ވެސް ވިދާޅުވެފައި އޮތީ ތިނަދޫ ރައްޔިތުންގެ ކުރިމަތީގައި ގާނޫނުގައި އެ ބުނާ 10،000 [މީހުން] 8،000 ހަށް ބަދަލުކޮށްގެން ނަމަވެސް ތިނަދޫ ސިޓީއަކަށް ހައްދަވާނެ ވާހަކަ. އެގޮތަށް ވޭތޯ އަޅުގަނޑު މަސައްކަތްކުރަމުން މިދަނީ،" އޭނާ ވިދާޅުވިއެވެ.
އެ މައްސަލާގައި ސައުދުﷲ އެންމެ ބޮޑަށް ތުހުމަތުކުރެއްވީ މިހާރު އެ ރަށު ކައުންސިލްގެ މޭޔަރަށެވެ. އެގޮތުން ވަރަށް ބޮޑެތި ޖިނާއީ ކުށްތަކެއް ހިންގާފައި ހުރިކަމަށް އޭނާ ވިދާޅުވިއެވެ.
ތިނަދޫއަށް ސިޓީއެއްގެ ދަރަޖަ ދީފައިވަނީ ގާނޫނާ ހިލާފަށް ކަމަށް ބުނެ، މި ފަހުން ހައިކޯޓަށް ދުސްތޫރީ މައްސަަލައެއް ވެސް ހުށަހެޅިއެވެ. އެކަމަކު، އެ މައްސަލަ ހުށަހެޅުއްވުމާ ގުޅިގެން ރައީސް ޑރ. މުޙައްމަދު މުއިއްޒު ވަނީ މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީގެ ޑެޕިއުޓީ މިނިސްޓަރު މުހައްމަދު ރާޣިބު މަގާމުން ވަކިކޮށްފައެވެ.
ތިނަދޫއަށް ދީފައިވާ ސިޓީގެ ދަރަޖަ ބާތިލުކުރަން ހުށަހަޅާފައިވަނީ ވެސް މިހާރު ތިނަދޫގެ އަބާދީގައި ތިބީ 7,924 މީހުން ކަމަށް ބުނެފައެވެ. ހައިކޯޓު ރިސެސްގައި އޮތުމުގެ ސަބަބުން އެ މައްސަލަ މިހާތަނަށް ބަލަން ފަށާފައެއް ނުވެއެވެ.