ޗައިނާއާ އެކު މި ފެށޭ އަހަރުގެ އެއްވަނަ ދުވަހުން ފެށިގެން އަމަލުކުރަން ފަށައި މިނިވަން ވިޔަފާރީގެ އެއްބަސްވުން (އެފްޓީއޭ)އާ އެކު ދިވެހި ވިޔަފާރިވެރިންނަށް ފަހިވަނީ ދުވަހަކު ވެސް ފަހިނުވާ ވަރުގެ ތަނަވަސް ފުރުސަތެއް ކަމަށް އިކޮނަމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެއެވެ.
ޗައިނާއާއި ރާއްޖެއާ ދެމެދު ޖެނުއަރީ އެއްވަނަ ދުވަހުން ފެށިގެން އެފްޓީއޭއަށް އަމަލުކުރަން ފަށާނެއެވެ.
އެއްބަސްވުމަށް އަމަލުކުރަން ފަށަން މިއަދު އިކޮނަމިކް މިނިސްޓްރީގައި ބޭއްވި ޚާއްސަ ރަސްމިއްޔާތެއްގައި ވާހަކަދައްކަވަމުން މިނިސްޓަރު ސައީދު ވިދާޅުވީ، މި އެއްބަސްވުމާ އެކު ދިވެހި ވިޔަފާރިވެރިންނަށް ދުވަހަކު ފަހިނުވާ ވަރުގެ ފުރުސަތުތައް ފަހިވާނެ ކަމަށެވެ.
މި އެއްބަސްވުމުގެ ސަބަބުން ކުރިއަށް އޮތް ފަސް އަހަރު ތެރޭގައި 90 އިންސައްތައާ ހަމައަށް ރާއްޖެ އެތެރެކުރާ ގިނަ ބާވަތްތަކުގެ މުދަލުން ޑިއުޓީ މާފުވާނެ ކަމަށް އޭނާ ވިދާޅުވިއެވެ.
މި އެއްބަސްވުން ގާއިމުކުރުމާ އެކު އިދިކޮޅު ފަރާތްތަކުން، ޓްރެޑިޝަނަލް މާކެޓުތައް ގެއްލޭނެ ކަމަށް ވިދާޅުވެ، ސުވާލު އަމާޒުކުރާކަން ފާހަގަކުރައްވައި ސައީދު ވިދާޅުވީ، ރާއްޖޭގެ ޓްރެޑިޝަނަލް މާކެޓުތަކުގެ ގޮތުގައި ހުރީ އަވައްޓެރި ގައުމުތަކާއި އެކުވެރި އަރަބި އިމާރާތް (ޔޫއޭއީ) ފަދަ ގައުމުތައް ކަމަށެވެ.
އޭގެ ތެރެއިން ވެސް އިންޑިއާއާ އެކު އެފްޓީއޭ ހެދުމުގެ މަސައްކަތް ކުރަމުން އަންނަކަން އޭނާ ފާހަގަކުރެއްވިއެވެ. އަދި، ތުރުކީއާ އެކުގައި ވެސް ޕްރިފަރެންޝަލް ޓްރޭޑް އެއްބަސްވުމެއް ހަދާފައިވާކަން އޭނާ ފާހަގަކުރެއްވިއެވެ.
"ޑިއުޓީއަކާ ނުލާ ދިވެހިރާއްޖޭގެ ބޯޑަރަށް އެތެރެކުރެވޭ ގޮތް މި ވަނީ މިއާ ގުޅިގެން ޓްރެޑިޝަނަލް މާކެޓުތައް ގެއްލިދާނެ ކަމަކަށް އަޅުގަނޑަށް ގަބޫލެއް ނުކުރެވޭ،" މިނިސްޓަރު ވިދާޅުވިއެވެ.
އޭނާ ވިދާޅުވީ، ޑިއުޓީ މާފުވުމުގެ ސަބަބުން ޑިއުޓީގެ ގޮތުގައި ދައުލަތަށް ލިބޭ އާމްދަނީ ގެއްލޭނެ ކަމަށް ވެސް އިދިކޮޅު ފަރާތްތަކުން ތުހުމަތުކުރާ ކަމަށެވެ. އެކަމަކު، އެކަން ވެސް އޮތީ އެ ގޮތަށް ނޫން ކަމަށާއި ޑިއުޓީގެ ގޮތުގައި ފައިސާ ނުލިބުން ނަމަވެސް ދައުލަތަށް އެ ފައިސާ ނުގެއްލޭނެ ކަމަށް އޭނާ ވިދާޅުވިއެވެ.
މިސާލެއްގެ ގޮތުން އޭނާ ވިދާޅުވީ، ރަށެއްގައި ގެސްޓްހައުސެއް އަޅާން ގެންނަ މުދަލުން މިހާރު ޑިއުޓީގެ ގޮތުގައި ކުރިން ދައްކަންޖެހޭ 500،000 ނުވަތަ 600،000 އެއްހައި ރުފިޔާ އެއްކޮށް މާފުވާނެ ކަމަށެވެ.
އެއީ، ޑިއުޓީގެ ގޮތުގައި ދައުލަތަށް ގެއްލޭ ފައިސާއެއް ނަމަވެސް އެ ގެސްޓްހައުސް ހަދައިގެން ވިޔަފާރިކުރަން ފެށުމުން ޖީއެސްޓީއާއި އެ ނޫން ވެސް ޓެކުހުގެ ގޮތުގައި ވެސް ދައުލަތަށް އެ ފައިސާ ވަންނާނެކަން މިނިސްޓަރު ފާހަގަކުރެއްވިއެވެ. އަދި، އެ ގެސްޓްހައުސްގެ ސަބަބުން ވަޒީފާ އިތުރުވެ، އިކޮނަމިކް އެކްޓިވިޓީ ފުޅާވުމަކީ ވެސް ދައުލަތަށް ލިބޭ ފައިދާއެއްކަން އޭނާ ފާހަގަކުރެއްވިއެވެ.
"ޑިއުޓީ ކަނޑާލީމާ އާންމު ފަރުދަކަށް ރާއްޖޭގެ ރަށެއްގައި ގެސްޓް ހައުސެއް އަޅާ ކަމަށްވަންޏާ ސަރުކާރުން އާންމު ފަރާތަކަށް މި ދެވެނީ އަޅުގަނޑު ގަބޫލުކުރާ ގޮތުގައި 5 ލައްކަ ނުވަތަ 6 ލައްކަ ރުފިޔާގެ ޑިސްކައުންޓެއް،" އޭނާ ވިދާޅުވިއެވެ.
ސައީދު ވިދާޅުވީ، ދުނިޔޭގެ އެންމެ ބޮޑު ބާޒާރާ އެކު އެފްޓީއޭއެއް ގާއިމުކުރުމަކީ ރާއްޖެ ފަދަ ކުޑަ ގައުމަކަށް ލިބޭ ވަރަށް ބޮޑު ފުރުސަތެއް ކަމަށެވެ.
"ދިވެހިރާއްޖޭގައި ބޭނިއްޔާ ބާނާ މަހެއް. ހިފިއްޔާ ހިފާ ސީފުޑެއް. އެއްވެސް ޓެރިފަކާ ނުލައި، އެއްވެސް ޑިއުޓީއަކާ ނުލާ ދުނިޔޭގެ އެންމެ ބޮޑު ބާޒާރަށް އެކްސްޕޯޓުކުރުމުގެ ފުރުސަތު މި ފަހިވަނީ،" މިނިސްޓަރު ވިދާޅުވިއެވެ.
ދިވެހި ވިޔަފާރިވެރިންނަކީ ވަރަށް ތަނަވަސް ވިސްނުމުގެ ވަރަށް ހީވާގި ބައެއްކަން ފާހަގަކުރައްވައި އޭނާ ވަނީ މި އެފްޓީއޭގެ ބޭނުން ވެސް އެންމެ ހެޔޮ ގޮތުގައި ހިފަން ވިޔަފާރިވެރިންގެ އަރިހުން އެދިވަޑައިގެންފައެވެ.
"މި އެފްޓީއޭގެ ސަބަބުން ފަހިވެގެން މިދާ ފުރުސަތު، މިއީ ވަރަށް ހިސްޓަރިކް، ވަރަށް ސްޓްރެޓީޖިކް ކަމެއް. ފަސް އެނބުރި ބަލައި، މިކަން ފާހަގަކުރާނެ ވަރުގެ ފުރުސަތެއް މި ފަހިވީ،" ސައީދު ވިދާޅުވިއެވެ.
"އަޅުގަނޑުގެ އިލްތިމާސަކީ މި ފުރުސަތުގެ ފުރިހަމަ ބޭނުން ތި ބޭފުޅުން ކުރައްވާށޭ،"
ބުދަ ދުވަހުން ފެށިގެން އަމަލުކުރަން ފަށާ އެފްޓީއޭގެ ސަބަބުން ރާއްޖެއިން އެކްސްޕޯޓޫކުރާ ހުރިހާ ކަނޑުމަހުގެ ބާވަތްތައް ހިމެނޭހެން 296 އައިޓަމަކުން ސުން ޕަސެންޓުގައި ޗައިނާއަށް އެކްސްޕޯޓުކުރެވޭނެއެވެ.
ދެ އަހަރު ދުވަހުގެ ދިގު މަޝްވަރާތަކަކާށް ފަހު ރާއްޖެއިން ޗައިނާއާ އެކު މިނިވަން ވިޔަފާރީގެ އެއްބަސްވުމެއްގަައި ސޮއިކުރީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި 2014 ވަނަ އަހަރުގެ ޑިސެމްބަރު މަހުގެ ތެރޭގައެވެ. އެކަމަކު، އެ އެއްބަސްވުމަށް އަމަލުކުރަން މަޖިލީހުން ފާސްވީ 2017 ވަނަ އަހަރުގެ ނޮވެމްބަރު މަހެވެ.
އެކަމަކު، އެއަށް ފަހުގައި އައި ރައީސް އިބްރާހިމް މުހައްމަދު ޞާލިޙްގެ ސަރުކާރުން މިނިވަން ވިޔަފާރީގެ އެއްބަސްވުމަށް އަމަލުކުރަން ފަށައިފައެއް ނުވެއެވެ.
ރައީސް ޔާމީންގެ ވެރިކަމުގައި ހައުސިން މިނިސްޓަރުކަން ކުރެއްވި ރައީސް ޑރ. މުޙައްމަދު މުއިއްޒު ވެރިކަމަށް ވަޑައިގެން ޗައިނާއާ ގާތް ގުޅުމެއް ބާއްވަމުން ގެންދަވާއިރު، އެ އެފްޓީއޭއަށް އަމަލުކުރަން ތައްޔާރަށް ހުންނެވި ކަމަށް އެ މަނިކުފާނު ކުރިން ވިދާޅުވެފައިވެއެވެ.
ޗައިނާއާ ދެމެދު މިހާރު 700 މިލިއަން ޑޮލަރުގެ ވިޔަފާރި ކުރާއިރު، އެފްޓީއޭއާ އެކު އެ އަދަދު އެއް ބިލިއަން ޑޮލަރަށް އަރާނެ ކަމަށް ސަރުކާރުން ލަފާކޮށްފައިވެއެވެ.