ރާއްޖެއިން ޗައިނާއާއެކު ހަދައިފައިވާ މިނިވަން ވިޔަފާރީގެ އެއްބަސްވުން (އެފްޓީއޭ)އަށް އަންނަ އަހަރުގެ ފުރަތަމަ ދުވަހު އަމަލުކުރަން ފަށާނެ ކަމަށް އިކޮނޮމިކް މިނިސްޓަރު މުޙައްމަދު ސައީދު މިއަދު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ސައީދު ވަނީ ޗައިނާއާއެކު ހަދައިފައިވާ އެފްޓީއޭއާއި އެގައުމާއެކު ކުރާ ވިޔަފާރީގެ މުއާމަލާތްތައް ދެ ގައުމުގެ ފައިސާއިން ކުރަން މަގުފަހިކުރުމަށްޓަކައި ސޮއިކޮށްފައިވާ ފަހުމުނާމާއިން ލިބޭނެ ފައިދާތައް ފާހަގަކުރައްވައިފައެވެ.
އޭނާ ވިދާޅުވީ މިނިވަން ވިޔަފާރީގެ އެއްބަސްވުމުން ދިވެހި ވިޔަފާރިތަކަށް ލިބޭނެ ފައިދާތަކުގެ ތެރޭގައި، ރާއްޖެއިން މުދާ ޗަައިނާއަށް އެކްސްޕޯޓް ކުރުމުގައި ޑިއުޓީ ދައްކަން ނުޖެހުމާއި ނޮން-ޓެރިފް ބެރިޔާސް ނުވަތަ މުދާ އެކްސްޕޯޓްކުރާއިރު ހުންނަ ބައެއް މަސައްކަތްތައް ލުއިވުން ހިމެނޭ ކަމަށެވެ. އަދި ހޯލްސޭލް މުދާ އެތެރެކުރާ ވިޔަފާރިތަކަށް ލިބޭ ފައިދާއަކީ، އެ އެއްބަސްވުމަށް އަމަލު ކުރަން ފެށުމުން، ޗައިނާއިން އިމްޕޯޓް ކުރާ ގިނަ މުދަލުން ޑިއުޓީ ކެނޑުންކަން ސައީދު ފާހަގަކުރެއްވިއެވެ.
"އެހެންވީމަ މިހާރު ދައްކާ ޑިއުޓީއެއް ސުން ޕަސެންޓަށް ތިރިވެގެންދާނެ. މި ދެ އެރޭންޖްމެންޓާއެކު، އަޅުގަނޑުމެންގެ ފައިސާއިން ފައިސާ ދެއްކުމާއި ޑިއުޓީ ސުން ޕަސެންޓަށް 91 ޕަސެންޓް ޗައިނާއިން އިމްޕޯޓް ކުރާ އައިޓަމްސްގެ 91 ޕަސެންޓް ގާތްގަނޑަކަށް ޓެރިފްލައިން ޒީރޯއަށް މިއަންނަނީ ސުން ޕަސެންޓަށް މިދަނީ، އެހެންވީމަ ވަރަށް ބޮޑު ތަނުން ތަކެތީގެ، ހަމަ ގައިމު ވެސް ޗައިނާއިން ގެންނަ މުދަލުގެ އަގު ހެޔޮ ވެގެންދާނެ،" އޭނާ ވިދާޅުވިއެވެ.
މީގެ އިތުރުން އެފްޓީއޭގެ ދަށުން، ރާއްޖެއިން އެކްސްޕޯޓް ކުރާ ހުރިހާ ކަނޑުމަހުގެ ބާވަތްތައް ހިމެނޭ ގޮތަށް، 296 އައިޓަމަކުން ސުން ޕަސެންޓްގައި ރާއްޖެއިން ޗައިނާއަށް އެކްސްޕޯޓް ކުރެވޭނެ ކަމަށް ސައީދު ވިދާޅުވިއެވެ.
"އަޅުގަނޑުމެން ނެގޯޝިއޭޓް ކުރިއިރުގައި ދުނިޔޭގެ ސީފުޑް އުފައްދާ ނުވަތަ ސީފުޑް އެކްސްޕޯޓް ކުރާ ގައުމުތަކުން ދިވެހިރާއްޖެއަށް ސީފުޑް ގެނެސް ރާއްޖޭގައި ކޮންމެވެސް ވަރެއްގެ ވެލިއުއެއް އެއަށް އެޑްކޮށްފައި، އަގެއް އެއްކޮށްފައި، ދިވެހިރާއްޖޭގެ ޕްރޮޑަކްޓެއް ކަމަށް އެކަށައެޅޭނެ އިންތިޒާމުތަކެއް ޑަބްލިޔުޓީއޯއިން އިނދޭ އުފައްދާފައި،" އޭނާ ވިދާޅުވިއެވެ.
"އެ އޮނިގަނޑަށް ފެތުނީމައި ދިވެހިރާއްޖޭގެ ޕެކްޑް ނުވަތަ ޕްރިޑިއުސްޑް އައިޓަމަކަށް މިވަނީ. އެ އައިޓަމްތައް ވެސް ދިިވެހި ރާއްޖެ މެދުވެރިކޮށް ޗައިނާއަށް ގޮއްސިއްޔާ ސުން ޕަސެންޓުގައި ނަގާނެ."
ހަމައެއާއެކު އެފްޓީއޭއަށް އަމަލުކުރަން ފެށުމުން ޗައިނާގެ ބެއިޖިން، ޝަންހާއީ އަދި ޓިއަންޖިންގެ ފްރީޒޯންތަކުގައި ރާއްޖޭގެ ޓްރެވެލް އޮޕަރޭޓަރުންނަށް އިންބައުންޑް އަދި އައުޓްބައުންޑް ވިޔަފާރި އެއްވެސް ހުރަހެއް ނެތި ކުރެވޭނެ ކަމަށް އޭނާ ވިދާޅުވިއެވެ.
ރާއްޖެއިން މިނިވަން ވިޔަފާރީގެ މަޝްވަރާތައް ޗައިނާގެ އިތުރުން ބޮޑެތި އެހެން މާކެޓްތަކާއެކު ވެސް ކުރަމުން އަންނަ ކަމަށާއި، އެގޮތުން ތުރުކީއާއެކު ކުރިއަށްގެންދިޔަ 'ޕްރިފަރެންޝަލް ޓްރޭޑް އެގްރިމެންޓް'ގެ މަޝްވަރާތައް ނިމި ކުރިއެރުންތަކެއް ލިބިފައިވާ ކަމަށް ވެސް ސައީދު ވިދާޅުވިއެވެ. އަދި ޕީޓީއޭ އަންނަ ޖެނުއަރީ މަހު ތަންފީޒު ކުރެވޭނެ ކަމަށް ލަފާ ކުރައްވާ ކަމަށް ވެސް އޭނާ ވިދާޅުވިއެވެ.
ދެ އަހަރު ދުވަހުގެ ދިގު މަޝްވަރާތަކަކާށް ފަހު ރާއްޖެއިން ޗައިނާއާ އެކު މިނިވަން ވިޔަފާރީގެ އެއްބަސްވުމެއްގަައި ސޮއިކުރީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި 2014 ވަނަ އަހަރުގެ ޑިސެމްބަރު މަހުގެ ތެރޭގައެވެ. އެކަމަކު، އެ އެއްބަސްވުމަށް އަމަލުކުރަން މަޖިލީހުން ފާސްވީ 2017 ވަނަ އަހަރުގެ ނޮވެމްބަރު މަހުއެވެ.
އެކަމަކު، އެއަށް ފަހުގައި އައި ރައީސް އިބްރާހިމް މުހައްމަދު ޞާލިޙްގެ ސަރުކާރުން މިނިވަން ވިޔަފާރީގެ އެއްބަސްވުމަށް އަމަލުކުރަން ފަށައިފައެއް ނުވެއެވެ.
ރައީސް ޔާމީންގެ ވެރިކަމުގައި ހައުސިން މިނިސްޓަރުކަން ކުރެއްވި ރައީސް ޑރ. މުޙައްމަދު މުއިއްޒު ވެރިކަމަށް ވަޑައިގެން ޗައިނާއާ ގާތް ގުޅުމެއް ބާއްވަމުން ގެންދަވާއިރު، އެ އެފްޓީއޭއަށް އަމަލުކުރަން ތައްޔާރަށް ހުންނެވި ކަމަށް އެ މަނިކުފާނު ކުރިން ވިދާޅުވެފައިވެއެވެ.
ޗައިނާއާ ދެމެދު މިހާރު 700 މިލިއަން ޑޮލަރުގެ ވިޔަފާރި ކުރާއިރު، އެފްޓީއޭއާއެކު އެ އަދަދު އެއް ބިލިއަން ޑޮލަރަށް އަރާނެ ކަމަށް ސަރުކާރުން ލަފާކޮށްފައިވެއެވެ.