ފްލެޓު އެޅުމުގެ ނަމުގައި ސީލައިފް ގްލޯބަލްއިން ހިންގި ސްކޭމްގައި ގެއްލުންވި މީހުންނަށް ވިނަރެސް ފުލެޓުތަކެއް ދޭން އެންގުމުން، ސީލައިފަށް ފައިސާ ދެއްކި ކަމުގެ ފޭކު ލިޔުންތަކެއް ހަދައިގެން ވިނަރެސް ފުލެޓުތަކެއް ދީފައިވާކަން ހާމަވެއްޖެއެވެ.
ކުރީ ސަރުކާރުން ކުރިއަށްގެންދިޔަ ބިންވެރިޔާ ސްކީމްގެ ގޯތިތަކެއް ނުހައްގުން ބަޔަކަށް ދީފައިވާ ކަމަށް ދޭހަވާ ލިޔެކިޔުންތަކެއް "ސަން"އަށް ލިބިފައިވާއިރު، ވިނަރެސް ފުލެޓުތައް ދިނުމުގައި ވެސް އޮޅުވާލުމަށް ސައްހަ ނޫން ލިޔެކިޔުންތަކެއް ބޭނުންކޮށްފައިވާ ކަމަށް އިތުބާރު ހުރި މަސްދަރަކުން "ސަން"އަށް މައުލޫމާތު ދީފައިވެއެވެ.
އެ ދެ މައްސަލައާ ގުޅުންހުރި ލިޔެކިޔުންތަކެއް ސޯޝަލް މީޑިއާގައި ވަނީ އާންމުވެފައެވެ.
ސީލައިފް މައްސަލައިގައި، އެޕާޓުމެންޓު ވިއްކާނެ ކަމަށް ބުނެ ގިނަ އަދަދެއްގެ މީހުންގެ އަތުން ފައިސާ ނަގައިފައިވެއެވެ. އެގޮތުން ބުކިން ފީގެ ގޮތުގައި 50،000 ރުފިޔާއާއި ޑައުންޕޭމެންޓުގެ ގޮތުގައި ވެސް ބައެއް މީހުން ފައިސާ ދެއްކިއެވެ.
އެ މައްސަލައިގައި 200އަށް ވުރެ ގިނަ މީހަކު ދައުލަތާ ދެކޮޅަށް ދައުވާ ކުރުމުން، އެޗްޑީސީން އެ މީހުންނަށް 45 މިލިއަން ރުފިޔާގެ ބަދަލެއް ކަނޑައަޅައި، ބޯހިޔާވަހިކަމުގެ މަޝްރޫއަކުން ފްލެޓް ގަތުމަށް އެ މީހުންނަށް ފުރުސަތު ދޭ ގޮތަށް އެއްބަސްވުމެއް އެކުލަވާލިއެވެ.
އެ އެއްބަސްވުމުގެ ދަށުން، ސީލައިފަށް ފައިސާ ދެއްކި މީހުންގެ ތެރެއިން ބައެއް މީހުންނަށް ހިޔާ ފުލެޓުތަކާއި ވިނަރެސް ފުލެޓުތައް ދީފައިވާ ކަމަށް މިދިޔަ މާޗު މަހު އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު ވިދާޅުވިއެވެ. އޭރު އޭނާ ވިދާޅުވީ ހިޔާ ޓަވަރުތަކުން ބާކީވި 60 ވަރަކަށް ފުލެޓާއި ވިނަރެސްގެ 130 ފުލެޓު ހަމަޖައްސައިދިން ކަމަށެވެ.
"ސަން"އަށް މައުލޫމާތު ލިބިފައިވާ ގޮތުގައި، ސީލައިފަށް ފައިސާ ނުދައްކާ ބައެއް މީހުންނަށް ވެސް އެ އެއްބަސްވުމުގެ ދަށުން ކަމަށް ބުނެ ވިނަރެސް ފުލެޓު ދީފައިވެއެވެ. އަދި އެގޮތަށް ފުލެޓު ދިނުމަށް ޓަކައި ފޭކު ލިޔެކިޔުން ހެދި ކަމަށް ވެސް މައުލޫމާތު ލިބިފައިވެއެވެ.
ސީލައިފް ގްލޯބަލްގެ ޚިޔާނާތުގެ މައްސަލައިގައި އެ ކުންފުނީގެ މެނޭޖިން ޑިރެކްޓަރު އަޙްމަދު މޫސާ މުޙައްމަދު (އައްމަޓީ)ގެ މައްޗަށް 42 ދައުވާއެއް ވަނީ އުފުލައިފައެވެ. އެ ދައުވާތައް ސާބިތުވެއްޖެނަމަ އޭނާގެ މައްޗަށް 65 އަހަރުގެ ޖަލު ހުކުމެއް ކަނޑައެޅޭނެ ކަމަށް ޕީޖީން ވަނީ ބުނެފައެވެ.
އެ ދައުވާތަކާ ގުޅިގެން އޭނާގެ ޕާސްޕޯޓު އޮތީ ހިފަހައްޓާފައެވެ. ނަމަވެސް އޭނާ 14 ދުވަހަށް ރާއްޖޭން ބޭރަށް ދާން ކްރިމިނަލް ކޯޓުން ވަނީ މިދިޔަ ބުދަ ދުވަހު ހުއްދަދީފައެވެ.
ބިންވެރިޔާ ސްކީމުން ނުހައްގުން ގޯތި ދީފައިވާ ކަމަށް ބުނާ މައްސަލައިގެ ޖިނާއީ ތަހުގީގެއް ފުލުހުން ފަށައިފައިވާތީ، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)ން ވަނީ ފަޒުލް މަގާމުން ސަސްޕެންޑުކޮށްފައެވެ. އޭނާގެ ބޭބެ އަދި އެމްޑަބްލިޔުއެސްސީގެ ޑީއެމްޑީގެ މުހައްމަދު ފަޒީލް ރަޝީދުގެ ޝަރުތު ހަމަނުވި ނަމަވެސް، ގޯއްޗެއް ދިނުމަށް ހަދައިފައިވާ އެއްބަސްވުމެއް ވަނީ ސޯޝަލް މީޑިއާގައި އާންމުވެފައެވެ.
އެހެންވެ، އެ ތަހުގީގުގައި އޭނާ ވެސް ހިމެނޭތީ، އެމްޑަބްލިޔުއެސްސީގެ ބޯޑުން ވަނީ ފަޒީލް ސަސްޕެންޑުކޮށްފައެވެ.
މީގެ އިތުރުން ފަޒުލްއާއި ފަޒީލްގެ އިތުރުން ވެސް އެޗްޑީސީއާއި ހައުސިން މިނިސްޓްރީގެ ކުރީގެ މުވައްޒަފުންތަކެއް ހިމެނޭ ގޮތަށް، ޕާސްޕޯޓު ހިފަހައްޓާފައިވެއެވެ.