ބަންދުގައި ބަހައްޓައިގެން ކޯޓަށް ހާޒިރުކުރަން ދެމީހަކު ހޯދަނީ

ކޯޓަށް ހާޒިރުކުރަން ބޭނުންވެ، މިހާތަނަށް ކޯޓަށް ހާޒިރުކުރެވިފައި ނުވާ ދެމީހަކު ހޯދަން ފުލުހުން މިއަދު އިއުލާނުކޮށްފިއެވެ.

އޭގެތެރެއިން އެކަކަކީ ސިވިލް ކޯޓަށް ހުށަހަޅާފައިވާ ރަހުނު ނުހިމެނޭ ފައިސާގެ ހުކުމް ތަންފީޒު މައްސަލައާ ގުޅިގެން އެކޯޓަށް ހާޒިރުކުރަން ބޭނުންވެ، މިހާތަނަށް އެ ކޯޓަށް ހާޒިރުކުރެވިފައިނުވާ މީހެއް ކަމަށް ފުލުހުން ވަނީ ބުނެފައެވެ.

ފުލުހުން ބުނީ، އޭނާ ހޯދަމުން ދަނީ ބަންދުގައި ބަހައްޓައިގެން މާދަމާގެ 10:00އަށް ސިވިލް ކޯޓަށް ހާޒިރުކޮށްދޭން އެ ޚިދުމަތަށް ކޮށްފައިވާ އަމުރަކާ ގުޅިގެން ކަމަށެވެ.

މި އަމުރާ ގުޅިގެން ހޯދަމުން ދަނީ, މ. ލަންސިމޫގެއާގެ، އިބްރާހީމް ރަޝީދު, 59, އެކެވެ.

ދެން ފުލުހުން ހޯދަމުން އަންނަނީ ހުޅުމާލެ މެޖިސްޓްރޭޓް ކޯޓަށް ހުށަހަޅާފައިވާ މައްސަލައަކާ ގުޅިގެން އެކޯޓަށް ހާޒިރުކުރަން ބޭނުންވެ، ހާޒިރުކުރެވިފައިނުވާ ގ. ރަނައުރާގެއާގެ، އުމުރުން 40 އަހަރުގެ ރިމާނާ މޫސާއެވެ.

ފުލުހުން ހޯދަމުން އަންނަ ރިމާނާ މޫސާ --- ފޮޓޯ/ ފުލުހުން

ރިމާނާ ހޯދަނީ، ބަންދުގައި ބަހައްޓައިގެން އަންނަ ބުރާސްފަތި ދުވަހު 13:00 އަށް ހުޅުމާލެ މެޖިސްޓްރޭޓް ކޯޓަށް ހާޒިރުކޮށްދޭން އެ ޚިދުމަތުގެ މައްޗަށް ކޮށްފައިވާ އަމުރަކާ ގުޅިގެން ކަމަށް ފުލުހުން ބުނެފައިވެއެވެ.

އިބްރާހީމް ރަޝީދާއި ރިމާނާއާ ގުޅޭ އެއްވެސް މައުލޫމާތެއް ލިބިފައިވާނަމަ ފުލުހުންގެ ކަސްޓޯޑިއަލް ނަމްބަރު 9991442 އަށް ގުޅައިގެން މައުލޫމާތު ހިއްސާކުރަން ފުލުހުން އެދިފައިވެއެވެ.

ފުލުހުން ވަނީ މިފަދަ ކަންކަމުގައި ރައްޔިތުންގެ ފަރާތުން އެޚިދުމަތަށް ލިބޭ އެއްބާރުލުމަށް ޝުކުރު އަދާކޮށްފައެވެ.