ޕަބްލިކް ސާވިސް މީޑީއާ (ޕީއެސްއެމް)ގެ މެނޭޖިން ޑިރެކްޓަރު މުހައްމަދު ސައީދު އިސްތިއުފާ ދެއްވައިފިއެވެ.
މިކަން "ސަން"އަށް ވަނީ ކަށަވަރު ވެފައެވެ.
ސައީދު ޕީއެސްއެމްގެ އެމްޑީއަކަށް އައްޔަނުކޮށްފައިވަނީ މިދިޔަ އޮގަސްޓު މަހެވެ. އެއީ ކުރިން އެ މަގާމުގައި ހުންނެވި ޒީނާ ޒާހިރު އެ މަގާމުން އިސްތިއުފާދެއްވުމާ ގުޅިގެންނެވެ.
ސައީދުގެ އިސްތިއުފާއާ ގުޅޭ ގޮތުން މިހާތަނަށް އޭނާގެ ބަހެއް ލިބިފައިނުވެއެވެ.
ސައީދު މަގާމުން އިސްތިއުފާ ދެއްވިއިރު، ޕީއެސްއެމްގެ ކޮންޓެންޓާ ގުޅޭ މައްސަލަތަކެއް މިފަހުން ފެންމަތިވެފައިވެއެވެ. އެގޮތުން ޕީއެސްއެމުން ވަގުތުން ގެނެސްދިން އިވެންޓެއްގައި ޤުރުއާނުން ބައެއް އުނިވީ ކަމަށް ބުނެ މިދިޔަ ބުރާސްފަތި ދުވަހު ރައްޔިތުންގެ މަޖިލީހަށް ކުއްލި މައްސަލައެއް ވެސް ހުށަހަޅައިފައިވެއެވެ.
ކީރިތި ޤުރުއާނުގެ އާޔަތްތަކަށް ބަދަލު ގެނެސްގެން ޕީއެސްއެމުން ދައްކަމުންދާކަން ފާހަގަކުރެވިފައިވާ ކަމަށް ބުނެ އިދިކޮޅު އެމްޑީޕީން ހުށަހެޅި އެ މައްސަލަ މަޖިލީހުން ބަލައިގަނެ، ބަހުސް ވެސް ކުރިއެވެ.
އެ މައްސަލައިގައި ސައީދު ވަނީ، ޤުރުއާނުން ބައެއް އުނިވީ ޓެކްނިކަލް މައްސަލައެއްގެ ސަބަބުން ކަމަށާއި އެ ކަމުގައި އިހުމާލުވި މުވައްޒަފުން ވަޒީފާގެ މަސްއޫލިއްޔަތުތަކުން އެކަހެރިކޮށްފައިވާ ކަމަށް ވިދާޅުވެފައެވެ.
އޭގެ ދެ ދުވަސް ފަހުން، ޕީއެސްއެމްއިން ގެނެސްދިން އިނގިރޭސި ޚަބަރުގެ ސެގްމަންޓެއްގައި ބޭއަދަބީ މަންޒަރެއް ދެއްކި މައްސަލައެއް ފެންމަތިވެ، އެކަމާ ގުޅިގެން ވެސް ދެ މުވައްޒަފަކު ސަސްޕެންޑުކުރިއެވެ.
މިދިޔަ އޮގަސްޓު މަހުގެ 24ގެ ޒީނާ މަގާމުން އިސްތިއުފާދެއްވިއިރު، އޭނާ އެ މަގާމަށް އައްޔަންކުރީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ. ޒީނާ އިސްތިއުފާ ދެއްވި ސަބަބެއް ހާމައެއްނުކުރައްވައެވެ.